દેશની રાજધાની દિલ્હીમાં એક 20 વર્ષીય વિદ્યાર્થિનીએ કરેલા કથિત એસિડ એટેકના દાવાએ ભારે હોબાળો મચાવ્યો હતો, પરંતુ 24 કલાકની અંદર જ આ આખી કહાણીમાં 180 ડિગ્રીનો વળાંક આવ્યો છે. શરૂઆતમાં, વિદ્યાર્થિનીએ દાવો કર્યો હતો કે, એક યુવક જીતેન્દ્ર અને તેના 2 સાથીદારો ઈશાન અને અરમાન દ્વારા લક્ષ્મીબાઈ કોલેજ પાસે તેના પર એસિડ ફેંકવામાં આવ્યો હતો. દિલ્હી યુનિવર્સિટીના નોન-કોલેજિયેટ વુમન્સ એજ્યુકેશન બોર્ડમાં બી.કોમ બીજા વર્ષમાં ભણતી આ વિદ્યાર્થીનીએ કહ્યું હતું કે, જીતેન્દ્ર તેને ઘણા સમયથી પરેશાન કરી રહ્યો હતો, અને એસિડથી બચવાનો પ્રયાસ કરતી વખતે તેના બંને હાથ દાઝી ગયા હતા.
પીડિતાના પિતા અકીલ ખાને કર્યો ખુલાસો
જોકે, કેસના મુખ્ય સૂત્રધાર અને પીડિતાના પિતા અકીલ ખાનની ધરપકડ બાદ આખી ઘટનાની હકીકત સામે આવી છે. અકીલ ખાને દિલ્હી પોલીસ સમક્ષ મોટો ખુલાસો કર્યો છે કે, આ એસિડ અટેકની વાત સંપૂર્ણપણે મનઘડત હતી અને તેણે જ બદલો લેવાના હેતુથી ત્રણેય યુવકોને ફસાવવા માટે આ કાવતરું રચ્યું હતું. ખાનનો આશય જીતેન્દ્રની પત્ની દ્વારા અગાઉ દાખલ કરાયેલી સતામણીની ફરિયાદનો બદલો લેવાનો હતો. કબૂલાતમાં અકીલ ખાને જણાવ્યું કે, તેની દીકરીના હાથ પર દાઝી જવાની ઈજા એસિડથી નહિ, પરંતુ ટોઈલેટ ક્લીનરથી થઈ હતી. તેણે કહ્યું કે, દીકરી ઘરથી ટોઈલેટ ક્લીનર લઈને આવી હતી, જે તેણે પોતે જ પોતાના હાથ પર નાખ્યું હતું.
આ પણવાંચો: <a href="https://www.benefitnews24.com/gujarati/crime/acid-attack-incident-in-rajkot/4914" target="_blank" rel="noopener">રાજકોટમાં એસિડ અટેકની ઘટના</a>
ઘટનાના સમયે મુખ્ય આરોપી હતો કરોલ બાગમાં&nbsp;
પોલીસ તપાસમાં પણ યુવતીની વાતમાં અનેક વિસંગતતાઓ સામે આવી હતી. તપાસમાં બહાર આવ્યું કે, ઘટનાના સમયે મુખ્ય આરોપી જીતેન્દ્ર કરોલ બાગમાં હાજર હતો, જે તેના મોબાઇલ લોકેશન, CCTV ફૂટેજ અને સાક્ષીઓના નિવેદનોથી સાબિત થયું. યુવતી દ્વારા ઉલ્લેખિત બાઇક પણ કરોલ બાગમાં પાર્ક થયેલી મળી હતી. આ ઉપરાંત, કથિત ઘટનાસ્થળ નજીકની દીવાલ પર પણ એસિડના કોઈ નિશાન મળ્યા ન હતા. CCTV ફૂટેજમાં એ પણ જોવા મળ્યું કે, યુવતી અને તેનો ભાઈ સ્કૂટર પર ઘરેથી નીકળ્યા હતા, પરંતુ ભાઈએ તેને કોલેજના મુખ્ય ગેટ પર નહિ, પણ અશોક વિહાર વિસ્તારમાં 200 મીટર દૂર ઉતારી હતી.
વાંધાજનક ફોટો-વિડિયો બનાવીને કર્યો બ્લૅકમેઈલ
આ કાવતરા પાછળનું મુખ્ય કારણ બદલાની ભાવના હતી, જેની શરૂઆત કથિત હુમલાના 2 દિવસ પહેલા થઈ હતી. આરોપી જીતેન્દ્રની પત્નીએ પોલીસને PCR કોલ કરીને અકીલ ખાન સામે બ્લેકમેઈલિંગ અને સતામણીની ફરિયાદ નોંધાવી હતી. તેણે આરોપ મૂક્યો હતો કે, 2021થી 2024 દરમિયાન ખાનની ફેક્ટરીમાં કામ કરતી વખતે ખાને તેની સાથે બળજબરી કરી અને વાંધાજનક ફોટો-વિડિયો બનાવીને બ્લૅકમેઈલ કર્યો હતો.&nbsp;

પીડિતાના પિતા અકીલ ખાને કબૂલ્યું કે, દીકરીના હાથ પરની ઈજા ટોઈલેટ ક્લીનરથી થઈ હતી

October 28, 2025 | 10:37 IST