બદનામીના પોસ્ટર્સ, લોકોમાં આ પોસ્ટર્સ ચર્ચાનો વિષય બન્યા

અમદાવાદ શહેરના ઓઢવ વિસ્તારની મહાવીર હોસ્પિટલની બહાર લાગેલા એક પોસ્ટર લોકોમાં આ પોસ્ટર્સ ચર્ચાનો વિષય બન્યો છે. હોસ્પિટલના ત્રણેય માળ પર એક વ્યક્તિના પ્રવેશ નિષેધના પોસ્ટર્સ લગાવવામાં આવ્યા છે.

નરપતભાઈ જૈન નામના વ્યક્તિની તસવીર સાથે પોસ્ટર્સ લગાવાયા છે. જેમાં લખ્યું છે કે "મહાવીર હોસ્પિટલમાં નરપતભાઈનો પ્રવેશ પર પ્રતિબંધ છે.”ઓઢવની મહાવીર સોસાયટીમાં રહેતા નરપતભાઈ જૈનનું માનીએ તો તેઓ વર્ષ 2023માં પોતાના સંબંધી શાંતિલાલ ભંડારીને અકસ્માત થતાં તાત્કાલિક સારવાર માટે મહાવીર હોસ્પિટલમાં લઈ ગયા હતા.

જે તે સમયે શાંતિલાલ ભંડારીના હાથ પર સામાન્ય ઇજાઓ થઈ હતી. તેમ છતાં તેમને ICU માં દાખલ કરી તાત્કાલિક સારવાર આપવામાં નહી આવે તો હાથની નસો ખરાબ થઇ જશે અને અંદાજે લાખ રૂપિયા જેવો ખર્ચ થશે તેવું હોસ્પિટલના સત્તાવાળાઓએ કહ્યુ હતુ. ત્યારબાદ નરપત જૈને દર્દીના X-RAY ના ફોટા હોસ્પિટલ પાસેથી મેળવી નારાયણી હોસ્પિટલમાં નિદાન કરાવવાનો નિર્ણય કર્યો હતો. તેથી મહાવીર હોપિટલમાંથી ડિસ્ચાર્જ પ્રકિયા પૂર્ણ કરી રૂપિયા 25 હજાર બિલ ચુકવી દર્દીને નારાયણી હોસ્પિટલમાં દાખલ કર્યા હતા. જ્યાં બે કલાક સારવાર આપી દર્દીને રજા આપવામાં આવી હતી. આ સારવાર પાછળ માત્ર 5 હજાર ચાર્જ લઈ કોઈ ગંભીર ઇજા નહી હોવાનું હોસ્પિટલના સત્તાવાળાઓએ જણાવ્યુ હતુ. 

ત્યારબાદ 14 જાન્યુઆરી 2025ના રોજ શાંતિલાલ ભંડારીને ખેંચ આવતા તાત્કાલિક સારવાર માટે તેમનો પુત્ર મહાવીર હોસ્પિટલમાં લઇ ગયો હતો. તેની જાણ થતાં નરપતભાઈએ હોસ્પિટલમાં જઈ દર્દીને ડિસ્ચાર્જ આપવા કહ્યું હતુ. એક કલાકની સારવાર બાદ દર્દીને નારાયણી હોસ્પિટલમાં ખસેડવામાં આવ્યા હતા.

 મહાવીર હોસ્પિટલની નીચે ચાલતાં મેડિકલ સ્ટોરમાંથી દર્દીના નામે બિલ આપવામાં આવ્યું હતુ. જેમાં 10 ઈન્જેકશનની વિગત દર્શાવવામાં આવી હતી. 1 કલાકમાં 10 ઈન્જેકશન આપવાની બાબત નરપતભાઈને ગળે ન ઉતરતા હોસ્પિટલ પાસેથી લેખિત ખુલાસો માંગી ઈન્જેક્શનની વિગત અને ખાલી શીશીઓ બતાવવા કહ્યું હતું. હોસ્પિટલ તંત્રએ કોઈ જવાબ નહી આપી ચોર કોટવાળને દંડે તેમ ઉલટું નરપત જૈન વિરુદ્ધ પોલીસ ફરિયાદ કરી હતી. આ ફરિયાદમાં હોસ્પિટલ તંત્રએ જણાવ્યુ હતુ કે, આ વ્યક્તિ હોસ્પિટલમાં આવી અવાર-નવાર દર્દીઓને ઉશ્કેરતા હોય છે. જો કે, પોલીસે નરપત જૈનને પોલીસ સ્ટેશન હાજર થવાની ના કહીને દર્દીની સારવાર પર ધ્યાન આપવા સલાહ આપી હતી.

પોલીસ ફરિયાદ થયા બાદ સમગ્ર મામલો પૂર્ણ થવાના બદલે વણસ્યો હતો. મહાવીર હોસ્પિટલના તંત્રએ CCTV ફુટેજમાંથી નરપત જૈનના ફોટોગ્રાફ લઇ પ્રવેશ નિષેધના પોસ્ટર્સ બનાવી હોસ્પિટલમાં લગાવી દીધા છે. હોસ્પિટલમાં લાગેલા પોસ્ટર્સ જોઈ નરપતભાઈને સંબંધીઓ અને નાગરિકો ફોન કરી અપમાનિત ટિપ્પણીઓ સંભળાવી રહ્યા છે. તેથી નરપતભાઈએ હોસ્પિટલના તંત્ર સામે માનહાનીનો કાસે કરી નોટિસ પાઠવવાની કાર્યવાહી કરવાની તજવીજ શરૂ કરી છે. 

બદનામીના પોસ્ટર્સ બાબતે બેનિફિટ ન્યૂઝના પ્રતિનિધિએ મહાવીર હોસ્પિટલના ટ્રસ્ટી અને ડોક્ટરનો સંપર્ક કરતાં હોસ્પિટલના મેનેજર અને ડોક્ટરે કંઈપણ કહેવાનો ઈન્કાર કર્યો હતો. જ્યારે હોસ્પિટલના ટ્રસ્ટીનો ટેલિફોનિક સંપર્ક કરતાં તેઓએ યોગ્ય જવાબ આપવાનું ટાળ્યુ હતુ. ખાનગી હોસ્પિટલ પોતાની બેદરકારી છુપાવવા અને કોઈને બદનામ કરવા આવી રીતે પોસ્ટર્સ લગાવી શકે કે કેમ તેવા અનેક સવાલ ઉઠી રહ્યા છે. ત્યારે મહાવીર હોસ્પિટલમાં લાગેલા બદનામીના પોસ્ટર્સનો વિવાદ વધુ વકરે તેવી શક્યતા છે.