દાહોદ પોલીસે ડ્રોનની મદદથી ખેતરમાં છૂપાયેલા ચોરને ઝડપ્યો

દાહોદ પોલીસે ડ્રોન કેમેરાની મદદથી ખેતરોમાંથી આરોપીને શોધી કાઢ્યાં હતા. થર્મલ ઈમેજિંગ કેમેરાથી ખેતરમાં છૂપાયેલા ચોરને શોધ્યા હતા. પોલીસે ડ્રોનમાં ચોર દેખાતા રાતભર ચોરનો પીછો કર્યો હતો. ત્યારબાદ આસપાસના વિસ્તારમાં ઘેરાબંધી કરી પોલીસે ચોરને ઝડપી પાડ્યો હતો.

ગુજરાત પોલીસને ડ્રોનની મદદથી મંદિરોમાં ચોરીમાં સંડોવાયેલી ગેંગના લીડરની ધરપકડ કર્યા બાદ હવે ડમ્પર લૂંટારૂને પકડવામાં સફળતા મળી છે. ડમ્પર લૂંટીને ભાગી ગયેલો ગેંગ લીડર બચવા માટે મકાઈના ખેતરમાં ગયો હતો, પરંતુ પોલીસ ડ્રોન દ્વારા તેને જોવામાં આવ્યો હતો. ગુજરાતના ડીજીપી વિકાસ સહાયે ટેકનોલોજીનો સારો ઉપયોગ કરવા બદલ દાહોદ જિલ્લા પોલીસની પ્રશંસા કરી છે. તેણે X પર આ રસપ્રદ વીડિયો પણ શેર કર્યો છે.

26 ફેબ્રુઆરીએ છત્તીસગઢનાં મુંગેલીથી ડમ્પરની ચોરી કરી હતી. DGP વિકાસ સહાયે દાહોદ પોલીસની કામગીરી બિરદાવી છે.  ગુજરાત પોલીસ દ્વારા ટેક્નોલોજીનો સદ્દઉપયોગ કર્યો હોવાના વખાણ પણ કર્યા છે. 

બીજી તરફ સુરેન્દ્રનગરમાં ધાડપાડુ ગેંગનો રીઢો આરોપી ઝડપાયો છે. આરોપી વિરૂદ્ધ ગુજરાતભરમાં આશરે 36 ગુના નોંધાયેલા છે. આરોપીને ફિંગરપ્રિન્ટના આધારે ઝડપવામાં આવ્યો છે. પોલીસે આરોપીની ધરપકડ કરી 1.32 લાખનો મુદ્દામાલ જપ્ત કર્યો હતો. આરોપીના રિમાન્ડ મેળવી વધુ પૂછપરછ હાથ ધરવામાં આવી છે