CID ક્રાઈમના PI અને કોન્સ્ટેબલ લાંચ લેતા ઝડપાયા

ગુજરાત એસીબીએ ગાંધીનગરમાં સફળ છટકું ગોઠવી CID ક્રાઈમના સીઆઈ સેલના પોલીસ ઇન્સ્પેક્ટર અને કોન્સ્ટેબલને રૂપિયા 30 લાખની લાંચ લેતા રંગેહાથ ઝડપી પાડ્યા છે. કોલ સેન્ટરના એક ગુનામાં કાર્યવાહી ન કરવા અને સેટલમેન્ટ કરવા પીઆઇ અને કોન્સ્ટેબલે લાંચ માગી હતી. અમદાવાદ ACBએ સરગાસણ નજીક છટકું ગોઠવી બંને આરોપીને ઝડપી વધુ તપાસ હાથ ધરી છે.

ACBના સૂત્રોએ જણાવ્યું કે, આ કેસના ફરિયાદીના મિત્ર વિરૂદ્ધ ગાંધીનગર CID ક્રાઈમના સીઆઈ સેલમાં  નોંધાયેલા કોલ સેન્ટરના ગુનામાં કાર્યવાહી ન કરવા CID ક્રાઈમ સીઆઈ સેલના પોલીસ ઇન્સ્પેક્ટર પેથા કમરશીભાઈ પટેલ અને આર્મ્ડ પોલીસ કોન્સ્ટેબલ વિપુલ બાબુભાઈ દેસાઈએ તગડી રકમની લાંચ માગી હતી. ફરિયાદી અને આરોપી વચ્ચે લાંબી રકઝકના અંતે 30 લાખની ડીલ થઈ હતી.

ફરિયાદી પોતે લાંચની રકમ આપવા માંગતો ન હોવાથી તેણે ACBનો સંપર્ક કર્યો હતો. તેથી ACB એ અમદાવાદ શહેર પોલીસ ઇન્સ્પેક્ટર ડી.એન. પટેલ અને તેમની ટીમને લાંચનું છટકું ગોઠવવા સૂચના આપી હતી. અમદાવાદ એસીબીએ ગાંધીનગરના સરગાસણ ખાતે સ્વાગત સિટી મોલથી આગળ જાહેર રોડ પર આવેલી ધી ઓફિસિસ હરી ગૃપ નામની નવી બનતી સાઈટની સામે જાહેરમાં છટકું ગોઠવ્યું હતું.

દરમિયાનમાં કોન્સ્ટેબલ વિપુલ દેસાઈ ફરિયાદીને મળ્યો હતો. તે સમયે પોલીસ ઇન્સ્પેક્ટર પી.કે.પટેલે પણ લાંચ સ્વીકારવાની સંમતિ આપી હતી. બાદમાં કોન્સ્ટેબલ વિપુલ દેસાઈએ ફરિયાદી પાસેથી 30 લાખની લાંચ સ્વીકારી હતી. તે સમયે અણદાવાદ ACBની ટીમે કોન્સ્ટેબલ વિપુલ દેસાઈને દબોચી લીધો હતો. બંને પોલીસ કર્મચારીઓની અમદાવાદ ACBએ ધરપકડ કરી ગુનો નોંધી કાર્યવાહી શરૂ કરી છે. આ સમગ્ર ઓપરેશનનું સુપરવિઝન અમદાવાદ ACB એકમના ઇન્ચાર્જ મદદનીશ નિયામક ડી.એન. પટેલે કર્યુ હતું.

મહત્વપૂર્ણ છે કે, ગાંધીનગર CID ક્રાઈમના સીઆઈ સેલ દ્વારા કોલ સેન્ટરના ગુનાની તપાસ કરવામાં આવી રહી છે. આ ગુના સંદર્ભે આરોપી પીઆઇ પી.કે. પટેલ તપાસ કરી રહ્યા છે. જેમાં કોન્સ્ટેબલ વિપુલ દેસાઈ અને પીઆઈએ સાંઠગાંઠ કરી ફરિયાદીને ગર્ભિત ધમકીઓ આપી તગડી રકમ લાંચ પેટે માગી હતી. પીઆઇ પી.કે.પટેલ અને કોન્સ્ટેબલ વિપુલ દેસાઈએ લાંચ લઈને સીઆઈડી ક્રાઈમ સહિત ગુજરાત પોલીસની આબરૂના ધજાગરા ઉડાડ્યા છે.

હાલમાં દારૂ, જુગાર અને ડ્રગ્સની હેરાફેરી મામલે પોલીસ ઉપર વિપક્ષના નેતાઓ અને નાગરિકો તરફથી માછલા ધોવામાં આવી રહ્યા છે. તેવામાં સીઆઈડી ક્રાઈમના લાંચ પ્રકરણથી પોલીસ અને ગૃહ વિભાગ બેકફૂટ ઉપર આવે તેમ લાગી રહ્યું છે.