રહેમરાહે નોકરીના બદલામાં લાંચ માંગવાના કેસમાં વડોદરામાં CBI ના દરોડા

વડોદરાના પ્રતાપનગરમાં રેલવે ડીઆરએમ ઓફિસમાં બે ક્લાસ વન અધિકારીઓને ત્યાં સીબીઆઇએ દરોડા પાડતાં ખળભળાટ મચી ગયો છે. રેલવે ડીઆરએમ કચેરીના સિનીયર ડિવીઝનલ પર્સનલ ઓફિસર અને ડિવીઝનલ પર્સનલ ઓફિસરના નિવાસસ્થાને સીબીઆઇની એન્ટી કરપ્શન બ્યુરોની ટીમોએ દરોડા પાડ્યા છે. ગઇ કાલે બપોરથી આ દરોડાની કાર્યવાહી શરુ થઇ હતી અને ત્યારબાદ મોડી રાત સુધી દરોડાની કાર્યવાહી ચાલુ હતી. 

મળેલી માહિતી મુજબ સીબીઆઇની ટીમે વડોદરા રેલવેના કેટલાક અધિકારીઓ અને કર્મચારીઓની  પણ પુછપરછ કરાઇ હોવાની સૂત્રો દ્વારા માહિતી પ્રાપ્ત થઈ રહી છે.આ મામલે રેલવેના ત્રણ ઉચ્ચ અધિકારીઓ એક ખાનગી વ્યક્તિ સહિત અન્ય પાંચ લોકો સામે ગાંધીનગર CBI અને ACBમાં સંયુક્ત ગુનો નોંધવામાં આવ્યો હોવાની માહિતી પ્રાપ્ત થઈ રહી છે. 

વડોદરા શહેરના પ્રતાપનગર સ્થિત રેલવે કોલોનીમાં DPO ના નિવાસ સ્થાને ગાંધીનગર ACB અને CBI ની ટીમ આજે બપોરે ત્રાટકી હતી. એકા એક તપાસનો ધમધમાટ શરૂ થતાં રેલવે વિભાગમાં ભારે ફફડાટ ફેલાયો હતો. ACB અને CBI ના અધિકારીઓ દ્વારા પૂછતાછ અને દસ્તાવેજોની તપાસ કરવામાં આવી રહી હોવાનું સૂત્રો દ્વારા જાણવા મળ્યું છે. મોડી રાત સુધી ચાલી રહેલી તપાસમાં રેલવેનું મોટું કૌભાંડ બહાર આવી શકે તેવી શક્યતાઓ સેવાઈ રહી છે.

સીબીઆઈની ટીમોએ ડી.પી.ઓની ઓફિસમાં મહત્વના દસ્તાવેજ અને કોમ્યુટરની તપાસ કર્યા બાદ અન્ય આરોપ ધરાવતા અધિકારીઓને સાથે રાખી રેલવે ઓફિસર કોલોની ખાતે પહોંચ્યા હતા.પાંચ જેટલી જીપ અને કારનો કાફલો જોઈ રેલવે કર્મીઓમાં પણ આશ્ચર્ય ફેલાયું હતું.

સીબીઆઇની ટીમો એ ભ્રષ્ટાચારના આરોપીઓ ને સાથે રાખી એમના નિવાસસ્થાનમાં સર્ચ કર્યું હતું જેમાં રોકડ રકમ,સોના ચાંદીના દાગીના અને રોકાણ તેમજ મિલકતો અંગે તપાસ કરી હતીતપાસ પૂર્ણ થયા બાદ વિગતો જાહેર કરવામાં આવશે એમ સીબીઆઇના સૂત્રોએ જણાવ્યું છે

રહેમરાહે નોકરી માટે લાયક ઉમેદવારને પોસ્ટિંગ માટે મોટી રકમ માગવામાં આવતી હતી, એવી ફરિયાદ એક કર્મચારીએ પુરાવા સાથે કરી હતી. જેની પ્રાથમિક તપાસમાં તથ્ય બહાર આવતાં સીબીઆઈ આ અધિકારીઓની તપાસ માટે વડોદરા પહોંચી હતી.