રાજકોટમાં ₹46 લાખનું એમ્બરગ્રીસ ઝડપાયું

રાજકોટ શહેર પોલીસની સ્પેશિયલ ઓપરેશન ગ્રુપ (SOG) ટીમે પ્રતિબંધિત અને અત્યંત કિંમતી ગણાતા એમ્બરગ્રીસ એટલે કે સ્પર્મ વ્હેલ માછલીની ઉલ્ટીના જથ્થા સાથે બે શખ્સોને ઝડપી પાડ્યા છે. આંતરરાષ્ટ્રીય બજારમાં કરોડોની કિંમત ધરાવતા આ પદાર્થ સાથે પકડાયેલા બંને શખ્સો અમદાવાદથી રાજકોટ વેચાણ અર્થે આવ્યા હોવાનું પ્રાથમિક તપાસમાં બહાર આવ્યું છે.

ચોક્કસ બાતમીના આધારે SOGનો દરોડો : 

રાજકોટ SOG પોલીસને ચોક્કસ માહિતી મળી હતી કે બે શખ્સો ગેરકાયદેસર રીતે વ્હેલ માછલીની ઉલ્ટીનો જથ્થો લઈને શહેરમાં ગ્રાહકોની શોધમાં ફરી રહ્યા છે. આ બાતમીના આધારે પોલીસે રાત્રિના સમયે વોચ ગોઠવીને અમદાવાદના સુમિત શ્રીકાંત ધુમલ અને મયુર મહેન્દ્રભાઈ ભાવસાર નામના બે શખ્સોને અટકાવ્યા હતા. તલાશી લેતા તેમની પાસેથી 0.462 કિલોગ્રામ વ્હેલ માછલીની ઉલ્ટી મળી આવી હતી, જેની અંદાજિત કિંમત ₹46.20 લાખ આંકવામાં આવી છે.

માત્ર 10 હજારના કમિશન માટે કરી તસ્કરી : 

પોલીસ પૂછપરછમાં આરોપીઓએ કબૂલાત કરી હતી કે તેઓ આ જથ્થો અમદાવાદના આરીફ નામના વ્યક્તિ પાસેથી લાવ્યા હતા. આરીફે તેમને એસટી બસ મારફત રાજકોટ જઈને આ જથ્થો વેચી આપવા જણાવ્યું હતું અને તેના બદલામાં માત્ર ₹10,000 કમિશન આપવાની લાલચ આપી હતી. હાલ પોલીસે આરીફ નામના મુખ્ય સૂત્રધારની શોધખોળ તેજ કરી છે. જપ્ત કરાયેલા જથ્થાને પરીક્ષણ માટે FSL અને વન વિભાગના અધિકારીઓ પાસે મોકલી દેવામાં આવ્યો છે.

શા માટે એમ્બરગ્રીસ આટલું કિંમતી છે ?

એમ્બરગ્રીસને વૈજ્ઞાનિક ભાષામાં 'વ્હેલની ઉલ્ટી' કહેવામાં આવે છે, જે પ્રકૃતિની એક અત્યંત દુર્લભ ઘટના છે. જ્યારે સ્પર્મ વ્હેલના આંતરડામાં કોઈ ખોરાકનો ટુકડો ફસાય છે, ત્યારે તેના શરીરમાં થતી જટિલ રાસાયણિક પ્રક્રિયાને અંતે આ મીણ જેવો પદાર્થ બને છે. તે પર્ફ્યુમ ઉદ્યોગમાં સુગંધને લાંબો સમય ટકાવી રાખવા માટે વપરાય છે. આ પદાર્થ સમુદ્રમાં તરતો જોવા મળતો હોવાથી તેને 'તરતું સોનું' પણ કહેવામાં આવે છે.

કાયદાકીય પાસું : 

ભારતમાં વન્યજીવન સંરક્ષણ અધિનિયમ, 1972 હેઠળ સ્પર્મ વ્હેલને સંરક્ષિત પ્રજાતિ તરીકે જાહેર કરવામાં આવી છે. આથી, એમ્બરગ્રીસનો સંગ્રહ કરવો, તેની ખરીદી કે વેચાણ કરવું એ ગંભીર ગુનો બને છે. રાજકોટ પોલીસે આ મામલે વન વિભાગને પણ જાણ કરી છે જેથી આગળની કડક કાર્યવાહી થઈ શકે.