અમદાવાદ: સગીરની છરીના છ ઘા, યુવકની હત્યા

અમદાવાદમાં એક ચોંકાવનારી ઘટના બની છે, જેમાં એક સગીરે દ્વેષના કારણે એક યુવાનની ઠંડા કલેજે હત્યા કરી દીધી. આ વાત છે હિમેશ પરમારની, જે બહેરામપુરામાં રહેતો હતો. તેના જીવનમાં એક સામાન્ય દિવસ હતો, પરંતુ તેને ક્યાં ખબર હતી કે તેના પડોશમાં રહેતા ગૌતમ સોલંકી અને તેના સગીર મિત્રે તેની વિરુદ્ધ એક ઘાતક કાવતરું રચ્યું છે. જાણીયે શું છે સમગ્ર મામલો આ અહેવાલમાં.

દ્વેષનું કારણ...

બહેરામપુર વિસ્તારની દૂધવાળી ચાલીમાં 19 વર્ષીય હિમેશ પરમાર નામક યુવક રહેતો હતો. પાડોશમાંજ ભાડે સરખી વયનો યુવક ગૌતમ સોલંકી પણ રહેતો હતો. હિમેશ અને ગૌતમ એકબીજાના પરિચયમાં અગાઉથીજ હતા. ગૌતમનો એક સગીર મિત્ર હતો કે જે અવાર નવાર તેના ઘરે મળવા જતો હતો. ગૌતમ અને તેનો સગીર મિત્ર હિમેશના ઘર આગળ આવતા જતા હતા અને ઓટલે બેસીની ઊંચે અવાજે વાતચીત કરતા હતા. હિમેશને બંને યુવકોનું ઘર સામે અવાર નવાર આવવું ગમતું ન હોવાથી તે વારંવાર ગૌતમ અને તેના મિત્રને ટકોર કરતો. પોતાના ઘર સામે આવવા જવા, મોટેથી વાતો કરવા અને ઓટલે બેસવા જેવી સામાન્ય બાબતને લઈને છેલ્લા એક વર્ષથી હિમેશ, ગૌતમ અને સગીર યુવક સાથે બોલાચાલી કરી રહ્યો હતો.

હત્યાનું કાવતરું...

વારંવાર બોલાચાલી અને ઝગડો થતા સગીરના મનમાં દ્વેષનું બીજ વાવાઈ ગયું હતું. તેણે હિમેશની હત્યા કરવાનું કાવતરું રચ્યું. સગીરે હિમેશની હત્યા કરવા સુરેન્દ્રનગરના ચોટીલા ખાતેથી એક ખંજર ખરીદ્યો. ગૌતમ પડોસમાં રહેતો હોવાથી હિમેશની રોજ આવવા જવાની અને અન્ય તમામ વિગતોનો જાણકાર હતો. બંને મિત્રોએ મળીને રાતના સમયે હિમેશની હત્યા કરવાનું નક્કી કર્યું હતું.


બનાવ બાબતે...

21 ફેબ્રુઆરી 2026ની રાત્રે 10 વાગેનો સમય હતો. હિમેશ ઘરેથી બહેરામપુરના હિરાલક્ષ્મી માર્કેટ તરફ જવા નીકળ્યો હતો. ત્યારેજ રસ્તામાં સગીર અને ગૌતમે તેને રોકીને વાતોમાં ગૂંચવી રાખ્યો. અચાનક સગીરે પોતાની પાસે છુપાવી રાખેલો ખંજર નીકાળી એક બાદ એક ઘા મારીને હિમેશને મોતને ઘાટ ઉતારી દીધો. હુમલો કર્યા પછી બંને આરોપીઓ હથિયાર છુપાવીને ફરાર થઈ ગયા હતા. સ્થાનિકો દ્વારા પોલીસને જાણ થતા કાગડાપીઠ પોલીસ  તાત્કાલિક ઘટના સ્થળે હાજર થયી હતી. મૃતદેહને પીએમ અર્થે ખસેડવામાં આવ્યો હતો અને ફરાર આરોપીઓની શોધખોળ શરૂ કરાઈ હતી.



આરોપીઓની ધરપકડ...

હત્યા મામલે અમદાવાદ શહેર ક્રાઈમ બ્રાન્ચને બાતમી મળતા આરોપીની શોધખોળ હાથ ધરવામાં આવે છે. ઉચ્ચ સ્તરીય હ્યુમન ઇન્ટેલિજન્સનો ઉપયોગ કરીને અને આરોપીઓની ગતિવિધિઓ પર નજર રાખીને, ક્રાઇમ બ્રાન્ચની ટીમે હુમલાના ગણતરીના કલાકોમાં જ સગીર અને તેના સાથીદારને રિવરફ્રન્ટ ખાતેથી પકડી પાડ્યા હતા. ક્રાઇમ બ્રાન્ચના પી.આઈ. ઇમરાન ઘાસુરાના કહેવા મુજબ " બંને આરોપીઓ રિવરફ્રન્ટ પરથી ઝડપાયા, જ્યારે તેઓ શહેર છોડીને ભાગવાનો પ્લાન કરી રહ્યા હતા. પોલીસે આ મામલે ગુનો નોંધીને તપાસ શરૂ કરી છે. પકડાયેલા આરોપીઓ વિરુદ્ધ કાયદેસરની કાર્યવાહી ચાલી રહી છે અને વધુ તપાસ તેમજ ગુનામાં વપરાયેલ હથિયાર રિકવર કરવા માટે તેમને કાગડાપીઠ લોકલ પોલીસને સોંપવામાં આવશે."

આ ઘટના અમદાવાદમાં દ્વેષ અને નાની વાતો પર આધારિત હિંસાનું એક ઉદાહરણ છે, જે સમાજને વિચારવા મજબૂર કરે છે.