અમદાવાદ: કેનેડિયન નાગરિકોને ઠગતું કૌભાંડ ઝડપાયું

અમદાવાદ સાયબર ક્રાઇમની ટીમે શહેરના ચાંદખેડા વિસ્તારમાં એક મોટા સર્ચ ઓપરેશન દરમિયાન આંતરરાષ્ટ્રીય સ્તરનું સાયબર ઠગાઈનું નેટવર્ક ઝડપી પાડ્યું છે. ન્યુ સીજી રોડ પર આવેલા સોંપાન હાઈટ્સના એક મકાનમાં ચાલતા આ ગેરકાયદે કોલ સેન્ટર પર દરોડો પાડીને પોલીસે ચાર રીઢા ગુનેગારોની ધરપકડ કરી છે. આ ટોળકી અત્યાધુનિક સોફ્ટવેર અને નકલી ઓળખના આધારે કેનેડામાં રહેતા નિર્દોષ નાગરિકોને શિકાર બનાવતી હતી.

અધિકારી બનીને ડરાવવાની મોડસ ઓપરેન્ડી : 

પોલીસ તપાસમાં બહાર આવ્યું છે કે પકડાયેલા આરોપીઓ કુશ પટેલ, હર્ષ પટેલ, આશુ પટેલ અને સુનિલ રાવત કેનેડા રેવન્યુ એજન્સી (CRA) અથવા પ્રતિષ્ઠિત બેંકોના અધિકારી હોવાનો ખોટો ડોળ કરતા હતા. તેઓ વિદેશી નાગરિકોને ફોન કરીને તેમના બેંક એકાઉન્ટ જોખમમાં હોવાનું જણાવી ડર પેદા કરતા હતા. જ્યારે સામેની વ્યક્તિ ગભરાઈ જાય ત્યારે સુરક્ષાના બહાને તેમની અંગત અને બેંકિંગ વિગતો મેળવી લેતા હતા.

ગિફ્ટ કાર્ડ વાઉચર દ્વારા નાણાંની ઉચાપત : 

આ ઠગ ટોળકી સીધા રોકડ નાણાં ટ્રાન્સફર કરાવવાને બદલે જુદી જુદી કંપનીઓના ગિફ્ટ કાર્ડ વાઉચર ખરીદવાની ફરજ પાડતી હતી. આ પદ્ધતિથી તેઓ બેંકિંગ ટ્રેકિંગથી બચતા હતા. આરોપીઓ પાસેથી છેતરપિંડી માટે વપરાતી ખાસ સ્ક્રિપ્ટ, ૬ લેપટોપ, ૫ સ્માર્ટફોન અને હેડફોન સહિત કુલ ૧.૮૭ લાખ રૂપિયાનો મુદ્દામાલ જપ્ત કરવામાં આવ્યો છે.

મુખ્ય સૂત્રધારની શોધખોળ શરૂ : 

પકડાયેલા શખસોની પૂછપરછમાં શિવાંગ નામના યુવકનું નામ સામે આવ્યું છે. તપાસમાં ખૂલ્યું છે કે છેતરપિંડીના તમામ નાણાં શિવાંગના ખાતામાં જમા થતા હતા. હાલ શિવાંગ પોલીસ પકડથી દૂર હોવાથી તેને ઝડપી પાડવા ચક્રો ગતિમાન કરાયા છે. સાયબર ક્રાઇમ હવે એ દિશામાં તપાસ કરી રહી છે કે આ કૌભાંડમાં અન્ય કોઈ આંતરરાષ્ટ્રીય ગેંગ સંડોવાયેલી છે કે કેમ અને અત્યાર સુધીમાં કેટલા વિદેશી નાગરિકો આ ઠગાઈનો ભોગ બન્યા છે.

આ કેસમાં પોલીસે કાયદેસરની ફરિયાદ નોંધી વધુ તપાસ હાથ ધરી છે. આ કિસ્સો ફરી એકવાર સાબિત કરે છે કે સાયબર ગુનેગારો હવે રહેણાંક વિસ્તારોનો ઉપયોગ કરીને વિશ્વભરમાં પોતાનું જાળ બિછાવી રહ્યા છે.