પહેલા ₹95 હજારની લાંચ… પછી હોટેલની બેગ ખોલતાં સામે આવી મોટી રોકડ રકમ!

Ahmedabad ESIC Hospital Job Scam: અમદાવાદના બાપુનગર સ્થિત ESIC મોડલ જનરલ હોસ્પિટલમાં કરાર આધારિત નોકરી અપાવવાના નામે ઉમેદવારો પાસેથી કથિત રીતે લાંચ માંગવાના કેસનો ACBએ પર્દાફાશ કર્યો છે. એન્ટી કરપ્શન બ્યુરો (ACB)એ વટવા GIDCમાં આવેલી સિક્યોરિટી એજન્સીની ઓફિસમાં ₹95 હજારની લાંચ સ્વીકારતા એક ઓપરેશન મેનેજરને રંગેહાથ ઝડપી પાડ્યો છે. આ કેસમાં કુલ 4 લોકો સામે કાયદેસરની કાર્યવાહી કરવામાં આવી છે.

નોકરી અપાવવાના નામે ₹30 હજારથી ₹1.50 લાખની માંગ
ACBને હેલ્પલાઇન નંબર 1064 પર મળેલી ખાનગી રજૂઆતોના આધારે ESIC મોડલ જનરલ હોસ્પિટલમાં કરાર આધારિત નોકરી અપાવવાના નામે ઉમેદવારો પાસેથી પૈસા માંગવામાં આવતા હોવાની માહિતી મળી હતી. ACBના જણાવ્યા મુજબ, ESIC હોસ્પિટલ સાથે કોન્ટ્રાક્ટ ધરાવતી ‘સિક્યોરશીલ્ડ સિક્યુરિટી સર્વિસ પ્રાઇવેટ લિમિટેડ’ કંપનીમાં અલગ-અલગ કેટેગરીમાં કરાર આધારિત નોકરી અપાવવાના નામે ઉમેદવારો પાસેથી ₹30 હજારથી ₹1.50 લાખ સુધીની રકમ માંગવામાં આવતી હોવાનો આક્ષેપ હતો.

ACBએ ગોઠવ્યું છટકું, ₹95 હજારની લાંચ લેતા ઝડપાયા
ફરિયાદ મળ્યા બાદ ACBએ સમગ્ર મામલે વોચ ગોઠવી હતી. ત્યારબાદ અમદાવાદના વટવા GIDC વિસ્તારમાં આવેલા મેટ્રિક્સ પ્લાઝા કોમ્પ્લેક્સમાં સિક્યોરિટી કંપનીની ઓફિસમાં છટકું ગોઠવવામાં આવ્યું હતું. છટકા દરમિયાન ઉમેદવાર પાસેથી ₹95 હજારની લાંચ સ્વીકારતા નવી દિલ્હીના ઓપરેશન મેનેજર પ્રમોદ શંકર પાંડેને ACBની ટીમે રંગેહાથ ઝડપી પાડ્યા હતા. ACBના જણાવ્યા મુજબ, આ કેસમાં એકબીજાને મદદગારી કરવાના આરોપસર કુલ ચાર લોકો સામે કાર્યવાહી કરવામાં આવી છે.

કોની સામે કાર્યવાહી કરવામાં આવી?
આ કેસમાં પ્રમોદ શંકર પાંડે, ઓપરેશન મેનેજર, નવી દિલ્હી, પંકજકુમાર મિશ્રા, ઓપરેશન મેનેજર, નવી દિલ્હી, રાજીવભાઈ શુક્લા, રહે. વટવા, અમદાવાદ અને જયેશકુમાર ચૌધરી, રહે. ઈડર સામે કાયદેસરની કાર્યવાહી કરવામાં આવી છે.

ઓફિસ અને હોટેલમાંથી ₹21.57 લાખ રોકડા જપ્ત
લાંચના છટકા બાદ ACBએ સિક્યોરિટી કંપનીની ઓફિસમાં તપાસ હાથ ધરી હતી. તપાસ દરમિયાન ઓફિસના ટેબલના ખાનામાંથી ₹2.29 લાખ રોકડા મળી આવ્યા હતા. ત્યારબાદ બંને ઓપરેશન મેનેજર જ્યાં રોકાયા હતા તે હોટેલમાં પણ તપાસ કરવામાં આવી હતી. હોટેલના રૂમમાં રાખેલી બેગમાંથી વધુ ₹19,29,900 રોકડા મળી આવ્યા હતા. આમ, ACBએ ઓફિસ અને હોટેલમાંથી કુલ ₹21,57,900 રોકડા જપ્ત કર્યા છે.

હવે ACBની તપાસ કઈ દિશામાં?
ACB હવે જપ્ત કરાયેલી રોકડ રકમના સ્ત્રોત તેમજ ESIC હોસ્પિટલમાં કરાર આધારિત નોકરી અપાવવાના નામે કથિત લાંચ માંગવાના સમગ્ર નેટવર્ક અંગે તપાસ કરી રહી છે. આ કેસમાં અન્ય કોઈ વ્યક્તિની સંડોવણી છે કે કેમ તે અંગે પણ તપાસ થઈ રહી છે. 1064 હેલ્પલાઇન પર મળેલી ફરિયાદ બાદ થયેલી ACBની આ કાર્યવાહીથી અમદાવાદમાં નોકરીના નામે લાંચ માંગવાના આક્ષેપો ફરી ચર્ચામાં આવ્યા છે. સમગ્ર કેસમાં ACBની વધુ તપાસ ચાલી રહી છે.