Agra Bathroom Murder Mystery: ઉત્તર પ્રદેશના આગ્રા શહેરમાંથી એક એવી ચોંકાવનારી અને કાળજું કંપાવી દેનારી ઘટના સામે આવી છે, જેણે પોલીસ તંત્ર અને સ્થાનિક લોકોને સ્તબ્ધ કરી દીધા છે. બોલિવૂડ ફિલ્મ &lsquo;દ્રશ્યમ્&rsquo;ની નકલ કરીને એક પત્નીએ પોતાના જ પતિની ઘાતકી હત્યા કરી નાખી હતી. એટલું જ નહીં, પુરાવાનો નાશ કરવા માટે તેણે પતિની લાશને ઘરના જ બાથરૂમમાં ખાડો ખોદીને દાટી દીધી અને તેની ઉપર પાકું ફ્લોરિંગ કરાવીને નવી ટાઇલ્સ લગાડી દીધી હતી. હદ તો ત્યાં થઈ ગઈ કે મહિલા તે જ બાથરૂમનો રોજિંદા જીવનમાં ઉપયોગ પણ કરતી રહી અને 45 દિવસ સુધી પોલીસ તેમજ પરિવારને આંગળીના વેઢે નચાવી ગેરમાર્ગે દોરતી રહી. આખરે સ્માર્ટ પોલીસ ઇન્વેસ્ટિગેશન અને કૌટુંબિક દબાણ સામે પત્ની ભાંગી પડી અને આ ખોફનાક રહસ્ય પરથી પડદો ઊંચકાયો હતો.
18 મેથી સુરેન્દ્ર શર્માનું રહસ્યમય ગુમ થવું આ ચકચારી ઘટના આગ્રાના સિકંદરા પોલીસ સ્ટેશન વિસ્તાર હેઠળની પ્રાચી ટાવર ચોકી વિસ્તારમાં આવેલી રેણુકા ધામ કોલોનીની છે. મૂળ રાજસ્થાનના ભરતપુરના વતની 44 વર્ષીય સુરેન્દ્ર કુમાર શર્મા અહીં પોતાની પત્ની રૂબી, બે દીકરીઓ રિદ્ધિ (13 વર્ષ) અને સિદ્ધિ (9 વર્ષ) તેમજ વૃદ્ધ માતા કમલા સાથે રહેતા હતા. સુરેન્દ્રના પિતા રાધેશ્યામ શર્મા વ્યવસાયે શિક્ષક હતા, જેમનું થોડા વર્ષો પહેલા અવસાન થયું હતું. સુરેન્દ્ર શર્મા ગત 18 મેથી અચાનક ગુમ થઈ ગયા હતા. પરિવારજનો અને સગા-સંબંધીઓ સતત તેમની શોધખોળ કરી રહ્યા હતા પરંતુ કોઈ ભાળ મળતી નહોતી. આ દરમિયાન સુરેન્દ્રની પત્ની રૂબી અત્યંત સામાન્ય વર્તન રાખીને લોકોને અને પાડોશીઓને એવું જ કહેતી રહી કે, તેના પતિ કોઈ કામ અર્થે બહાર ગયા છે અને 2-3 દિવસમાં પાછા આવી જશે. જ્યારે લાંબા સમય સુધી સુરેન્દ્રનો કોઈ પત્તો ન લાગ્યો ત્યારે છેવટે 26 મેના રોજ પરિવાર દ્વારા સિકંદરા પોલીસ સ્ટેશનમાં તેમના ગુમ થયાની સત્તાવાર ફરિયાદ નોંધાવવામાં આવી હતી.
હત્યાનો માસ્ટર પ્લાન: ખીરમાં ઝેર આપી બાળકો અને સાસુને હટાવ્યા પોલીસ કસ્ટડીમાં આરોપી પત્ની રૂબીએ જે કબૂલાત કરી છે તે કોઈ પ્રોફેશનલ ગુનેગારને પણ આંટી મારે તેવી છે. રૂબી ઉત્તર પ્રદેશના ઇટાવાની વતની છે અને તેના લગ્ન વર્ષ 2010માં સુરેન્દ્ર સાથે થયા હતા. પૂછપરછ દરમિયાન તેણે જણાવ્યું કે, તેનો પતિ સુરેન્દ્ર દારૂ પીવાનો ભારે બંધાણી હતો અને દારૂના નશામાં તે અવારનવાર તેની સાથે નિર્દયતાથી મારપીટ કરતો હતો. રોજ-રોજના આ શારીરિક અને માનસિક ત્રાસથી કંટાળીને રૂબીએ પતિને કાયમ માટે રસ્તામાંથી હટાવવાનો ખતરનાક પ્લાન ઘડી કાઢ્યો. 17 મેની રાત્રે રૂબીએ ઘરમાં મીઠી ખીર બનાવી હતી. આ ખીરમાં તેણે ખૂબ જ આયોજનબદ્ધ રીતે 18 થી વધુ ઊંઘની ગોળીઓ વાટીને ભેળવી દીધી. આ ઝેરી ખીર ખાધા બાદ સુરેન્દ્ર ગાઢ નિંદ્રામાં સરી પડ્યો અને 18 મેની સવારે તે બેડ પર જ મૃત હાલતમાં મળી આવ્યો. પતિનું મોત થયાની ખાતરી થતાં જ રૂબીએ ઓપરેશનનો બીજો ભાગ શરૂ કર્યો. સવારે 9 થી 10 વાગ્યાની આસપાસ તેણે ભરતપુરમાં રહેતા પોતાના જેઠ (સુરેન્દ્રના મોટા ભાઈ) અનિલ શર્માને ફોન કર્યો. રૂબીએ ગભરાયેલા અવાજે ફોન પર કહ્યું, "ઘરમાં પોલીસનો કોઈ મોટો કેસ થઈ ગયો છે, તમે તાત્કાલિક આગ્રા આવીને મમ્મી અને બંને બાળકોને અહીંથી લઈ જાવ."&nbsp;જ્યારે અનિલે વિગત પૂછવાનો પ્રયત્ન કર્યો ત્યારે રૂબીએ કંઈ પણ ન બોલીને માત્ર એટલું જ કહ્યું કે, તમે ઘર સુધી ન આવતા, મેં ત્રણેયને નજીકની એક દુકાને બેસાડ્યા છે ત્યાંથી લઈને સીધા રાજસ્થાન જતા રહો. અનિલ શર્મા તાત્કાલિક આગ્રા પહોંચ્યા અને પોતાની ભત્રીજીઓ તેમજ ઓછું જોઈ શકતા વૃદ્ધ માતાને લઈને ભરતપુર રવાના થયા. તેઓ હજુ રસ્તામાં જ હતા ત્યાં રૂબીનો ફરી ફોન આવ્યો કે, સુરેન્દ્ર ઘરમાં જબરદસ્તીથી તાળું તોડી, ઝઘડો કરીને કબાટમાંથી 5 હજાર રૂપિયા રોકડા લઈને ક્યાંક ભાગી ગયો છે અને તે 2-3 દિવસમાં ફોન કરશે.
એકલી મહિલાએ 40 મિનિટ સુધી ખાડો ખોદી લાશ દાટી દીધી ઘરમાંથી બાળકો અને સાસુ દૂર થતાં જ રૂબી પાસે ગુનો છુપાવવા માટે મોકળું મેદાન મળી ગયું. તેણે રૂમમાંથી પતિના ભારેખમ મૃતદેહને એકલીએ જ ઘસડીને બાથરૂમ સુધી પહોંચાડ્યો. ત્યારબાદ બાથરૂમની અંદર પાવડા વડે ઊંડો ખાડો ખોદવાનું શરૂ કર્યું. અંદાજે 40 મિનિટની સખત મહેનત બાદ તેણે ખાડો તૈયાર કર્યો અને સુરેન્દ્રની લાશને તેમાં નાખીને ઉપર માટીનું પ્લાસ્ટરિંગ કરી દીધું. આગલા દિવસે એટલે કે 19 મેના રોજ રૂબીએ ફરીથી જેઠ અનિલ શર્માને ફોન કરીને કહ્યું કે, "અહીં એકલી હોવાથી મારું મન લાગતું નથી, મને પણ રાજસ્થાન લઈ જાવ." અનિલ ફરીથી આગ્રા આવ્યો અને રૂબીને પણ પોતાની સાથે ભરતપુર લઈ ગયો. રૂબી તેના બાળકો સાથે અંદાજે 7 થી 8 દિવસ સુધી પોતાના સાસરે રહી જેથી કોઈને તેના પર જરાય શંકા ન જાય. આ 8 દિવસના ગાળા બાદ તે ફરીથી આગ્રાના ઘરે પરત ફરી. ઘરે આવતાની સાથે જ તેણે વ્યાવસાયિક મજૂરો અને કડિયાને બોલાવીને બાથરૂમમાં જે જગ્યાએ લાશ દાટી હતી તેની ઉપર પાકું સિમેન્ટ કોંક્રીટનું ફ્લોરિંગ કરાવીને નવી ચમકતી ટાઇલ્સ ફિટ કરાવી દીધી, જેથી હત્યાના તમામ પુરાવા કાયમ માટે જમીનની અંદર દફન થઈ જાય.
પોલીસ સાથે જોતી રહી CCTV, જેઠની ચતુરાઈથી પોપટની જેમ બોલી ફરિયાદ નોંધાયા બાદ સિકંદરા પોલીસ જ્યારે પણ તપાસ માટે રેણુકા ધામ કોલોનીમાં આવતી, ત્યારે રૂબી પોલીસ અધિકારીઓની સાથે ઉભા રહીને આસપાસના વિસ્તારના CCTV ફૂટેજ ચેક કરાવતી હતી. તે પોલીસની સામે જ પોતાના પતિને યાદ કરીને ચોધાર આંસુએ રડવાનો ઢોંગ કરતી હતી, જેથી પોલીસને લાગે કે તે એક લાચાર અને પીડિત પત્ની છે. પરંતુ તેના આ અતિશય નાટકીય વર્તનના લીધે જ તેના મોટા ભાઈ અનિલ શર્માને રૂબી પર શંકા જવાની શરૂ થઈ ગઈ હતી. શુક્રવારે સવારે અનિલ શર્માએ એક મોટો જુગાર રમ્યો. તેણે રૂબીને એકાંતમાં બોલાવીને ખૂબ જ પ્રેમથી અને સહાનુભૂતિપૂર્વક સમજાવતા કહ્યું, "જો રૂબી, તારા આ રીતે રોજ રડવાથી આપણી મુશ્કેલીઓ દૂર થવાની નથી. મને તારા પર પૂરો ભરોસો છે. જો તારાથી કોઈ ભૂલ થઈ ગઈ હોય અથવા તું કોઈ મોટી મુશ્કેલીમાં ફસાઈ ગઈ હોય તો મને અત્યારે જ સાચેસાચું કહી દે. હું તારો જેઠ છું અને વચન આપું છું કે હું તને ગમે તેમ કરીને બચાવી લઈશ, તારા પર કોઈ આંચ આવવા નહીં દઉં." જેઠના આ દિલાસાભર્યા શબ્દો સાંભળીને પાપના બોજ હેઠળ દબાયેલી રૂબી પીગળી ગઈ અને તેણે રડતા રડતા સ્વીકારી લીધું કે તેણે જ સુરેન્દ્રને મારીને બાથરૂમમાં દાટી દીધો છે.
ફ્લોર તોડતા જ મળ્યું હાડપિંજર આ ભયાનક સત્ય સામે આવતા જ અનિલ શર્માના પગ નીચેથી જમીન સરકી ગઈ હતી. તેમણે શુક્રવારે બપોરે અંદાજે 12 વાગ્યે તાત્કાલિક સિકંદરા પોલીસને આ અંગે સત્તાવાર જાણ કરી. ગુનાની ગંભીરતા જોઈને ACP અમીષા પટેલ પોલીસ કાફલા અને 5 મજૂરો સાથે ઘટનાસ્થળે દોડી આવ્યા હતા. પોલીસે બાથરૂમ સીલ કરીને મજૂરો પાસે ટાઇલ્સ તોડવાનું કામ શરૂ કરાવ્યું. માત્ર 20 મિનિટના ખોદકામ બાદ જમીનની અંદરથી ભયાનક દુર્ગંધ આવવા લાગી હતી.&nbsp;
5 સભ્યોની ફોરેન્સિક ટીમ તપાસ કરશે 45 દિવસ જેટલો લાંબો સમય થઈ ગયો હોવાથી સુરેન્દ્ર શર્માની લાશ સંપૂર્ણપણે સડી ગઈ હતી અને માંસ ગળી જવાથી ત્યાં માત્ર હાડપિંજર જ બચ્યું હતું. લાશની આ સ્થિતિને કારણે શુક્રવારે તેનું સામાન્ય પોસ્ટમોર્ટમ કરવું શક્ય નહોતું. એસીપીએ જણાવ્યું કે, શનિવારે આ હાડપિંજરની વિસ્તૃત વૈજ્ઞાનિક અને ફોરેન્સિક તપાસ કરવામાં આવશે, જેના માટે 5 તજજ્ઞ સભ્યોની વિશેષ પેનલ બનાવવામાં આવી છે. હાલમાં પોલીસે હત્યારી પત્ની રૂબીને કસ્ટડીમાં લઈ લીધી છે. પોલીસ એ દિશામાં પણ ઊંડાણપૂર્વક તપાસ કરી રહી છે કે, આટલા મોટા કાવતરામાં, ઊંઘની ગોળીઓ લાવવામાં અને ફ્લોરિંગના કામમાં પત્ની સિવાય અન્ય કોઈ બહારની વ્યક્તિ કે કોઈ પ્રેમીની સંડોવણી છે કે કેમ. આ કમકમાટીભરી ઘટનાથી સમગ્ર આગ્રા પંથકમાં ભારે સનસનાટી મચી ગઈ છે.

પતિની હત્યા કરી લાશ બાથરૂમમાં દાટી, ઉપર ટાઇલ્સ લગાવી 45 દિવસ સુધી નાટક કર્યું

July 4, 2026 | 12:25 IST