નકલી દસ્તાવેજ બનાવી રહેતો અફધાનીસ્તાની ઝડપાયો

સુરત શહેર ક્રાઇમ બ્રાન્ચે એક ગંભીર ગુનો નોંધ્યો છે, જેમાં મૂળ અફઘાનિસ્તાનના એક નાગરિકે નકલી જન્મ પ્રમાણપત્રના આધારે ખોટી રીતે ભારતીય નાગરિકતા સ્થાપિત કરવાનો પ્રયાસ કર્યો હતો. ક્રાઈમ બ્રાન્ચે આરોપી મોહમદ આમીર જાવીદ ખાનની ધરપકડ કરી છે.

કૌભાંડનો પર્દાફાશ

શ્રમ અધિકારીની કાર્યવાહી બાદ આ સમગ્ર કૌભાંડનો પર્દાફાશ થયો હતો. તપાસમાં સામે આવ્યું કે મોહમદ આમીર જાવીદ ખાને બોગસ જન્મ પ્રમાણપત્રના આધારે ભારતીય પાસપોર્ટ, આધાર કાર્ડ, પાન કાર્ડ અને ચૂંટણી કાર્ડ જેવા મહત્ત્વના સરકારી દસ્તાવેજો મેળવ્યા હતા.

આ આરોપી અને તેના વોન્ટેડ સાગરીત અગજાન વિરુદ્ધ ભારતીય ન્યાય સંહિતાની સંબંધિત કલમો અને ભારતીય પાસપોર્ટ એક્ટ-1967ની કલમ 12(1) હેઠળ ગુનો દાખલ કરવામાં આવ્યો છે.

મુસાફરી અને ધંધાકીય જોડાણ

તપાસમાં બહાર આવ્યું છે કે મોહમદ આમીર જાવીદ ખાન લગભગ એક વર્ષ પહેલા તેના પરિવાર સાથે સુરત આવ્યો હતો. તેણે આ ખોટા ભારતીય પાસપોર્ટનો ઉપયોગ કરીને યુએઈ (UAE) અને અફઘાનિસ્તાનની મુસાફરી પણ કરી હતી.

આરોપી સુરતમાં કાપડનો ધંધો કરતો હતો. તે હોલસેલ માર્કેટમાંથી કાપડ ખરીદીને દેશના અલગ-અલગ રાજ્યોમાં વેચતો હતો.

 તપાસનો વ્યાપ

ક્રાઇમ બ્રાન્ચ હાલમાં આરોપીએ તેના બોગસ દસ્તાવેજો મહારાષ્ટ્રમાંથી કેવી રીતે બનાવ્યા, તે અંગે સઘન તપાસ કરી રહી છે. તેમજ આરોપી સુરતમાં શા માટે રહેવા માટે આવ્યો અને તેના આ કાવતરા પાછળનો મુખ્ય ઉદ્દેશ શું હતો, તે અંગે વધુ તપાસ ચાલી રહી છે.