સુરતમાં AAPના રાજકીય હવાલા કૌભાંડનો પર્દાફાશ

સુરતમાં સ્થાનિક સ્વરાજ્યની ચૂંટણી પહેલાં મોટા હવાલા કૌભાંડનો ખુલાસો થતાં રાજકીય વર્તુળોમાં ચકચાર મચી ગઈ છે. મહીધરપુરા વિસ્તારમાં આવેલી એક આંગડિયા પેઢી મારફતે દિલ્હીથી લાખો રૂપિયાનું ફંડ સુરત પહોંચાડવામાં આવ્યું હોવાની વિગતો સામે આવી છે. પ્રાથમિક તપાસ મુજબ આ રકમ ચૂંટણીલક્ષી પ્રવૃત્તિઓ માટે વપરાઈ હોવાની આશંકા વ્યક્ત કરવામાં આવી રહી છે.

તપાસ દરમિયાન જાણવા મળ્યું છે કે, છેલ્લા કેટલાક મહિનાઓ દરમિયાન દિલ્હીથી નિયમિત રીતે રોકડ રકમ મોકલવામાં આવતી હતી. મોકલનાર વ્યક્તિએ પોતાની ઓળખ પનીરના વેપારી તરીકે આપી હતી. આ રકમ સુરતમાં એક વ્યક્તિ દ્વારા સ્વીકારવામાં આવતી હતી. જેનો સંબંધ રાજકીય પ્રવૃત્તિઓ સાથે જોડાયો હોવાનું કહેવામાં આવે છે.

પોલીસે આંગડિયા પેઢીના સીસીટીવી ફૂટેજ કબજે કર્યા છે. જેમાં કેટલાક લોકો રોકડ રકમ લેતા દેખાઈ રહ્યા છે. આ ફૂટેજ તપાસ માટે મહત્વપૂર્ણ પુરાવા તરીકે સામે આવ્યા છે. આ સાથે જ પેઢીના હિસાબી રેકોર્ડ્સ અને વ્યવહારોની પણ તપાસ શરૂ કરવામાં આવી છે.

મહીધરપુરા વિસ્તારમાં આવેલી અરવિંદભાઈ હિરેનભાઈ આંગડિયા પેઢી મારફતે છેલ્લા ચાર મહિનામાં સવા કરોડ રૂપિયા જેટલી માતબર રકમ દિલ્હીથી સુરત મોકલવામાં આવી હોવાનું પ્રકાશમાં આવ્યું છે. આ સમગ્ર પોલિટિક્સ હવાલા કાંડનો માસ્ટર માઈન્ડ દિલ્હીનો હિમાંશુ પાહુજા હોવાનું સામે આવ્યું છે.

હિમાંશુ પોતે આમ આદમી પાર્ટીનો નેતા હોવા છતાં આંગડિયા પેઢીમાં પોતાની ઓળખ એક 'પનીરના વેપારી' તરીકે આપતો હતો. આ રકમ સુરતમાં દિલ્હીના પૂર્વ આરોગ્ય મંત્રી સત્યેન્દ્ર જૈનનો PA રહી ચૂકેલા આકાશ મિશ્રા દ્વારા મેળવવામાં આવતી હતી. જેના સીસીટીવી ફૂટેજ પોલીસે મેળવી લીધા છે.

મહીધરપુરાની અરવિંદભાઈ હિરેનભાઈ આંગડિયા પેઢીના સંચાલક અલ્પેશ પટેલે ખુલાસો કરતા કહ્યું કે, દિલ્હીથી હિમાંશુ નામનો વ્યક્તિ છેલ્લા ત્રણ-ચાર મહિનાથી નિયમિત રીતે પેમેન્ટ મોકલતો હતો હિમાંશુ આંગડિયા પેઢીમાં પોતાની ઓળખ પનીરના વેપારી તરીકે આપતો હતો. પરંતુ આ નાણાંનો અસલી હેતુ રહસ્યમય હતો. આ રોકડ રકમ લેવા માટે પૂર્વ મંત્રીનો PA આકાશ મિશ્રા પોતે દર મહિને આંગડિયા પેઢી પર આવતો હતો. અત્યાર સુધીમાં 80થી 90 લાખ રૂપિયા મોકલવામાં આવ્યા છે. જેની છેલ્લી ડિલિવરી 10 એપ્રિલે લેવામાં આવી હતી.

તપાસમાં બહાર આવેલી વિગતો મુજબ દિલ્હીમાં બેઠેલો હિમાંશુ પાહુજા આંગડિયા પેઢીનો રેગ્યુલર કસ્ટમર હતો. આંગડિયા પેઢીના સંચાલક અલ્પેશ પટેલના જણાવ્યા અનુસાર હિમાંશુએ તેમને વિશ્વાસમાં લીધા હતાં કે દિલ્હીમાં તેની પનીર બનાવવાની મોટી ફેક્ટરી અને દુકાન છે. આ વેપારના બહાને તે નિયમિત અંતરે સુરત પેમેન્ટ મોકલતો હતો. જો કે, પડદા પાછળની સત્યતા કંઈક અલગ હતી. પનીરના વેપારના નામે મોકલવામાં આવતા લાખો રૂપિયા વાસ્તવમાં ચૂંટણીલક્ષી પ્રચાર અને અન્ય ગુપ્ત રાજકીય ગતિવિધિઓ માટે વપરાતા હોવાની આશંકા છે.

આ હવાલા કૌભાંડમાં સુરતનું કનેક્શન પીપલોદ સાથે જોડાયેલું છે. દિલ્હીથી મોકલવામાં આવેલા નાણાં મેળવવા માટે આકાશ મિશ્રા નામનો યુવક આંગડિયા પેઢી પર આવતો હતો. આકાશ મિશ્રા દિલ્હીના પૂર્વ આરોગ્ય મંત્રી સત્યેન્દ્ર જૈનનો PA રહી ચૂક્યો છે. આકાશ છેલ્લા ચાર મહિનામાં અનેકવાર આંગડિયા પેઢી પર રૂબરૂ આવીને રોકડ રકમ લઈ ગયો હતો. તેની સાથે અજય તિવારી નામનો અન્ય એક સક્રિય કાર્યકર પણ સામેલ હતો. બંને યુવકો મૂળ પરપ્રાંતીય છે. પરંતુ વર્ષોથી સુરતમાં સ્થાયી થઈ રાજકીય રીતે સક્રિય છે.

સમગ્ર મામલામાં સૌથી મોટો વળાંક ત્યારે આવ્યો જ્યારે 10 એપ્રિલના સીસીટીવી ફૂટેજ વાયરલ થયા. આ ફૂટેજમાં આકાશ મિશ્રા અને અજય તિવારી આંગડિયા પેઢીમાંથી નાણાં રિસિવ કરતા સ્પષ્ટપણે જોઈ શકાય છે. પોલીસ તપાસમાં આંગડિયા પેઢીના માલિકે કબૂલાત કરી છે કે, છેલ્લા ત્રણ-ચાર મહિનામાં આશરે 80 થી 90 લાખ રૂપિયા આકાશ મિશ્રાને હેન્ડઓવર કરવામાં આવ્યા છે. પોલીસે સીસીટીવી ફૂટેજ અને આંગડિયા પેઢીના ચોપડાઓના આધારે તપાસ તેજ કરી છે.

ક્રાઈમ બ્રાંચ અને ઉમરા પોલીસની પ્રાથમિક તપાસમાં એવું બહાર આવ્યું છે કે આ ફંડિંગ ખાસ કરીને આગામી ચૂંટણીઓના પ્રચાર-પ્રસાર અને કાર્યકર્તાઓના નેટવર્કને મજબૂત કરવા માટે મોકલવામાં આવ્યું હતું. આ વ્યવહાર કાયદેસરનો હતો તો તેને હવાલા અને આંગડિયા મારફતે કેમ કરવામાં આવ્યો? શા માટે હિમાંશુએ પોતાની ઓળખ છુપાવી પનીરનો વેપારી બનવું પડ્યું?

મહીધરપુરા પોલીસ અને અન્ય એજન્સીઓ આંગડિયા પેઢીના સંચાલક અલ્પેશ પટેલની પૂછપરછ કરી છે. નામની એન્ટ્રીઓ, દિલ્હી ઓફિસ સાથે થયેલા સંપર્કો અને વ્યવહારના સમયગાળાની સંપૂર્ણ વિગતો એકત્ર કરી છે. આ ઉપરાંત આકાશ મિશ્રા અને હિમાંશુ પાહુજાના મોબાઈલ લોકેશન અને કોલ ડિટેઈલ્સનું ટેકનિકલ સર્વેલન્સ પણ શરૂ કર્યુ છે. પોલીસને આશંકા છે કે માત્ર એક જ નહીં, પરંતુ અન્ય આંગડિયા પેઢીઓ મારફતે પણ કરોડો રૂપિયા સુરતમાં ઠાલવવામાં આવ્યા હોઈ શકે છે.

આ હવાલા કૌભાંડ માત્ર આકાશ મિશ્રા કે હિમાંશુ સુધી સીમિત નથી. પોલીસ માની રહી છે કે આ એક મોટા સિન્ડિકેટનો ભાગ છે. દિલ્હીથી ગુજરાત સુધી ફેલાયેલા આ નેટવર્કમાં અનેક 'સફેદપોશ' ચહેરાઓ સામેલ હોવાની પૂરેપૂરી શક્યતા છે. સુરત પોલીસે ઇન્કમટેક્સ વિભાગને પણ જાણ કરી હોવાથી આગામી દિવસોમાં નાણાકીય ગેરરીતિના મોટા ખુલાસા થવાની સંભાવના છે.