રાજકોટમાં સમાધાન માટે બોલાવી કરી યુવકનીકરૂણ હત્યા

રાજકોટ શહેરના ધમધમતા ૧૫૦ ફૂટ રિંગ રોડ પર રવિવારની રાત્રે કાયદો અને વ્યવસ્થાના લીરેલીરા ઉડાવતી એક ભયાનક ઘટના સામે આવી છે. જૂની અદાવતનું સમાધાન કરવા ગયેલા ૨૮ વર્ષીય ભાવેશ વાણવી નામના યુવકને છ જેટલા શખ્સોએ ઘેરી લીધો હતો અને કુહાડી, ધારિયા તેમજ પાઈપ જેવા જીવલેણ હથિયારો વડે બેરહેમીથી માર મારીને મોતને ઘાટ ઉતારી દીધો છે. આ હત્યા એટલી ક્રૂર હતી કે મૃતકના પરિવારજનોના જણાવ્યા અનુસાર, હુમલાખોરોએ તેના શરીરનું એક પણ અંગ અકબંધ રહેવા દીધું નથી. આ ઘટનાને પગલે સમગ્ર રાજકોટમાં ભારે ચકચાર મચી ગઈ છે અને દલિત સમાજના આગેવાનો સિવિલ હોસ્પિટલ ખાતે ઉમટી પડ્યા છે.

શું હતી સમગ્ર ઘટના?

નર્સિંગ વ્યવસાય સાથે સંકળાયેલા રાહુલ પરમાર દ્વારા નોંધાવવામાં આવેલી ફરિયાદ મુજબ, રવિવારે રાત્રે તે તેના મિત્રો ભાવેશ વાણવી અને પ્રિન્સ વાણવી સાથે રૈયા રોડ પર સોપાન હાઈટ્સ પાસે બેઠા હતા. ત્યારબાદ તેઓ ઘરે જમવા માટે નીકળ્યા હતા. જ્યારે તેઓ ડ્રીમ સિટીની સામે પહોંચ્યા, ત્યારે અચાનક પાછળથી સ્વીફ્ટ કાર અને બાઈક પર આવેલા ૪ થી ૫ શખ્સોએ તેમને આંતર્યા હતા.

હુમલાખોરોએ લાકડી, ધારિયા અને કુહાડી વડે ભાવેશ પર તૂટી પડ્યા હતા. આ હુમલામાં પ્રિન્સને પણ માથાના ભાગે ગંભીર ઈજાઓ પહોંચી હતી. રાહુલ ડરના માર્યા બાજુમાં ખસી ગયો હતો. હુમલાખોરો ગંભીર રીતે ઇજાગ્રસ્ત ભાવેશને પોતાની કારમાં બેસાડીને ઉઠાવી ગયા હતા અને રસ્તામાં લોહીલુહાણ હાલતમાં ફેંકીને ફરાર થઈ ગયા હતા. સારવાર દરમિયાન ભાવેશે દમ તોડી દીધો હતો.

સમાધાનના બહાને બોલાવીને વિશ્વાસઘાત કર્યો

મૃતક ભાવેશની માતા ગીતાબેને રડતા રડતા આક્ષેપ કર્યો છે કે, હુમલાખોરોએ તેના દીકરા સાથે છેતરપિંડી કરી હતી. ભાવેશ ૨ લાખ રૂપિયા લઈને સમાધાન માટે ગયો હતો. અગાઉ થયેલા કોઈ વિવાદ કે વીડિયોના મામલે હુમલાખોરોએ તેને ધમકાવીને વિશ્વાસમાં લીધો હતો કે જો તે સમાધાન કરશે તો વિવાદ પૂરો થઈ જશે. પરંતુ, ભાવેશ ત્યાં પહોંચતા જ હુમલાખોરોએ તેના પર હથિયારો વડે ઘાતક હુમલો કરી દીધો હતો.

હત્યા પાછળનું કારણ: રસના ચીચોડાની અદાવત

પોલીસ તપાસ અને ઈજાગ્રસ્ત પ્રિન્સના નિવેદન મુજબ, આ હત્યા પાછળ 'રસના ચીચોડા' રાખવા બાબતનો વિવાદ મુખ્ય કારણ છે. હમીર જોગરાણા નામના શખ્સ સાથે ચિચોડો રાખવા બાબતે ભાવેશ વાણવીએ મહાનગરપાલિકામાં અગાઉ અરજી કરી હતી. આ અરજીનો ખાર રાખીને હમીર અને તેના સાથીઓએ ભાવેશને ટાર્ગેટ બનાવ્યો હતો. પ્રાથમિક તપાસમાં એવું પણ જાણવા મળ્યું છે કે મૃતક ભાવેશ પત્રકારત્વના વ્યવસાય સાથે પણ જોડાયેલો હતો.

સમાજમાં રોષ: પોલીસ કમિશનર કચેરીએ શબ લઈ જવાની ચીમકી

આ ઘટના બાદ રાજકોટ સિવિલ હોસ્પિટલ ખાતે અનુસૂચિત જાતિ સમાજના આગેવાનો અને મૃતકના સંબંધીઓ મોટી સંખ્યામાં એકઠા થયા છે. જૂનાગઢ જિલ્લા અનુસૂચિત જાતિ સમાજના પ્રમુખ રાજુ સોલંકી અને સામાજિક આગેવાન માવજીભાઈ રાખસીયાએ આક્રોશ વ્યક્ત કર્યો છે. પરિવારે સ્પષ્ટ શબ્દોમાં જણાવ્યું છે કે, જ્યાં સુધી મુખ્ય આરોપી હમીર ભરવાડ અને તેના સાથીઓ પકડાય નહીં, ત્યાં સુધી તેઓ મૃતદેહ સ્વીકારશે નહીં. જો બપોરે ૩ વાગ્યા સુધીમાં ધરપકડ નહીં થાય, તો મૃતદેહને પોલીસ કમિશનરની કચેરીએ લઈ જવાની ચીમકી પણ ઉચ્ચારવામાં આવી છે.

પોલીસની કાર્યવાહી

DCP ઝોન-૨ રાકેશ દેસાઈએ જણાવ્યું હતું કે, આ મામલે યુનિવર્સિટી પોલીસ મથકમાં હત્યાનો ગુનો દાખલ કરવામાં આવ્યો છે. ગુનેગારોને ઝડપી લેવા માટે ક્રાઈમ બ્રાન્ચ અને સ્થાનિક પોલીસની અલગ-અલગ ટીમો બનાવવામાં આવી છે. હાલમાં શહેરભરમાં નાકાબંધી કરીને આરોપીઓની શોધખોળ હાથ ધરવામાં આવી છે.