માવતર બન્યા કમાવતર!

ગુજરાતીમાં કહેવત છે કે, ‘છોરું કછોરું થાય પણ માવતર કમાવતર ન થાય’  આ કહેવતને અમદાવાદમાં બનેલી ઘટનાએ ઉલટી સાબિત કરી છે. શુક્રવારે બપોરે અમદાવાદનું નિષ્ઠુર દંપતિ 5 વર્ષના બાળકને માર મારી અમદાવાદ-વડોદરા એક્સપ્રેસ વે ઉપર કારમાં વાસદ સુધી લાવી તે સ્થળે ઉતારીને રફુ ચક્કર થઈ ગયુ છે. એક્સપ્રેસ-વે પર જ્યારે આણંદના મોગર પાસે કાર પસાર થઈ રહી હતી ત્યારે બાળકને ચાલુ કારે ઉતારી મૂક્યો હતો. તેના કારણે બાળકના બંને પગમાં ફ્રેક્ચર થઈ ગયુ છે. 

આણંદ સિવિલ હોસ્પિટલમાં સારવાર લઇ રહેલા કનૈયાની માનવતા ચેરીટેબલ ટ્રસ્ટ સંભાળ રાખી રહ્યું છે. હોસ્પિટલમાં સારવાર દરમિયાન બાળકે કાલી ઘેલી ભાષમાં તૂટક તૂટક વાત કરી પોતાની વેદના જણાવી હતી. મારી મમ્મીનું નામ લક્ષ્મી છે. પિતાનુ નામ ઉદય છે. જ્યારે મામાનું નામ શિવમ છે. કનૈયા અમદાવાદમાં સાવકી માતા સાથે ઘણાં સમયથી રહે છે. તેની મમ્મી કયાં રહે છે તેની ખબર નથી. કનૈયા ઘરની બહાર જાય ત્યારે સાવકી માતા ઘરમાં લાવીને દરરોજ માર મારે છે. ઘરમાં કંઇ વસ્તુ પડે તો પણ મને કનૈયાને માર મારતી હતી. ઘરની બહાર જવા દેવાની મનાઈ ફરમાવી હતી. દરરોજ લાકડાંના દંડા વડે કનૈયાને માર મારતી હતી. સવાર સાંજ જમવાનું આપતી હતી. પરંતુ મારે કનૈયાને પસંદ કોઈપણ વસ્તુ લઇ આપતી ન હતી. સાવકી માતા ફરિયાદ કરે તો પપ્પા પણ કનૈયાને માર મારતાં હતા. ગુરૂવારે સવારે પણ સાવકી માતા અને પપ્પાએ લાકડાના દંડા વડે માર માર્યો હતો. 
માર મારવાના કારણે પીડા થતાં કનૈયા રડતો હતો. તેથી મમ્મી-પપ્પા ગુસ્સે થઇ ગયા હતા. શુક્રવારે બપોરે કારમાં બેસાડી વાસદ લઇ આવ્યાં હતા. રસ્તામાં પણ કારમાં માર માર્યો હતો. અજાણી જગ્યાએ કનૈયાને કારમાંથી ઉતારી ચાલ્યા ગયા હતા. એક ટેમ્પોવાળા કનૈયાને રોડ પર જોઇને ઉભા રહી ગયા હતા. કોઇને ફોન કર્યા બાદ એમ્બ્યુલન્સ આવી હતી. જેમાં બેસાડીને કનૈયાને હોસ્પિટલમાં સારવાર માટે ખસેડાયો હતો. જ્યાં પોલીસને જાણ કરતાં પોલીસે કનૈયાની પૂછપરછ કરી હતી. પૂછપરછ દરમિયાન કનૈયાએ માતા- પિતા મારતા હોવાથી ઘેર પરત જવાનો ઈન્કાર કર્યો હતો. 

આણંદનું માનવતા ચેરીટેબલ ટ્રસ્ટ કનૈયાની પડખે ઉભું રહ્યું

આણંદનું માનવતા ચેરીટેબલ ટ્રસ્ટ ભૂખ્યાને ભોજન અને નિરાધારોને આશ્રય આપવાની સેવા આપે છે. માનવતા ચેરીટેબલ ટ્રસ્ટના શકીલભાઇને જાણ થતાં તેઓ આણંદ સિવિલ હોસ્પિટલમાં પહોંચી ગયા હતા. બાળકની સાથે રહી કનૈયાની સારવાર તેમજ ખાવાપીવા સહિતની વ્યવસ્થા કરી આપી છે. બાળકની વારંવાર પૂછપરછ કરી માતા-પિતાની ભાળ મેળવવાનો પ્રયાસ હાથ ધર્યો છે.

પોલીસે ઘાટલોડિયા ચોકડી સુધીના સીસીટીવી ચેક કર્યાં

વાસદ પોલીસે ચિલ્ડ્રન હોમની મદદથી બાળકની પૂછપરછ કરતા તેનું નામ કનૈયો, માતાનું નામ લક્ષ્મી, પિતાનું નામ ઉદય અને મામાનું નામ શિવમ હોવાનું જણાવે છે. પરંતુ અમદાવાદમાં કયાં વિસ્તારમાં રહે છે તે યાદ નથી. તેથી પોલીસે બાળકનું સરનામું શોધવા પ્રયાસ હાથ ધર્યા છે. કનૈયાના કહેવા મુજબ તેના પપ્પાની કાર કાળા રંગની હતી. તેથી પોલીસે તેના માતા-પિતાને શોધી કાઢવા માટે શનિવારે અમદાવાદના ઘાટલોડિયા ચોકડી સુધીના 30 થી વધુ સીસીટીવી કેમેરા ચેક કર્યા હતા. તેમ છતાં હજુ સુધી કોઇ કડી મળી નથી. 

એક અંદાજ મુજબ વર્ષે 100 માતા-પિતા બાળકને ત્યજી દેતા હોય છે

સામાજિક, આર્થિક કે પારિવારિક કારણોને લીધે અમદાવાદમાં વર્ષે સરેરાશ 100 બાળકને તેમના માતા-પિતા કે પરિવારના અન્ય સભ્યો ત્યજી દેતા હોય છે. આવા બાળકોને ટ્રસ્ટ સંચાલિત અનાથ આશ્રમમાં લાવવામાં આવે છે. સમાજ કલ્યાણ વિભાગના આંકડા મુજબ વર્ષે સરેરાશ 22 બાળકને દત્તક લેવામાં આવે છે. બાળકોની તસ્કરી ન થાય કે તેમનું શોષણ ન થાય તે માટે સેન્ટ્રલ એડોપ્શન રિસોર્સ ઓથોરિટી (કારા)એ અત્યંત કડક નિયમ બનાવ્યા છે. રાજ્યના કેટલાક અનાથ આશ્રમમાંથી વિદેશી દંપતિઓએ બાળકો દત્તક લીધાના કિસ્સા નોંધાયા છે.