દાહોદની ખંગેલા ચેકપોસ્ટ પર 1 કરોડની રકમ અને ચાંદીના બિસ્કીટ તથા દાગીના સાથે 3 ઝડપાયા

દાહોદ જિલ્લામાં ચેકપોસ્ટ પર ચેકીંગ કરી રહેલી પોલીસની ટીમે બોલેરો કારની તલાશી લેતાં તેના ચોરખાનામાં સંતાડેલા ચાંદીના બિસ્કીટ અને દાગીના અને મોટી રોકડ રકમ મળી આવી  હતી. પોલીસે કૂલ 2.19 કરોડના મુદ્દામાલ સાથે ગાડીમાં રહેલા 3 શખ્સોને ઝડપી લીધા હતા. આ શખ્સો આટલી મોટી રોકડ રકમ તથા ચાંદીના બિસ્કીટ અને દાગીના ક્યાંથી લઇને આવી રહ્યા હતા અને કોને આપવા જઇ રહ્યા હતા તે સહિતના વિવિધ મુદ્દાઓ પર તપાસ શરુ કરી હતી. 

દાહોદ પોલીસ દ્વારા મળતી માહિતી મુજબ દાહોદ જિલ્લાના પોલીસ અધિકારીઓ દ્વારા ખંગેલા ચેકપોસ્ટ પર વાહન ચેકિંગ કરવામાં આવી રહ્યું હતું. તે સમયે મધ્યપ્રદેશના પાસિંગની  બોલેરો કેમ્પર ગાડી પસાર થઇ હતી જેથી પોલીસે બોલેરોને રોકીને તપાસ કરતાં પોલીસ પણ ચોંકી ઉઠી હતી. પોલીસને ડ્રાઇવર સીટની પાછળ બનાવવામાં આવેલા ચોરખાનામાંથી ચાંદીના બિસ્કીટ અને રોકડ રકમ અને દાગીના મળી આવ્યા હતા.

પોલીસે જપ્ત કરેલા મુદ્દામાલમાં રૂ. 75.60 લાખની કિંમતના 108.459 કિલોગ્રામ વજનના ચાંદીના બિસ્કીટ, રૂ. 1.38 કરોડથી વધુની રોકડ રકમ અને રૂ. 5 લાખની કિંમતની બોલેરો કેમ્પર ગાડીનો સમાવેશ થાય છે. આરોપીઓ પાસેથી કોઈ બિલ કે આધાર પુરાવા મળ્યા નથી અને તેઓએ ગોળ ગોળ જવાબો આપ્યા હતા.

પકડાયેલા આરોપીઓમાં ઉત્તર પ્રદેશના ઝાંસીના વિરેન્દ્રકુમાર રામલાલ શર્મા (ડ્રાઇવર), મનીષકુમાર રામેશ્વર પ્રસાદ ગુપ્તા અને રાજુભાઇ શ્રીકાલીકા પ્રસાદ પટેલનો સમાવેશ થાય છે. પોલીસે ત્રણેય આરોપીઓની ધરપકડ કરીને વધુ તપાસ શરૂ કરી છે.આટલી મોટી રોકડ રકમ અને દાગીના તથા ચાંદીના બિસ્કીટ કોની પાસેથી લાવ્યા હતા અને કોને આપવાના હતા તે સહિતના મુદ્દાઓ પર પોલીસની તપાસ શરુ કરાઇ છે.