અમદાવાદમાં જૂની અદાવતમાં યુવકની ઘાતકી હત્યા

Ranip Murder Case: અમદાવાદના રાણીપ પોલીસ સ્ટેશન વિસ્તારમાં સુભાષબ્રિજ પાસે 15 ઓગસ્ટની મોડી રાત્રે જૂની અદાવતના કારણે યુવકની હત્યાની સનસનાટીભરી ઘટના સામે આવી હતી. સુભાષચંદ્ર બોઝ ચાર રસ્તા પાસે અજય સાલ્વી નામના યુવક પર 10 થી વધુ શખ્સોએ તલવાર, ધારિયા અને છરી જેવા ઘાતક હથિયારો વડે હુમલો કર્યો હતો. ગંભીર રીતે ઘાયલ અજયનું ઘટનાસ્થળે જ મોત નીપજ્યું હતું. સમગ્ર ઘટનાના CCTV ફૂટેજ સામે આવતા પોલીસે આરોપીઓની શોધખોળ તેજ કરી હતી.

મદ્રાસી સમાજના પક્ષમાં ઊભા રહેવાની રંજિશમાં હત્યાનો આરોપ
પ્રાથમિક પોલીસ તપાસમાં હત્યા પાછળ જૂની અંગત અદાવત હોવાનું સામે આવ્યું છે. થોડા દિવસ અગાઉ સ્થાનિક મદ્રાસી સમાજના લોકો અને આરોપીઓ વચ્ચે બોલાચાલી અને ઝઘડો થયો હતો. આ દરમિયાન મૃતક અજય સાલ્વીએ મદ્રાસી સમાજના લોકોનો પક્ષ લીધો હતો. આ બાબતને લઈને આરોપીઓમાં અજય પ્રત્યે રોષ હોવાનું પોલીસ તપાસમાં સામે આવ્યું છે. પોલીસના જણાવ્યા અનુસાર અંકિત પરમાર, સાગર ઉર્ફે માફિયા પરમાર અને વિશાલ ચૌહાણ સહિતના આરોપીઓ અજયને નિશાન બનાવવાની તૈયારીમાં હતા. 15 ઓગસ્ટની મોડી રાત્રે તક મળતાં આરોપીઓએ અન્ય સાગરીતોને સાથે લઈ હત્યાનું કાવતરું ઘડ્યું હોવાનો આરોપ છે.

 

સુભાષબ્રિજ પર સરેઆમ તલવારો ઉછળી! અજય સાલ્વીની હત્યાના CCTV વાયરલ #Ahmedabad #AhmedabadNews #SubhashBridge #MurderCase #CrimeNews #CCTVFootage #GujaratNews #BreakingNews #Benrfitnews24 pic.twitter.com/2ZQsjznXYR

— Benefit News 24 (@BenefitNews24) August 17, 2026

 

પિકઅપ ટેમ્પોમાં હથિયારો લઈને પહોંચ્યા, અજય પર કર્યો હુમલો
ACP ડી. વી. રાણાના જણાવ્યા મુજબ, મુખ્ય આરોપીઓ પોતાના સાથીદારો સાથે રાજસ્થાન પાસિંગના મહિન્દ્રા પિકઅપ ડાલામાં હથિયારો લઈને સુભાષચંદ્ર બોઝ સર્કલ પહોંચ્યા હતા. અજય પોતાના ભાઈ સાથે ત્યાં ઊભો હતો. આરોપીઓ હથિયારો સાથે વાહનમાંથી નીચે ઉતરતાં અજયે બચવા માટે દોડવાનો પ્રયાસ કર્યો હતો. જોકે, દોડતી વખતે અજય રસ્તા પર પડી જતાં આરોપીઓએ તેના પર હુમલો કર્યો હતો. પોલીસના જણાવ્યા મુજબ, તેના પીઠ અને કમરના ભાગે તીક્ષ્ણ હથિયારના અનેક ઘા મારવામાં આવ્યા હતા. ગંભીર ઈજાઓના કારણે અજયનું મોત થયું હતું. હત્યા બાદ આરોપીઓ પિકઅપ ટેમ્પોમાં ફરાર થઈ ગયા હતા.

CCTV ફૂટેજથી પોલીસને મળ્યો મોટો ક્લૂ
હત્યાની જાણ થતાં રાણીપ પોલીસ તાત્કાલિક ઘટનાસ્થળે પહોંચી હતી. ફરિયાદના આધારે હત્યાનો ગુનો નોંધી આરોપીઓને ઝડપી પાડવા માટે પોલીસની અલગ-અલગ ટીમો બનાવવામાં આવી હતી. પોલીસે ઘટનાસ્થળ અને આસપાસના CCTV કેમેરાના ફૂટેજ તપાસ્યા હતા. તેમાં આરોપીઓ પિકઅપ વાહનમાં આવતા અને હુમલા બાદ ફરાર થતા દેખાયા હતા. ટેકનિકલ સર્વેલન્સના આધારે પોલીસે વાહનની હિલચાલ ટ્રેક કરી તપાસ આગળ ધપાવી હતી.

અમદાવાદથી મહેસાણા સુધી નાકાબંધી, છત્રાલ GIDCમાં 8 આરોપી ઝડપાયા
આરોપીઓને ઝડપી પાડવા અમદાવાદ ઉપરાંત મહેસાણા, અરવલ્લી, સાબરકાંઠા અને બનાસકાંઠા તરફ નાકાબંધી કરવામાં આવી હતી. પ્રાંતિજ ટોલનાકા સહિતના હાઇવે પર પણ પોલીસની નજર ગોઠવવામાં આવી હતી. તપાસ દરમિયાન હત્યામાં ઉપયોગમાં લેવાયેલ મહિન્દ્રા પિકઅપ ડાલાનું લોકેશન કડી નજીકના છત્રાલ GIDC વિસ્તારમાં મળ્યું હતું. ત્યારબાદ રાણીપ પોલીસ અને LCBની સંયુક્ત ટીમે એક ગોડાઉન પર દરોડો પાડી ગુનામાં વપરાયેલા વાહન સાથે 8 આરોપીઓને ઝડપી પાડ્યા હતા.

બે સગીર સહિત 8 આરોપીઓ પોલીસના હાથે
પોલીસે બે સગીર સહિત કુલ 8 આરોપીઓને ઝડપી પાડ્યા છે. પકડાયેલા આરોપીઓમાં રાજેશ ભોઈ, સની મકવાણા, મિતેશ પુરબીયા, હેનીલ પરમાર, હર્ષવર્ધન પરમાર અને મુકેશ મકવાણાનો સમાવેશ થાય છે. પોલીસ પૂછપરછમાં આરોપીઓએ મુખ્ય આરોપીઓના કહેવાથી હુમલો કર્યો હોવાની માહિતી આપી હોવાનું સામે આવ્યું છે. પોલીસે તમામ આરોપીઓને રાણીપ પોલીસ સ્ટેશન ખાતે લઈ જઈ વધુ પૂછપરછ શરૂ કરી છે.

મુખ્ય આરોપીઓ હજુ ફરાર, પોલીસની શોધખોળ તેજ
આ કેસમાં અંકિત પીતાંબર પરમાર, સાગર ઉર્ફે માફિયા પરમાર, વિશાલ પરષોત્તમ ચૌહાણ, શિવો, પાર્થ ઉર્ફે પાવડર, લાલો, કૌશિક ઉર્ફે વણઝારા અને સત્યો ઉર્ફે મયુર ઠાકોર સહિતના આરોપીઓ હજુ ફરાર હોવાનું પોલીસ તપાસમાં સામે આવ્યું છે. મુખ્ય આરોપીઓને ઝડપી પાડવા પોલીસની અલગ-અલગ ટીમો દ્વારા સંભવિત સ્થળોએ દરોડા પાડવામાં આવી રહ્યા છે. રાણીપ હત્યા કેસમાં CCTV ફૂટેજ, ટેકનિકલ સર્વેલન્સ અને આરોપીઓની પૂછપરછના આધારે તપાસ આગળ વધી રહી છે.