PhonePe લાવ્યું UPI બાયોમેટ્રિક પેમેન્ટ ફીચર

ડિજિટલ પેમેન્ટ ક્ષેત્રની અગ્રણી કંપની PhonePe એ યુઝર્સના અનુભવને વધુ સરળ અને સુરક્ષિત બનાવવા માટે એક ક્રાંતિકારી ફીચર લોન્ચ કર્યું છે. હવે યુઝર્સ પોતાના સ્માર્ટફોનના ફિંગરપ્રિન્ટ સ્કેનર અથવા ફેશિયલ રિકગ્નિશન (મોઢું જોઈને ઓળખવાની ટેક્નોલોજી) દ્વારા UPI પેમેન્ટ કરી શકશે. આ ફીચર ખાસ કરીને નાના ટ્રાન્ઝેક્શનને ઝડપી બનાવવા માટે તૈયાર કરવામાં આવ્યું છે.

₹5,000 સુધીના પેમેન્ટ માટે PIN થી મુક્તિ : 

નવા અપડેટ મુજબ, જો તમે ₹5,000 સુધીનું પેમેન્ટ કરી રહ્યા છો, તો તમારે 4 અથવા 6 અંકનો PIN દાખલ કરવાની જરૂર રહેશે નહીં. તમે માત્ર ફિંગરપ્રિન્ટ સેન્સર પર આંગળી મૂકીને અથવા ફેસ આઈડી દ્વારા પેમેન્ટને મંજૂરી આપી શકશો. જોકે, સુરક્ષાના કારણોસર ₹5,000 થી વધુની રકમ માટે PIN દાખલ કરવો હજુ પણ ફરજિયાત રહેશે. હાલમાં આ સુવિધા એન્ડ્રોઇડ યુઝર્સ માટે ઉપલબ્ધ છે અને ટૂંક સમયમાં આઈફોન (iOS) યુઝર્સ માટે પણ રજૂ કરવામાં આવશે.

સિક્યોરિટી અને બેકઅપ પ્લાન : 

PhonePe ના જણાવ્યા અનુસાર, બાયોમેટ્રિક ડેટા યુઝરના ફોનમાં જ સુરક્ષિત રહે છે અને તે સર્વર પર સ્ટોર થતો નથી. જો કોઈ કારણસર ફિંગરપ્રિન્ટ કામ ન કરે (જેમ કે પરસેવો અથવા ઓછી લાઈટ), તો યુઝર પાસે તરત જ PIN દાખલ કરીને પેમેન્ટ કરવાનો વિકલ્પ ખુલ્લો રહેશે. આ નવી સિસ્ટમનો ઉપયોગ QR કોડ સ્કેનિંગ, ઓનલાઇન શોપિંગ અને બેંક બેલેન્સ ચેક કરવા માટે પણ કરી શકાશે.

પેમેન્ટ પ્રક્રિયા બનશે વધુ ઝડપી : 

કંપનીના પેમેન્ટ હેડ દીપ અગ્રવાલે જણાવ્યું હતું કે આ સુવિધાનો મુખ્ય હેતુ પેમેન્ટ પ્રોસેસને ઝડપી બનાવવાનો અને ભૂલથી ખોટો PIN નંબરાઈ જવાથી થતા ટ્રાન્ઝેક્શન ફેલ્યોરને ઘટાડવાનો છે. આ ટેક્નોલોજી સિક્યોરિટી અને સરળતાનો બેસ્ટ સમન્વય છે.

આ ફીચર કેવી રીતે એક્ટિવેટ કરવું?

PhonePe એપ ઓપન કરો

તમારી પ્રોફાઇલ સેક્શનમાં જાઓ

'Manage Payments' વિકલ્પ પસંદ કરો

'Biometric Pay' ના વિકલ્પને ઓન કરો