સોના-ચાંદીના ભાવમાં મોટો કડાકો

Gold Silver Price Fall: વૈશ્વિક પ્રવાહો અને આર્થિક ભૌગોલિક તણાવ વચ્ચે સોના અને ચાંદીના ભાવમાં નોંધપાત્ર ઘટાડો જોવા મળ્યો છે. શુક્રવારે મલ્ટી કોમોડિટી એક્સચેન્જ (MCX) પર કિંમતોમાં રેકોર્ડ ઘટાડો થયા બાદ શનિવારે પણ બજાર મિશ્ર અને નીચલા સ્તરે જોવા મળ્યું હતું. આ આર્થિક ફેરફાર એવા સમયે આવ્યો છે જ્યારે વડાપ્રધાન નરેન્દ્ર મોદીએ દેશવાસીઓને ઉર્જા સુરક્ષા અને આર્થિક વ્યવસ્થાપનને ધ્યાનમાં રાખીને સંયમ રાખવા અપીલ કરી હતી. વૈશ્વિક સ્તરે ડૉલરની મજબૂતી અને ક્રૂડ ઓઈલની સ્થિતિ વચ્ચે કિંમતી ધાતુઓના ભાવ નીચે આવ્યા છે.

સ્થાનિક બજારમાં સોના-ચાંદીની વર્તમાન સ્થિતિ
16 મે, શનિવારના રોજ દેશની આર્થિક રાજધાની મુંબઈના હાજર બજારમાં 24 કેરેટ સોનાનો ભાવ પ્રતિ 10 ગ્રામ દીઠ ₹1,59,900 ના સ્તરે પહોંચી ગયો હતો. જ્યારે ઘરેણાં બનાવવા માટે વપરાતા 22 કેરેટ સોનાની કિંમત પ્રતિ 10 ગ્રામ દીઠ ₹1,44,740 નોંધાઈ હતી. વાયદા બજાર (MCX) ની વાત કરીએ તો, 15 મેના રોજ સોનાનો વાયદો 2.18% અથવા ₹3,528 ના જંગી ઘટાડા સાથે ₹1,58,450 પ્રતિ 10 ગ્રામ પર બંધ આવ્યો હતો, જે લાંબા સમય બાદ એક મોટો દૈનિક ઘટાડો દર્શાવે છે.

ચાંદીના ભાવમાં ઐતિહાસિક ગાબડું
સોનાની સરખામણીએ ચાંદીના વાયદા બજારમાં વધુ પ્રચંડ કડાકો જોવા મળ્યો હતો. MCX પર ચાંદીનો વાયદો 6.83% અથવા પ્રતિ કિલોએ સીધો ₹19,876 ગગડીને ₹2,71,226 પ્રતિ કિલોગ્રામ પર બંધ થયો હતો. આંતરરાષ્ટ્રીય બજારમાં પણ ચાંદીના ભાવમાં 9.18% નો ભારે ઘટાડો નોંધાયો હતો અને તે $75.74 પ્રતિ ઔંસના સ્તરે આવી ગઈ હતી. ઔદ્યોગિક માંગમાં નરમ વલણ અને રોકાણકારો દ્વારા પ્રોફિટ બુકિંગના કારણે ચાંદીમાં આ મોટો ઘટાડો જોવા મળ્યો છે.

આંતરરાષ્ટ્રીય સંઘર્ષ અને ક્રૂડ ઓઈલની અસર
વૈશ્વિક બજારમાં સોનાના ભાવ 2.22% ઘટીને ઔંસ દીઠ $4,574 પર પહોંચી ગયા છે. અમેરિકા અને ઈરાન વચ્ચે ચાલી રહેલા સંઘર્ષની શરૂઆત બાદ સોનાના ભાવમાં આવેલો આ સૌથી મોટો ઘટાડો છે. નિષ્ણાતોના મતે, બ્રેન્ટ ક્રૂડ ઓઇલના ભાવ પ્રતિ બેરલ $110 ની નજીક પહોંચવાને કારણે વૈશ્વિક ફુગાવાનું જોખમ વધ્યું છે. આ ઉપરાંત, યુએસ ડોલર ઇન્ડેક્સ મજબૂત થતાં રોકાણકારો સોનામાંથી નાણાં ખેંચી રહ્યા છે. 28 ફેબ્રુઆરીથી શરૂ થયેલા અમેરિકા-ઈરાન સંઘર્ષ બાદથી અત્યાર સુધીમાં સોનાની કિંમતોમાં કુલ 13% જેટલો મોટો ઘટાડો નોંધાઈ ચૂક્યો છે.