બિહારમાં એર ટ્રાફિક વધશે, રાજ્યને મળશે 6 નવા એરપોર્ટ 

બિહારના લોકો માટે ખૂબ જ મોટા સમાચાર સામે આવ્યા છે. જેમાં બિહારને  6 નવા એરપોર્ટ મળશે. મુખ્યમંત્રી નીતિશ કુમારના નેતૃત્વ હેઠળની કેબિનેટે રાજ્યના ઉડ્ડયન નિયામક અને એરપોર્ટ ઓથોરિટી ઓફ ઈન્ડિયા (AAI) વચ્ચે એરપોર્ટ વિકસાવવા માટે સમજૂતી કરાર (MoU) પર હસ્તાક્ષર કરવા માટે મંજૂરી આપી હતી. 

કેન્દ્રની પ્રાદેશિક કનેક્ટિવિટી યોજના 'UDAN' હેઠળ મધુબની, સુપૌલમાં બીરપુર, મુંગેર, બેતિયામાં વાલ્મીકી નગર, મુઝફ્ફરપુર અને સહરસામાં નવા એરપોર્ટ વિકસાવવામાં આવશે.  એરપોર્ટ વિકાસ માટે કુલ ૧૫૦ કરોડ રૂપિયા ફાળવવામાં આવ્યા છે જેમાં દરેક એરપોર્ટના વિકાસ માટે 25 કરોડ રૂપિયાનો સમાવેશ થાય છે. 

હાલમાં બિહારમાં કુલ 3 એરપોર્ટ કાર્યરત છે. જેમાંથી 1 આંતરરાષ્ટ્રીય અને 2 ડોમેસ્ટિક એરપોર્ટ છે. જયપ્રકાશ નારાયણ આંતરરાષ્ટ્રીય એરપોર્ટ છે જે પટણામાં આવેલું છે જ્યારે 2 ડોમેસ્ટિક એરપોર્ટ ગયા અને દરભંગામાં આવેલા છે. રાજ્યમાં વિધાનસભાની ચૂંટણીને થોડા મહિના બાકી રહ્યા છે ત્યારે આ નિર્ણય લેવામાં આવ્યો છે. 

નવીનતમ 6 એરપોર્ટ ઉપરાંત પટણામાં ઇન્કમ ટેક્સ ગોલમ્બર નજીક ફાઇવ-સ્ટાર હોટલના નિર્માણ માટે કુમાર ઇન્ફ્રાટ્રેડ એન્ટરપ્રાઇઝ લિમિટેડને લેટર ઓફ એવોર્ડ (LoA)જારી કરવાના નિર્માણ માટે પણ મંજૂરી આપી છે.