એશિયા કપ મહાસંગ્રામ પહેલા જ તણાવ ઉછળ્યો

એશિયા કપમાં 14 સપ્ટેમ્બરે ભારત અને પાકિસ્તાન વચ્ચેની હાઈ-વોલ્ટેજ મેચ પહેલાં જ, પાકિસ્તાનના પૂર્વ ક્રિકેટર શાહિદ આફ્રિદીએ વધુ એકવાર ભારતીય ખેલાડીઓ સામે શાબ્દિક પ્રહાર કર્યો છે.

આફ્રિદીનો આ ગુસ્સો તાજેતરમાં વર્લ્ડ ચેમ્પિયનશિપ લીગ (WCL)માં ભારતીય ટીમે પાકિસ્તાન સામેની મેચનો બહિષ્કાર કરવાને કારણે જોવા મળ્યો છે. તેણે શિખર ધવન અને ઇરફાન પઠાણ જેવા ભારતીય સ્ટાર્સનું નામ લીધા વિના ગંભીર આરોપો લગાવ્યા છે.

આફ્રિદીનો તર્ક: ક્રિકેટ ચાલુ રહેવી જોઈએ

એક જાહેર નિવેદનમાં આફ્રિદીએ કહ્યું, "મેં હંમેશા કહ્યું છે કે ક્રિકેટ રમતી રહેવી જોઈએ. તે હંમેશા બે દેશો વચ્ચેના સંબંધો સુધારવામાં મદદ કરે છે. ઇંગ્લેન્ડમાં, લોકોએ WCL મેચ જોવા માટે ટિકિટ ખરીદી હતી અને ખેલાડીઓએ પ્રેક્ટિસ પણ કરી હતી, તેમ છતાં મેચ રમવામાં આવી નહીં. શું વિચારતા હતા? હું સમજી શકતો નથી."

આફ્રિદીએ ભારતીય ખેલાડીઓ પર સીધો હુમલો કરતા કહ્યું કે જો તેમને રમવું નથી, તો કોઈને વાંધો નથી. પરંતુ સોશિયલ મીડિયા પર આ વિશે ટ્વીટ કરીને બિનજરૂરી વિવાદ ઉભો ન કરવો જોઈએ.

પહલગામ હુમલા અને મેચ બહિષ્કારનો વિવાદ

ઉલ્લેખનીય છે કે, પાકિસ્તાન તરફથી થયેલા પહલગામ આતંકવાદી હુમલા અને ભારતના ઓપરેશન સિંદૂર બાદ બંને પડોશી દેશો વચ્ચે તણાવ ચરમસીમા પર છે. આ જ ગુસ્સાને કારણે યુવરાજ સિંહની આગેવાની હેઠળની ઇન્ડિયા ચેમ્પિયન્સ ટીમે WCLમાં પાકિસ્તાન ચેમ્પિયન્સ સામેની મેચનો બહિષ્કાર કર્યો હતો. આ ઘટના બાદથી જ આફ્રિદી ભારતીય ખેલાડીઓથી નારાજ હોવાનું મનાય છે.

એશિયા કપની મેચ રદ કરવાની માંગ

WCL વિવાદ ઉપરાંત, એશિયા કપમાં પણ ભારત-પાકિસ્તાન મેચનો બહિષ્કાર કરવાની સતત માંગ કરવામાં આવી રહી છે. આ અંગે સુપ્રીમ કોર્ટમાં એક PIL પણ દાખલ કરવામાં આવી છે. ભૂતપૂર્વ ક્રિકેટર હરભજન સિંહ જેવા દિગ્ગજો પણ પાકિસ્તાન સાથેની મેચનો ખુલ્લેઆમ વિરોધ કરી રહ્યા છે.

જોકે, કેન્દ્રીય રમતગમત મંત્રાલયે સ્પષ્ટતા કરી છે કે પાકિસ્તાન સાથે કોઈ દ્વિપક્ષીય મેચ નહીં થાય, પરંતુ ટીમ બહુપક્ષીય ટુર્નામેન્ટમાં રમી શકે છે. આથી, 14 સપ્ટેમ્બરે દુબઈમાં બંને ટીમો વચ્ચે ટક્કર થશે તે નિશ્ચિત છે.