IPL 2025 : "6, 6, 6, 6, 6, 6... KKR સામે રિયાન પરાગનો કહેર, 6 બોલમાં ફટકાર્યા 6 છગ્ગા"

IPL 2025 ની એક રોમાંચક મેચમાં કોલકાતા નાઇટ રાઇડર્સ અને રાજસ્થાન રોયલ્સ ટકરાયા હતા. આ મેચમાં પ્રથમ બેટિંગ કરતાં KKR  એ 206 રનનો મોટો સ્કોર બનાવ્યો હતો. લક્ષ્યનો પીછો કરતી રાજસ્થાનની ટીમે શરૂઆતમાં જ પોતાની 5 વિકેટ ગુમાવી દીધી હતી અને માત્ર 71 રન બનાવ્યા હતા. પરંતુ ત્યારબાદ રાજસ્થાનના સ્ટાર બેટ્સમેન રિયાન પરાગે કોલકાતાના બોલરો પર આક્રમણ શરૂ કરી દીધું હતું. પરાગે મોઇન અલીની એક જ ઓવરમાં ઉપરાઉપરી 5 છગ્ગા ફટકારીને મેચનું મોમેન્ટમ બદલી નાખ્યું હતું.

મોઇનની ઓવરમાં 5 સિક્સરનો વરસાદ...

રિયાન પરાગે પોતાની ઇનિંગ્સમાં એક જ બોલર સામે સતત 6 છગ્ગા નથી માર્યા. તેણે પહેલાં મોઇન અલીની એક ઓવરમાં સળંગ 5 છગ્ગા ફટકાર્યા હતા. રાજસ્થાનની ઇનિંગ્સની 13 મી ઓવર લઈને આવેલા મોઇન અલીના પ્રથમ બોલ પર શિમરોન હેટમાયરે એક રન લીધો હતો. ત્યારબાદ રિયાને આગામી 5 બોલને સીધા સ્ટેડિયમની બહાર મોકલી દીધા હતા. આ ઓવરમાં એક વાઇડ બોલ પણ હતો, જેના કારણે ઓવરમાં કુલ 32 રન આવ્યા હતા.

આગલી ઓવરમાં વધુ એક છગ્ગો...

મોઇન અલીની ઓવરમાં 5 છગ્ગા માર્યા બાદ રિયાન પરાગે આગલો છગ્ગો વરુણ ચક્રવર્તીને ફટકાર્યો હતો. વરુણ ચક્રવર્તી ઇનિંગ્સની 14 મી ઓવર લઈને આવ્યો હતો. આ ઓવરના પહેલા બોલ પર હેટમાયરે એક રન લીધો હતો, ત્યારબાદના જ બોલ પર રિવર્સ સ્વીપ કરીને પરાગે પોતાનો છઠ્ઠો સતત છગ્ગો ફટકાર્યો હતો. IPL ના ઇતિહાસમાં આવું પહેલીવાર બન્યું છે જ્યારે કોઈ બેટ્સમેને સતત 6 છગ્ગા માર્યા હોય.

સદીથી ચૂકી ગયેલો રિયાન પરાગ...

આ મેચમાં રિયાન પરાગ પોતાની સદી ચૂકી ગયો હતો. રિયાન આ મુકાબલામાં 45 બોલમાં 95 રન બનાવીને આઉટ થયો હતો. તેણે પોતાની ઇનિંગ્સમાં 6 ચોગ્ગા અને 8 લાંબા છગ્ગા ફટકાર્યા હતા. જો કે, આ શાનદાર ઇનિંગ્સ રમ્યા બાદ પણ તે હર્ષિત રાણાના બોલ પર કેચ આઉટ થયો અને પોતાની સદીથી માત્ર 5 રન દૂર રહી ગયો. તેમ છતાં, રિયાન પરાગની આ તોફાની બેટિંગે મેચને રોમાંચક બનાવી દીધી હતી.