ભારત-સાઉથ આફ્રિકા ફાઇનલ પર વરસાદનું સંકટ

આઇસીસી મહિલા ક્રિકેટ વર્લ્ડ કપ 2025 ની ફાઇનલ મેચ માટે ક્રિકેટ ચાહકોમાં ઉત્સાહ ચરમસીમાએ છે, પરંતુ આ મહત્ત્વપૂર્ણ મુકાબલા પર વરસાદનું સંકટ મંડરાઈ રહ્યું છે. ભારત અને દક્ષિણ આફ્રિકા વચ્ચેની આ ટાઇટલ મેચ રવિવારે (2જી નવેમ્બર) નવી મુંબઈમાં ડૉ. ડીવાય પાટિલ સ્પોર્ટ્સ એકેડેમી ખાતે રમાવાની છે.

મુખ્ય દિવસે 63% વરસાદની શક્યતા

હવામાન વિભાગના અંદાજ મુજબ, રવિવાર, 2જી નવેમ્બરના રોજ નવી મુંબઈમાં વરસાદ પડવાની સંભાવના 63 ટકા જેટલી ઊંચી છે. આગાહી અનુસાર, સવારે વાદળછાયું વાતાવરણ રહેશે અને ત્યારબાદ બપોરના સમયે વાદળછાયા વાતાવરણ વચ્ચે વરસાદની શક્યતા વધુ છે.

ક્રિકેટના ચાહકો માટે આ ખરેખર નિરાશાજનક સમાચાર છે, કારણ કે જો મેચના દિવસે ઓછામાં ઓછી 20 ઓવરની રમત શક્ય નહીં બને તો ફાઇનલનું પરિણામ જાહેર કરવું મુશ્કેલ બની શકે છે.

 રિઝર્વ ડે પણ સુરક્ષિત નથી!

ચાહકોની અને ટીમોની ચિંતાને ધ્યાનમાં રાખીને, આંતરરાષ્ટ્રીય ક્રિકેટ કાઉન્સિલ (ICC) એ ફાઇનલ માટે સોમવાર, 3જી નવેમ્બરને 'રિઝર્વ ડે' તરીકે નક્કી કર્યો છે.

જો રવિવારે મેચ અધૂરી રહે, તો તે રિઝર્વ ડેના દિવસે ત્યાંથી જ ફરી શરુ થશે જ્યાં તે અટકી હતી. નિયમ મુજબ, એકવાર ફાઇનલમાં ટોસ થઈ જાય, પછી મેચને લાઇવ ગણવામાં આવશે.

જો કે, ચિંતાજનક વાત એ છે કે, રિઝર્વ ડે એટલે કે સોમવારે પણ નવી મુંબઈમાં વરસાદની શક્યતા 55 ટકા જેટલી છે! સોમવારે પણ મોટેભાગે વાદળછાયું વાતાવરણ રહેવાની અને ક્યારેક ક્યારેક વરસાદ પડવાની આગાહી છે.

હવે જોવાનું એ રહે છે કે શું ભારતીય મહિલા ટીમ પોતાના હોમ ગ્રાઉન્ડ પર દક્ષિણ આફ્રિકાને હરાવીને વર્લ્ડ કપનો ખિતાબ જીતી શકશે, કે પછી મેચની મજા વરસાદ બગાડશે. ક્રિકેટ ચાહકો હવે આશા રાખી રહ્યા છે કે આ બંને દિવસો દરમિયાન વરુણ દેવતા મેચમાં વિક્ષેપ ન પાડે.