Glenn Maxwell નો ODI સંન્યાસ, શું T20 ક્રેઝે "બિગ શો" ને 50-ઓવર ફોર્મેટ છોડાવ્યું?

ઓસ્ટ્રેલિયાના વિસ્ફોટક ઓલરાઉન્ડર ગ્લેન મેક્સવેલે (Glenn Maxwell) સોમવારે વનડે આંતરરાષ્ટ્રીય ક્રિકેટમાંથી નિવૃત્તિ જાહેર કરી છે. આ નિર્ણય તેમણે આગામી T20 વર્લ્ડ કપ અને અન્ય ગ્લોબલ T20 લીગ પ્રત્યે પોતાની પ્રતિબદ્ધતાને વધુ મજબૂત કરવા માટે લીધો છે. મેક્સવેલ (Glenn Maxwell)નો આ નિર્ણય ક્રિકેટ જગતમાં ચર્ચાનો વિષય બન્યો છે, કારણ કે તેઓ વનડે ફોર્મેટમાં ઓસ્ટ્રેલિયાના મુખ્ય ખેલાડીઓ પૈકી એક હતા.

એક દાયકાની શાનદાર વનડે કારકિર્દીનો અંત...

મેક્સવેલે ઓગસ્ટ 2012 માં પોતાનો પ્રથમ વનડે મેચ રમ્યો હતો. આ ફોર્મેટમાં તેમણે કુલ 149 મેચમાં ઓસ્ટ્રેલિયાનું પ્રતિનિધિત્વ કર્યું. પોતાની વનડે કારકિર્દી દરમિયાન, મેક્સવેલે કુલ 3,990 રન બનાવ્યા, જેમાં એક શાનદાર બેવડી સદી, ચાર સદી અને 23 અડધી સદીનો સમાવેશ થાય છે. તેમની બેટિંગ શૈલી હંમેશા આક્રમક રહી છે અને તેમણે અનેક વખત ઓસ્ટ્રેલિયાને મુશ્કેલ પરિસ્થિતિઓમાંથી બહાર કાઢ્યું છે. મેક્સવેલે 4 માર્ચ, 2025 ના રોજ ભારત સામે ચેમ્પિયન્સ ટ્રોફી દરમિયાન છેલ્લી વનડે મેચ રમી હતી.

શારીરિક સ્થિતિ અને ભાવિ યોજનાઓ...

મેક્સવેલે સ્વીકાર્યું છે કે હવે તેઓ વનડેમાં પોતાનું શ્રેષ્ઠ પ્રદર્શન સતત આપી શકતા નથી. તેમણે 'ફાઇનલ વર્ડ પોડકાસ્ટ'માં જણાવ્યું કે, "મને લાગ્યું કે હું ટીમને થોડો નિરાશ કરી રહ્યો છું, કારણ કે મારી બોડી કન્ડિશન પ્રમાણે રિએક્ટ કરી રહી છે. મેં (ચયનકર્તાઓના અધ્યક્ષ) જ્યોર્જ બેલી સાથે વાતચીત કરી અને તેમની પાસેથી આગળના વિચારો જાણ્યા."

તેમણે ઉમેર્યું કે, "અમે 2027 વર્લ્ડ કપ વિશે વાત કરી અને મેં તેમને કહ્યું કે મને નથી લાગતું કે હું તેમાં સફળ થઈ શકીશ, હવે સમય આવી ગયો છે કે પોઝિશન માટે બીજા ખેલાડીઓ શોધવામાં આવે. મેં હંમેશા કહ્યું છે કે જો મને લાગે કે હું હજુ પણ રમવા માટે સારો છું તો હું મારી જગ્યા છોડીશ નહીં. હું ફક્ત કેટલીક શ્રેણીઓ માટે જ રહેવા માંગતો ન હતો. પોતાના સ્વાર્થ માટે રમવા માંગતો ન હતો."

મેક્સવેલ (Glenn Maxwell) હવે આગામી વર્ષે ભારત અને શ્રીલંકામાં યોજાનાર T20 વર્લ્ડ કપ ઉપરાંત બિગ બેશ લીગ (BBL) અને અન્ય ગ્લોબલ T20 પ્રતિબદ્ધતાઓની તૈયારી કરવા માંગે છે.

અફઘાનિસ્તાન સામેની ઐતિહાસિક ઇનિંગ...

મેક્સવેલે વનડે ફોર્મેટમાં પોતાની સર્વોચ્ચ અને કદાચ કારકિર્દીની સૌથી યાદગાર ઇનિંગ વનડે વર્લ્ડ કપ-2023 દરમિયાન વાનખેડે સ્ટેડિયમમાં રમી હતી. આ મેચમાં તેમણે અફઘાનિસ્તાન સામે 293 રનના લક્ષ્યનો પીછો કરતા 128 બોલમાં અણનમ 201 રન ફટકાર્યા હતા. આ ઇનિંગ ક્રિકેટ ઇતિહાસની સૌથી અસાધારણ ઇનિંગ્સ પૈકી એક ગણાય છે, જ્યાં તેમણે એકલે હાથે ઓસ્ટ્રેલિયાને વિજય અપાવ્યો હતો. પોતાની આ ઇનિંગ વિશે મેક્સવેલે કહ્યું, "હું અત્યંત ભાગ્યશાળી છું કે મને મારી ક્ષણ મળી. આ મારું શ્રેષ્ઠ છે. તમે તેને સ્વીકારી શકો છો અથવા છોડી શકો છો, પણ મારી પાસે બસ એટલું જ છે."

મુખ્ય પસંદગીકાર જ્યોર્જ બેલીની પ્રતિક્રિયા...

ઓસ્ટ્રેલિયાના ચીફ સિલેક્ટર જ્યોર્જ બેલીએ મેક્સવેલના યોગદાનને બિરદાવતા કહ્યું, "ગ્લેનને વનડે ફોર્મેટના સૌથી શાનદાર ખેલાડીઓમાંથી એક તરીકે ઓળખવામાં આવશે, જેમણે બે વાર વનડે વર્લ્ડ કપ જીતમાં મહત્ત્વપૂર્ણ ભૂમિકા ભજવી હતી. મેદાનમાં બેટિંગ ઉપરાંત તેમની ઊર્જા, બોલિંગ અને લાંબા સમય સુધી રમવું શાનદાર રહ્યું છે. સદભાગ્યે, તેમની પાસે હજી પણ ટી20 ફોર્મેટમાં ઓસ્ટ્રેલિયાને આપવા માટે ઘણું બધું છે. બધું બરાબર રહ્યું તો આગામી 12 મહિનામાં તેઓ મહત્વપૂર્ણ ભૂમિકા ભજવશે."

આગળ શું?

મેક્સવેલ છેલ્લે IPL 2025 માં પંજાબ કિંગ્સ માટે રમ્યા હતા, પરંતુ આંગળીમાં ફ્રેક્ચર થવાને કારણે તેમને ટુર્નામેન્ટમાંથી બહાર થવું પડ્યું હતું. તેમને યુએસમાં મેજર લીગ ક્રિકેટ (MLC) માટે સમયસર ફિટ થવાની અપેક્ષા છે, જે બે અઠવાડિયાથી પણ ઓછા સમયમાં શરૂ થવા જઈ રહી છે. આ ઉપરાંત, કેરેબિયન પ્રવાસ માટે ઓસ્ટ્રેલિયાની ટી20 ટીમમાં મેક્સવેલનો સમાવેશ થવાની સંભાવના છે. તેમની નિવૃત્તિ ઓસ્ટ્રેલિયાના વનડે સેટઅપમાં એક શૂન્યતા છોડશે, પરંતુ ટી20 ફોર્મેટમાં તેમની વિસ્ફોટક રમત ચાલુ રહેશે તેવી અપેક્ષા છે.