KKRને લાગ્યો મોટો ઝટકો

IPL 2026, Kolkata Knight Riders: ઇન્ડિયન પ્રીમિયર લીગ (IPL) ની આ સીઝન કોલકાતા નાઈટ રાઈડર્સ (KKR) માટે કોઈ રોલરકોસ્ટર રાઈડથી કમ સાબિત થઈ નથી. સીઝનની શરૂઆતમાં પહેલી જીત મેળવવા માટે ટીમે લાંબી રાહ જોવી પડી હતી, પરંતુ ત્યારબાદ શાનદાર પુનરાગમન કરીને KKR પ્લેઓફની રેસમાં મજબૂતીથી ટકી રહ્યું છે. જોકે, હવે પ્લેઓફની દ્રષ્ટિએ અત્યંત મહત્વની અને કરો યા મરો સમાન અંતિમ લીગ મેચ પહેલા જ ટીમ મેનેજમેન્ટ મોટી મૂંઝવણમાં મુકાયું છે. ટીમના સ્ટાર અને આ સીઝનમાં સૌથી વધુ રન બનાવનાર યુવા બેટ્સમેન અંગક્રિશ રઘુવંશી આગામી મેચ ગુમાવે તેવી પ્રબળ શક્યતાઓ દેખાઈ રહી છે.

મુંબઈ સામેની મેચમાં થઈ ગંભીર ઈજા
20 મેના રોજ કોલકાતાના ઐતિહાસિક ઈડન ગાર્ડન્સ મેદાન પર મુંબઈ ઈન્ડિયન્સ સામે રમાયેલી મેચ KKR માટે બેવડો ફટકો લઈને આવી હતી. આ મેચમાં ટીમને હારનો સામનો તો કરવો જ પડ્યો, સાથે ફિલ્ડિંગ દરમિયાન યુવા બેટ્સમેન અંગક્રિશ રઘુવંશી ગંભીર રીતે ઈજાગ્રસ્ત થયો હતો. વરુણ ચક્રવર્તીના બોલ પર કેચ પકડવા માટે લાંબી ડાઈવ લગાવવાના પ્રયાસમાં અંગક્રિશની આંગળીમાં ઈજા થઈ હતી. મેચ બાદ ઓસ્ટ્રેલિયાના પૂર્વ સ્ટાર શેન વોટસને ખુલાસો કર્યો હતો કે અંગક્રિશને ગરદનના ભાગે પણ તીવ્ર દુખાવો ઉપડ્યો હતો, જેના કારણે મેચ દરમિયાન જ તેજસ્વી સિંહ દહિયાને 'કન્કશન સબસ્ટિટ્યુટ' (Concussion Substitute) તરીકે મેદાનમાં ઉતારવાની ફરજ પડી હતી.

ICCનો નવો નિયમ બન્યો વિલન
અંગક્રિશ રઘુવંશી આગામી મેચ રમી શકશે કે નહીં તે અંગે આઈસીસીના કડક નિયમો આડે આવી રહ્યા છે. જૂન 2025થી અમલમાં આવેલા આઈસીસી (ICC) ના નવા નિયમ મુજબ, જો કોઈ ખેલાડીને મેચ દરમિયાન માથા કે ગરદનના ભાગે ઈજા (Concussion) થાય છે, તો પ્રોટોકોલ અંતર્ગત તેને ઓછામાં ઓછા સાત દિવસ સુધી ક્રિકેટની તમામ પ્રવૃત્તિઓથી દૂર રાખવો અનિવાર્ય છે. આ વૈશ્વિક નિયમ આઈપીએલ ટૂર્નામેન્ટ પર પણ લાગુ થાય છે. કોલકાતા નાઈટ રાઈડર્સની આગામી અને અંતિમ લીગ મેચ 24 મેના રોજ દિલ્હી કેપિટલ્સ સામે રમાવાની છે. 20 મેના રોજ થયેલી ઈજા બાદ સાત દિવસનો આરામનો સમયગાળો જોતાં અંગક્રિશ આ મહત્વની મેચમાંથી સત્તાવાર રીતે બહાર થઈ શકે છે.

KKR માટે કેમ મોટું નુકસાન?
જો દિલ્હી કેપિટલ્સ સામેની મહત્વની મેચમાં અંગક્રિશ રઘુવંશી પ્લેઈંગ ઈલેવનનો ભાગ નહીં બને, તો તે કોલકાતા માટે ખૂબ જ મોટો આંચકો ગણાશે. આ સીઝનમાં તે KKR તરફથી સૌથી સફળ અને ભરોસાપાત્ર બેટ્સમેન તરીકે ઉભરી આવ્યો છે. તેણે મધ્યક્રમમાં આવીને અત્યાર સુધી રમાયેલી 13 મેચોમાં 42.20 ની શાનદાર સરેરાશથી કુલ 422 રન ફટકાર્યા છે, જેમાં પાંચ ફિફ્ટીનો પણ સમાવેશ થાય છે. પ્લેઓફની ટિકિટ કન્ફર્મ કરવા માટે જીતવી જરૂરી એવી મેચમાં ઇન-ફોર્મ બેટ્સમેનની ગેરહાજરી KKRની બેટિંગ લાઇન-અપને નબળી પાડી શકે છે, જેના કારણે કેપ્ટન અને કોચિંગ સ્ટાફની ચિંતામાં ભારે વધારો થયો છે.