BCCI Warns Franchises Over Honeytrap: ઇન્ડિયન પ્રીમિયર લીગ (IPL) ની વર્તમાન સીઝન મેદાન પરની રમતની સાથે સાથે મેદાન બહારના વિવાદોને કારણે પણ ચર્ચામાં આવી છે. IPLના ભ્રષ્ટાચાર વિરોધી અને સુરક્ષા એકમ (ACSU) એ ચાલુ સીઝન દરમિયાન સુરક્ષામાં ગંભીર ખામીઓ હોવાનું શોધી કાઢ્યું છે. ટીમ ડગઆઉટ્સ, પ્લેયર્સ બસ, હોટલો અને ખેલાડીઓ માટેના સુરક્ષિત વિસ્તારોમાં અનધિકૃત વ્યક્તિઓની હાજરી અંગે ACSUએ લાલ આંખ કરી છે. આ પરિસ્થિતિને ધ્યાનમાં રાખીને, ભારતીય ક્રિકેટ કંટ્રોલ બોર્ડ (BCCI) એ તમામ 10 ફ્રેન્ચાઇઝીઓ માટે સ્ટાન્ડર્ડ ઓપરેટિંગ પ્રોટોકોલ્સ (SOPs) ને વધુ કડક બનાવવાનો નિર્ણય લીધો છે.
ACSUનો ચોંકાવનારો રિપોર્ટ IPLના ચેરમેન અરુણ ધુમલે સત્તાવાર રીતે પુષ્ટિ કરી છે કે ભ્રષ્ટાચાર વિરોધી એકમે બોર્ડને એક વિસ્તૃત રિપોર્ટ સોંપ્યો છે. આ રિપોર્ટમાં સ્પષ્ટપણે જણાવાયું છે કે મેચો અને પ્રવાસ દરમિયાન પ્રતિબંધિત ઝોનમાં એવી વ્યક્તિઓ જોવા મળી છે જેમને ત્યાં રહેવાની પરવાનગી નથી. ધુમલે જણાવ્યું હતું કે, "બોર્ડ આ બાબતને અત્યંત ગંભીરતાથી લઈ રહ્યું છે. ACSUએ ડગઆઉટ્સ અને ટીમ હોટલોમાં કેટલીક ખામીઓ તરફ ધ્યાન દોર્યું છે. અમે ફ્રેન્ચાઇઝીઓને પૂર્વ-સ્થાપિત પ્રોટોકોલનું ચુસ્તપણે પાલન કરવાની યાદ અપાવીશું જેથી ટુર્નામેન્ટની અખંડિતતા અને ગરિમા જળવાઈ રહે."
BCCIની કાર્યવાહી આ મુદ્દાઓની ગંભીરતાને જોતા, BCCIએ તમામ ફ્રેન્ચાઇઝીના CEOની એક તાકીદની બેઠક પણ બોલાવી છે. બોર્ડ સચિવ દેવજીત સૈકિયાએ પણ ચિંતા વ્યક્ત કરતા કહ્યું હતું કે, "અનધિકૃત વ્યક્તિઓ ટીમ બસોમાં મુસાફરી કરી રહ્યા છે અને હોટલોમાં હાજર છે. અમુક વ્યક્તિઓ એવી જગ્યાએ જોવા મળ્યા છે જ્યાં તેમની હાજરી શંકાસ્પદ છે." વર્ષ 2013 ના સ્પોટ-ફિક્સિંગ કૌભાંડ બાદ BCCI કોઈ પણ પ્રકારનું જોખમ લેવા માંગતું નથી, કારણ કે તે સમયે ચેન્નાઈ સુપર કિંગ્સ અને રાજસ્થાન રોયલ્સ જેવી મોટી ટીમોને બે વર્ષનો પ્રતિબંધ વેઠવો પડ્યો હતો.
'હની ટ્રેપ' અને WAGS નિયમોની છટકબારીઓ સૌથી ચોંકાવનારો ખુલાસો 'હની ટ્રેપ' અને ખેલાડીઓની અંગત મુલાકાતો બાબતે થયો છે. BCCI સચિવે ફ્રેન્ચાઇઝીઓને સાત પાનાની નવી માર્ગદર્શિકા જારી કરી છે, જેમાં ખાસ કરીને ખેલાડીઓને હની ટ્રેપ જેવી પ્રવૃત્તિઓથી સાવધ રહેવા સૂચના આપવામાં આવી છે. ACSUના રિપોર્ટમાં આરોપ લગાવાયો છે કે કેટલાક યુવા અને શ્રીમંત ખેલાડીઓ WAGS (પત્નીઓ અને ગર્લફ્રેન્ડ્સ) સંબંધિત નિયમોમાં રહેલી છટકબારીઓનો દુરુપયોગ કરી રહ્યા છે. સૂત્રોના જણાવ્યા અનુસાર, ઘણી અજાણી મહિલાઓને 'ગર્લફ્રેન્ડ' તરીકે રજૂ કરીને ટીમ માટે આરક્ષિત બસોમાં પ્રવેશ આપવામાં આવ્યો છે અને તેઓ ખેલાડીઓના રૂમ સુધી પણ પહોંચી રહી છે. બોર્ડને ડર છે કે બુકીઓ અથવા શંકાસ્પદ તત્વો આવી મહિલાઓનો ઉપયોગ કરીને ભોળા ખેલાડીઓ પાસેથી મેચની ગોપનીય માહિતી કઢાવી શકે છે અથવા તેમને ફસાવી શકે છે. નવી SOP માં હવે ગર્લફ્રેન્ડ્સના પ્રવેશ અને રોકાણ અંગે અત્યંત કડક નિયમો બનાવવામાં આવશે.
સોશિયલ મીડિયા ઈન્ફ્લ્યુએન્સર્સ અને વેપિંગનો વિવાદ બોર્ડ માત્ર સુરક્ષા જ નહીં, પરંતુ ખેલાડીઓના શિસ્તભંગથી પણ નારાજ છે. ટુર્નામેન્ટ દરમિયાન ટીમ હોટલોની આસપાસ સોશિયલ મીડિયા ઈન્ફ્લ્યુએન્સર્સ (Influencers) ની વધતી હાજરી BCCIને ખટકી રહી છે. એક સૂત્રએ એમ પણ જણાવ્યું કે એક પૂર્વ ભારતીય ફાસ્ટ બોલરની પત્ની હોટલના રૂમમાંથી સતત ઇન્સ્ટાગ્રામ પોસ્ટ કરી રહી છે, જે સુરક્ષાની દ્રષ્ટિએ જોખમી છે. આ ઉપરાંત, આ સીઝનમાં શિસ્તભંગની અન્ય ઘટનાઓ પણ સામે આવી છે. રાજસ્થાન રોયલ્સના આ યુવા ખેલાડી વૈભવ સૂર્યવંશીએ ડગઆઉટમાં મોબાઈલ ફોનનો ઉપયોગ કર્યો હતો, જેના કારણે તેના માર્ગદર્શકને ₹1 લાખનો દંડ ફટકારવામાં આવ્યો હતો. રાજસ્થાન રોયલ્સના કેપ્ટન રિયાન પરાગને મેદાન પર વેપિંગ (ઇલેક્ટ્રોનિક સિગારેટ) કરવા બદલ મેચ ફીના 25% દંડ કરવામાં આવ્યો છે. ચહલ પણ એક ડિલીટ કરાયેલા વીડિયોમાં ફ્લાઇટ દરમિયાન વેપનો ઉપયોગ કરતો જોવા મળ્યો હતો. ભારતમાં વેપિંગ ગેરકાયદેસર હોવાથી આ ઘટનાઓએ BCCIની છબી ખરડી છે.
નિયમોનું ઉલ્લંઘન કરનાર સામે આકરા પગલાં લેવાની તૈયારી IPL એ માત્ર રમત જ નહીં પરંતુ એક મલ્ટી-બિલિયન ડોલરની બ્રાન્ડ છે. ACSU અને BCCIનો આ કડક અભિગમ એ બાબત સુનિશ્ચિત કરવા માટે છે કે ટુર્નામેન્ટમાં ભ્રષ્ટાચાર કે અસામાજિક તત્વોનો પ્રવેશ ન થાય. આગામી દિવસોમાં ખેલાડીઓની હિલચાલ, તેમના મહેમાનોની યાદી અને ટીમની મુસાફરી વ્યવસ્થા પર કડક નજર રાખવામાં આવશે. જે ખેલાડીઓ અથવા ફ્રેન્ચાઇઝી આ નિયમોનું ઉલ્લંઘન કરશે તેમની સામે આકરા પગલાં લેવાની તૈયારી બોર્ડ કરી લીધી છે.

BCCIએ ફ્રેન્ચાઇઝીઓ માટે SOP વધુ કડક બનાવી

May 8, 2026 | 12:34 IST