WTC ફાઇનલ માટે પાંચ મેચ અધિકારીઓમાં ભારતના શ્રીનાથ મેનનનો સમાવેશ

આગામી 11 થી 15 જૂન દરમિયાન લોર્ડ્સમાં ડિફેન્ડિંગ ચેમ્પિયન ઓસ્ટ્રેલિયા અને પ્રથમ વખતના ફાઇનલિસ્ટ દક્ષિણ આફ્રિકા વચ્ચે રમાનારી વર્લ્ડ ટેસ્ટ ચેમ્પિયનશિપ ફાઇનલ માટે ICC દ્વારા જાહેર કરાયેલા પાંચ મેચ અધિકારીઓમાં અનુભવી ભારતીય મેચ રેફરી જવાગલ શ્રીનાથ અને એલિટ અમ્પાયર નીતિન મેનનનો સમાવેશ કરવામાં આવ્યો છે.

ભારતના ભૂતપૂર્વ ઝડપી બોલર શ્રીનાથ મેચ રેફરી હશે, જ્યારે મેનનને 2025 WTC ફાઇનલ માટે ચોથા અમ્પાયર તરીકે નિયુક્ત કરવામાં આવ્યા છે. આ પહેલી વાર બનશે જ્યારે મેનન WTC ફાઇનલમાં મેચ ઓફિશિયલ બનશે, જેમણે અગાઉ દુબઈમાં ઓસ્ટ્રેલિયા અને ન્યુઝીલેન્ડ વચ્ચે 2021 ICC મેન્સ T20 વર્લ્ડ કપ ફાઇનલ માટે ટીવી અમ્પાયર તરીકે સેવા આપી હતી.

આ બહુપ્રતિક્ષિત ટાઇટલ મેચમાં ન્યુઝીલેન્ડના ક્રિસ ગેફેની અને ઇંગ્લેન્ડના રિચાર્ડ ઇલિંગવર્થ ઓન-ફિલ્ડ અમ્પાયરની ભૂમિકા ભજવશે. ઇલિંગવર્થ 2021 અને 2023 WTC ફાઇનલ્સમાં પણ અમ્પાયરિંગ ટીમનો ભાગ હતા. 2024 માં ચોથી વખત ડેવિડ શેફર્ડ ટ્રોફી જીત્યા બાદ તેઓ ICC અમ્પાયર ઓફ ધ યર સન્માનના વર્તમાન ધારક પણ છે. ગેફનીએ બાર્બાડોસમાં ભારત અને દક્ષિણ આફ્રિકા વચ્ચે 2024 ICC મેન્સ T20 વર્લ્ડ કપ ફાઇનલમાં ઇલિંગવર્થ સાથે ભાગીદારી કરી હતી અને ઓવલ ખાતે ભારત અને ઓસ્ટ્રેલિયા વચ્ચે WTC 2023 ફાઇનલમાં પણ અમ્પાયરિંગ કર્યું હતું.

દરમિયાન, ઇલિંગવર્થ ત્રણેય વર્લ્ડ ટેસ્ટ ચેમ્પિયનશિપ ફાઇનલમાં અમ્પાયરિંગ કરનાર પ્રથમ અમ્પાયર બનશે. ઈંગ્લેન્ડના રિચાર્ડ કેટલબરો, જેમણે મેન્સ ક્રિકેટ વર્લ્ડ કપ અને ચેમ્પિયન્સ ટ્રોફી સહિત અનેક મોટી ICC ઇવેન્ટ્સની ફાઇનલમાં અમ્પાયરિંગ કરી છે, તેમને સાઉથમ્પ્ટનમાં ભારત અને ન્યુઝીલેન્ડ વચ્ચે WTC 2021 ફાઇનલમાં સમાન ભૂમિકા ભજવ્યા બાદ ટીવી અમ્પાયર તરીકે નિયુક્ત કરવામાં આવ્યા છે.

ICC ચેરમેન જય શાહે જણાવ્યું હતું કે, "લોર્ડ્સ ખાતે ICC વર્લ્ડ ટેસ્ટ ચેમ્પિયનશિપ ફાઇનલ માટે મેચ અધિકારીઓની અનુભવી ટીમની જાહેરાત કરતા અમને આનંદ થાય છે, જે વિશ્વભરમાં રમાતી બે વર્ષના અત્યંત સ્પર્ધાત્મક ટેસ્ટ મેચ ચક્રની પરાકાષ્ઠા દર્શાવે છે."

"અમે બધી મેચો માટે સૌથી લાયક અને સક્ષમ અધિકારીઓની પસંદગી કરવાનો પ્રયાસ કરીએ છીએ, અને અમને વિશ્વાસ છે કે તેઓ પ્રશંસનીય પ્રદર્શન કરશે. ICC વતી, હું તેમને શુભેચ્છા પાઠવું છું અને આશા રાખું છું કે તેઓ આ કાર્યનો આનંદ માણશે."