હેડિંગ્લે ટેસ્ટમાં ઋષભ પંતની શાનદાર બેટિંગ છતાં ICCની કાર્યવાહી

લીડ્સના હેડિંગ્લે ખાતે ઈંગ્લેન્ડ સામેની રોમાંચક ટેસ્ટ મેચમાં ભારતના ઉપ-કેપ્ટન ઋષભ પંતની શાનદાર બેટિંગ ચર્ચાનો વિષય બની છે, પરંતુ ઓન-ફિલ્ડ અમ્પાયર સાથેની બોલાચાલી અને ગુસ્સે થઇ બોલ ફેંકવાની ઘટના તેને ભારે પડી છે. આંતરરાષ્ટ્રીય ક્રિકેટ કાઉન્સિલ (ICC) ના આચારસંહિતાનું ઉલ્લંઘન કરવા બદલ પંતને એક ડિમેરિટ પોઈન્ટ આપવામાં આવ્યો છે.   ઘટના ઈંગ્લેન્ડની પહેલી ઈનિંગની 61મી ઓવર દરમિયાન બની, જ્યારે મોહમ્મદ સિરાજ બોલિંગ કરી રહ્યો હતો. ઓવરના ત્રીજા બોલ પછી જસપ્રીત બુમરાહે બોલની સ્થિતિ અંગે અમ્પાયરને ફરિયાદ કરી અને બોલને ગેજ ટેસ્ટમાં તપાસવાની માંગ કરી. બોલ ટેસ્ટમાં પાસ થયો, અને અમ્પાયરે રમત ચાલુ રાખવાનો નિર્ણય લીધો. આ પછી, ઓવરના પાંચમા બોલ પર ઈંગ્લેન્ડના હેરી બ્રુકે ચોગ્ગો ફટકાર્યો. આ બાદ પંતે બીજા અમ્પાયરને પણ બોલ અંગે ફરિયાદ કરી, પરંતુ બોલ ફરી ગેજ ટેસ્ટમાં પાસ થયો. આ નિર્ણયથી નારાજ થયેલા પંતે ગુસ્સામાં બોલ જમીન પર ફેંકી દીધો, જે ICCની આચારસંહિતાની કલમ 2.8નું ઉલ્લંઘન ગણાયું. આ કલમ અમ્પાયરના નિર્ણય પર અસંમતિ દર્શાવવા સંબંધિત છે.   પંતે પોતાનો ગુનો સ્વીકારી લીધો છે અને ICC એલીટ પેનલના મેચ રેફરી રિચી રિચાર્ડસન દ્વારા આપવામાં આવેલી સજા પણ માન્ય રાખી છે. આ આરોપ ઓન-ફિલ્ડ અમ્પાયર્સ ક્રિસ ગાફની, પોલ રાઈફલ, થર્ડ અમ્પાયર શરાફુદઉલ્લાહ ઈબ્ને શાહિદ અને ફોર્થ અમ્પાયર માઈક બર્ન્સ દ્વારા લગાવવામાં આવ્યો હતો. લેવલ 1ના ગુના માટે ઓછામાં ઓછી સજા સત્તાવાર ઠપકો છે, જ્યારે મહત્તમ સજા મેચ ફીના 50 ટકા દંડ અથવા એક-બે ડિમેરિટ પોઈન્ટ હોઈ શકે છે. 24 મહિનામાં પંતનો આ પહેલો શિસ્તભંગનો ગુનો છે.   આ ઘટના છતાં, પંતે બેટિંગમાં શાનદાર પ્રદર્શન કર્યું. તેણે પહેલી ઈનિંગમાં 134 રન અને બીજી ઈનિંગમાં 118 રનની સદી ફટકારી, જેના કારણે ભારતે મજબૂત સ્થિતિ હાંસલ કરી. ભારતે પહેલી ઈનિંગમાં 471 રન બનાવ્યા, જ્યારે ઈંગ્લેન્ડે 465 રન બનાવ્યા, જેનાથી ભારતને 6 રનની લીડ મળી. બીજી ઈનિંગમાં ભારત 364 રનમાં ઓલઆઉટ થયું, અને ઈંગ્લેન્ડ સામે 471 રનનો લક્ષ્યાંક રાખ્યો.   હાલ ટેસ્ટ મેચ રોમાંચક તબક્કામાં છે. ઈંગ્લેન્ડને પાંચમા દિવસે જીત માટે 350 રનની જરૂર છે, જ્યારે ભારતને 10 વિકેટની જરૂર છે. પંતની આક્રમક બેટિંગ અને આ ઘટનાએ મેચને વધુ રોમાંચક બનાવી દીધી છે.