Hardik Pandya Set To Leave Mumbai Indians: ઇન્ડિયન પ્રીમિયર લીગ (IPL) 2026 માં મુંબઈ ઈન્ડિયન્સ (MI) ના અત્યંત નિરાશાજનક પ્રદર્શન બાદ, ફ્રેન્ચાઇઝી અને તેના કેપ્ટન હાર્દિક પંડ્યા વચ્ચેના સંબંધોમાં મોટો ભંગાણ પડ્યો હોવાના અહેવાલો સામે આવ્યા છે. અંદરના સૂત્રો તરફથી મળતી ચોંકાવનારી વિગતો મુજબ, હાર્દિક પંડ્યા હવે આગામી સીઝન માટે મુંબઈ ઈન્ડિયન્સનો ભાગ રહેવા માંગતો નથી. આ અંગે તેણે ચાલુ સીઝનની મધ્યમાં જ ટીમ મેનેજમેન્ટને પોતાના આખરી નિર્ણયની જાણ કરી દીધી હોવાનું મનાઈ રહ્યું છે. આ વિવાદે ભારતીય ક્રિકેટ જગત અને આઈપીએલના ચાહકોમાં ભારે ખળભળાટ મચાવી દીધો છે.
સીઝનની 44મી મેચ બાદ હાર્દિક અચાનક કેમ ગાયબ થયો? આ ચર્ચાને ત્યારે વધુ વેગ મળ્યો જ્યારે ચાલુ સીઝનની 44મી મેચ, જે ચેન્નઈ સુપર કિંગ્સ (CSK) સામે મુંબઈની આ વર્ષની બીજી ટક્કર હતી, ત્યારબાદ હાર્દિક પંડ્યા અચાનક ટીમમાંથી ગાયબ થઈ ગયો હતો. તે ન તો ટીમ સાથે આગામી મેચો માટે મુસાફરી કરતો જોવા મળ્યો કે ન તો ડગઆઉટમાં ટીમની પડખે ઊભેલો દેખાયો. તે સમયે મુંબઈ ઈન્ડિયન્સના મેનેજમેન્ટે સત્તાવાર ખુલાસો કર્યો હતો કે હાર્દિક પીઠની ઈજાથી પીડાઈ રહ્યો છે અને તેના કારણે તેને ટીમની બહાર રાખવામાં આવ્યો છે. પરંતુ હવે અંદરખાનેથી બહાર આવી રહેલા અહેવાલો કંઈક જુદી જ વાર્તા કહી રહ્યા છે કે હાર્દિક અને ફ્રેન્ચાઇઝી વચ્ચે બધું બરાબર નથી ચાલી રહ્યું.
ભારે માનસિક તણાવ અને ચાહકોની સતત મજાક IPL ના એક આંતરિક સૂત્રએ આ મામલે મોટો ખુલાસો કરતા જણાવ્યું છે કે, "હાર્દિક ટીમ પરના સતત દબાણ અને અપેક્ષા મુજબના પરિણામો ન મળવાને કારણે ખૂબ જ પરેશાન હતો. તે ભારે માનસિક તાણ અને થાક અનુભવી રહ્યો હતો. આ સાથે તેને પીઠની જૂની ઈજા પણ સતાવી રહી હતી. જેવી ટીમની પ્લેઓફમાં પહોંચવાની આશાઓ ધૂંધળી થઈ, તેણે મેનેજમેન્ટ સમક્ષ સ્પષ્ટ કરી દીધું કે તે હવે આ ફ્રેન્ચાઇઝી સાથે આગળ વધવા સક્ષમ નથી."
રોહિત પાસેથી સંભાળી કેપ્ટનશીપ&nbsp; નોંધનીય છે કે હાર્દિક પંડ્યાએ વર્ષ 2024 માં ભારે વિવાદો વચ્ચે રોહિત શર્મા પાસેથી મુંબઈ ઈન્ડિયન્સની કેપ્ટનશીપ સંભાળી હતી. રોહિત જેવા લોકપ્રિય કેપ્ટનને હટાવીને હાર્દિકને સુકાન સોંપાતા જ ચાહકો ભારે નારાજ થયા હતા. છેલ્લા બે વર્ષથી મેદાન પર અને સોશિયલ મીડિયા પર ચાહકો સતત હાર્દિકની મજાક ઉડાવી રહ્યા છે અને તેની ટિપ્પણીઓ કરી રહ્યા છે. હાર્દિકે જાહેર મંચ પર ભલે એમ કહ્યું હોય કે 'આ સફર મુશ્કેલ પણ રસપ્રદ રહી છે', પરંતુ અંદરથી હવે તેની ધીરજ ખૂટી ગઈ છે. માત્ર 32 વર્ષની ઉંમરે આટલું મોટું નકારાત્મક દબાણ ઝીલવું તેના માટે મુશ્કેલ સાબિત થયું છે.
ત્રણ સીઝનથી મુશ્કેલીમાં MI: ડ્રેસિંગ રૂમની એકતા તૂટી? છેલ્લા ત્રણ વર્ષથી પાંચ વખતની ચેમ્પિયન મુંબઈ ઈન્ડિયન્સનું પ્રદર્શન કથળેલું રહ્યું છે. ગત સીઝનમાં ટીમ માંડ-માંડ પ્લેઓફમાં પહોંચી હતી, પરંતુ ક્વોલિફાયર 2 માં પંજાબ સામે હારીને બહાર થઈ ગઈ હતી. હાર્દિકને આશા હતી કે કેપ્ટન તરીકે તેને તમામ ખેલાડીઓનો સાથ મળશે અને ટીમ એક થઈને રમશે, પરંતુ વાસ્તવિકતા કંઈક અલગ જ હતી. સૂત્રના જણાવ્યા અનુસાર, "મુંબઈ ઈન્ડિયન્સનો ડ્રેસિંગ રૂમ હવે એવો નથી રહ્યો જેવો વર્ષ 2021 માં હાર્દિકે છોડ્યો હતો. સિનિયર ખેલાડીઓના વિચારોમાં એકતાનો અભાવ વર્તાતો હતો. જો મેચોના પરિણામો સારા આવ્યા હોત, તો કદાચ આ મતભેદો દબાઈ ગયા હોત. પરંતુ જ્યારે હારનો સિલસિલો શરૂ થયો અને દરેક ખેલાડી અલગ-અલગ દિશામાં વિચારવા લાગ્યો, ત્યારે કેપ્ટન પર માનસિક દબાણ અનિવાર્ય બની ગયું."
રોહિત, સૂર્યા અને બુમરાહ તરફથી સમર્થન ન મળ્યાનો ગણગણાટ રિપોર્ટ્સમાં એક અત્યંત ગંભીર આરોપ એવો પણ લગાવવામાં આવ્યો છે કે હાર્દિકને ફ્રેન્ચાઇઝી સ્તરે યોગ્ય સપોર્ટ મળ્યો નથી. જ્યારે હાર્દિક ભારતીય ટીમ માટે T20 ક્રિકેટ રમે છે, ત્યારે સિનિયર ખેલાડીઓ તેની પાસે 100 ટકા સમર્પણની અપેક્ષા રાખે છે; પરંતુ જ્યારે તે પોતે મુંબઈ ઈન્ડિયન્સ ફ્રેન્ચાઇઝીનું નેતૃત્વ કરી રહ્યો હતો, ત્યારે તેને બદલામાં સિનિયર્સ તરફથી એ સ્તરની પ્રતિબદ્ધતા કે સમર્થન મળ્યું નહીં. જોકે અહેવાલોમાં કોઈનું નામ સત્તાવાર રીતે લેવામાં આવ્યું નથી, પરંતુ આ ઈશારો રોહિત શર્મા, સૂર્યકુમાર યાદવ અને જસપ્રિત બુમરાહ જેવા સિનિયર ખેલાડીઓ તરફ હોવાની આશંકા સેવાઈ રહી છે. હાર્દિક હવે ઓગસ્ટ મહિના સુધીમાં અન્ય કોઈ ટીમ સાથે ટ્રેડિંગ (Trade) કરશે કે સીધો આઈપીએલ મેગા ઓક્શન (Auction) માં પોતાનું નામ નોંધાવશે, તે ચિત્ર આવનારા સમયમાં જ સ્પષ્ટ થશે.
શું ચેન્નઈ સુપર કિંગ્સ (CSK) બનશે હાર્દિકનું નવું સરનામું? સોશિયલ મીડિયા પર ચાલી રહેલી અટકળો મુજબ, જો હાર્દિક મુંબઈ છોડશે તો ચેન્નઈ સુપર કિંગ્સ (CSK) તેના માટે સૌથી મોટો અને વ્યવહારુ વિકલ્પ બની શકે છે. ક્રિકેટ ગલીઓમાં તો એવી પણ ચર્ચા છે કે ચેન્નઈ સુપર કિંગ્સ હાર્દિક પંડ્યાના બદલામાં પોતાના વર્તમાન કેપ્ટન રુતુરાજ ગાયકવાડ અને યુવા ઓલરાઉન્ડર આયુષ મ્હાત્રેને મુંબઈ સાથે ટ્રેડ કરી શકે છે. આ ઉપરાંત શિવમ દુબેના નામને લઈને પણ અટકળો તેજ થઈ છે. જોકે, આ અંગે બંને ફ્રેન્ચાઇઝી તરફથી હજુ સુધી કોઈ સત્તાવાર નિવેદન આવ્યું નથી.
હાર્દિકના ગયા પછી મુંબઈ ઈન્ડિયન્સનો નવો કેપ્ટન કોણ? જો હાર્દિક પંડ્યા આગામી સીઝન પહેલા મુંબઈ ઈન્ડિયન્સનો સાથ છોડી દે છે, તો ફ્રેન્ચાઇઝી સમક્ષ નવો કેપ્ટન શોધવાનો મોટો પડકાર ઉભો થશે. હાલમાં મેનેજમેન્ટ પાસે મુખ્ય બે વિકલ્પો હોવાનું ચર્ચાઈ રહ્યું છે. જે કેપ્ટને મુંબઈને 5 આઈપીએલ ટાઇટલ અપાવ્યા છે, તે અનુભવી રોહિત શર્માને ફરી એકવાર લાંબા ગાળા માટે અથવા ટ્રાન્ઝિશન ફેઝ માટે કેપ્ટનશીપ સોંપવામાં આવે. ટીમ મેનેજમેન્ટ યુવા અને આક્રમક બેટ્સમેન તિલક વર્માને ભવિષ્યના કેપ્ટન તરીકે તૈયાર કરી શકે છે અને તેની આસપાસ એક તદ્દન નવી અને યુવા ટીમનું નિર્માણ કરી શકે છે. આવનારા થોડા મહિનાઓ મુંબઈ ઈન્ડિયન્સ અને હાર્દિક પંડ્યાના ક્રિકેટ કરિયર માટે ખૂબ જ નિર્ણાયક સાબિત થશે, અને સમગ્ર ક્રિકેટ જગતની નજર હવે હાર્દિકના આગામી કદમ પર ટકેલી રહેશે.

રોહિત-સૂર્યા સાથેના અણબનાવની ચર્ચાથી ક્રિકેટ જગત સ્તબ્ધ

May 29, 2026 | 16:05 IST