IPL 2026 વચ્ચે હાર્દિક પંડ્યાના લગ્નની ચર્ચા!

Hardik Pandya Mahieka Sharma Marriage: ભારતીય ક્રિકેટ ટીમનો સ્ટાર ઓલરાઉન્ડર અને મુંબઈ ઇન્ડિયન્સનો કેપ્ટન હાર્દિક પંડ્યા ફરી એકવાર પોતાની પર્સનલ લાઈફને લઈને ભારે ચર્ચામાં આવ્યો છે. સોશિયલ મીડિયા પર છેલ્લા કેટલાક દિવસોથી અહેવાલો દાવો કરી રહ્યા છે કે હાર્દિક પંડ્યા ચાલુ આઈપીએલ (IPL 2026) દરમિયાન જ તેની ગર્લફ્રેન્ડ માહિકા શર્મા સાથે લગ્નગ્રંથિથી જોડાવવા જઈ રહ્યો છે. ઇન્ટરનેટ પર ઝડપથી વાયરલ થઈ રહેલી આ પોસ્ટે ક્રિકેટ ચાહકો અને મીડિયા જગતમાં ભારે ખળભળાટ મચાવી દીધો છે, જેના કારણે સોશિયલ મીડિયા પર વિવિધ પ્રકારની પ્રતિક્રિયાઓ જોવા મળી રહી છે.

 

Hardik Pandya and Mahieka Sharma are getting married on May 22 in Udaipur in a private ceremony❤️ pic.twitter.com/t3UUwITWSN

— Amar💫 (@KUNGFU_PANDYA_0) May 15, 2026

 

વાયરલ પોસ્ટમાં શું છે દાવો?
સોશિયલ મીડિયા પ્લેટફોર્મ્સ પર વાયરલ થઈ રહેલી વિવિધ પોસ્ટ્સમાં એવો દાવો કરવામાં આવી રહ્યો છે કે હાર્દિક પંડ્યા અને માહિકા શર્મા આગામી 22 મેના રોજ રાજસ્થાનના ઉદયપુરમાં સાત ફેરા લેશે. આ લગ્ન એક અત્યંત ખાનગી સમારોહ હશે, જેમાં માત્ર પંડ્યા પરિવાર, નજીકના સગા-સંબંધીઓ અને કેટલાક ખાસ મિત્રો જ હાજરી આપશે તેવું કહેવામાં આવી રહ્યું છે. જોકે, આ વાયરલ સમાચારો અંગે હાર્દિક પંડ્યા, માહિકા શર્મા કે તેમની પીઆર (PR) ટીમ દ્વારા હજુ સુધી કોઈ સત્તાવાર પુષ્ટિ કે નિવેદન જાહેર કરવામાં આવ્યું નથી.

શું છે આ લગ્નના સમાચારનું અસલી સત્ય?
જ્યારે આ વાયરલ પોસ્ટ્સ અને તેને શેર કરનારા સોશિયલ મીડિયા એકાઉન્ટ્સની બારીકાઈથી તપાસ કરવામાં આવી, ત્યારે આ લગ્નની અફવાઓ પાછળનું અસલી સત્ય સામે આવ્યું હતું. હકીકતમાં, આ સમાચાર સૌથી પહેલા શેર કરનાર એકાઉન્ટ એક 'પેરોડી એકાઉન્ટ' એટલે કે નકલી પ્રોફાઇલ છે. આ પ્રકારના એકાઉન્ટ્સ સોશિયલ મીડિયા પર માત્ર લાઈક્સ, કમેન્ટ્સ અને વ્યૂઝ મેળવવા માટે સત્તાવાર ન્યૂઝ ચેનલોની નકલ કરીને ખોટી અને ભ્રામક માહિતી પોસ્ટ કરતા હોય છે. તેથી હાર્દિક પંડ્યાના આ મહિને લગ્ન થવાના સમાચારો સંપૂર્ણપણે પાયાવિહોણા અને માત્ર એક અફવા સાબિત થયા છે.

હાર્દિકની લવ લાઈફ અને નતાશા સાથેના છૂટાછેડા
હાર્દિક પંડ્યાની લવ લાઈફ હંમેશા હેડલાઈન્સમાં રહે છે. હાર્દિકે અગાઉ વર્ષ 2020માં મોડલ અને અભિનેત્રી નતાશા સ્ટેનકોવિક સાથે લગ્ન કર્યા હતા અને તેમને એક પુત્ર પણ છે. જોકે, વૈચારિક મતભેદોના કારણે વર્ષ 2024માં આ દંપતીએ પરસ્પર સંમતિથી છૂટાછેડા લઈ લીધા હતા, અને હાલમાં તેઓ બંને મળીને પોતાના પુત્રનો ઉછેર (કો-પેરેન્ટિંગ) કરી રહ્યા છે. નતાશાથી અલગ થયા બાદ હાર્દિક અને માહિકા શર્મા વચ્ચેના સંબંધોની ચર્ચા અવારનવાર થતી રહે છે. ચાલુ આઈપીએલ સીઝન દરમિયાન પણ માહિકા ઘણી મેચોમાં હાર્દિક અને તેની ટીમને સપોર્ટ કરતી જોવા મળી છે, જેના કારણે બંનેની કેમેસ્ટ્રી ફેન્સ વચ્ચે સતત ચર્ચાનો વિષય બનેલી રહે છે.