ભારતનું પહેલું AI હાર્ડવેર: 'Sarvam Kaze' લોન્ચ

ભારતીય AI સ્ટાર્ટઅપ 'સર્વમ AI' એ ટેકનોલોજીની દુનિયામાં નવો ઈતિહાસ રચ્યો છે. દિલ્હીમાં આયોજિત 'ઇન્ડિયા AI ઇમ્પેક્ટ સમિટ 2026' દરમિયાન કંપનીએ તેના પ્રથમ AI સ્માર્ટ ગ્લાસીસ 'સર્વમ કાઝે' (Sarvam Kaze)ની જાહેરાત કરી છે. 

શું છે 'સર્વમ કાઝે' અને તે શું કામ કરશે?

સર્વમ AI ના વડા પ્રત્યુષ કુમારે સોશિયલ મીડિયા પ્લેટફોર્મ X પર એક ટીઝર શેર કરીને આ ઉપકરણની વિગતો આપી છે.

• રિયલ વર્લ્ડ ઇન્ટેલિજન્સ: આ ચશ્મા AI ને સ્ક્રીનમાંથી બહાર લાવીને વાસ્તવિક દુનિયા સાથે જોડે છે.

• ફિચર્સ: આ ચશ્મા તમારી વાતો સાંભળી શકે છે, જે જુઓ છો તેને કેપ્ચર કરી શકે છે અને તમારી સૂચનાઓ મુજબ પ્રતિસાદ (Reply) આપી શકે છે.

• ડિઝાઇન: તેનો દેખાવ 'મેટા રેબન' જેવો જ આકર્ષક છે અને તેમાં અત્યાધુનિક કેમેરા પ્લેસમેન્ટ આપવામાં આવ્યું છે.

મે 2026માં થશે લોન્ચ

આ સ્માર્ટ ગ્લાસીસ સંપૂર્ણપણે ભારતમાં ડિઝાઇન અને બિલ્ટ કરવામાં આવ્યા છે. આ ભારતનું પ્રથમ સ્વદેશી AI હાર્ડવેર ગણાશે. 'સર્વમ કાઝે' આગામી મે ૨૦૨૬માં સત્તાવાર રીતે લોન્ચ કરવામાં આવશે.

સર્વમ AI એ તાજેતરમાં જ તેના ભાષાકીય મોડલ્સ દ્વારા ગૂગલ જેમિની અને ChatGPT જેવી કંપનીઓને ટક્કર આપીને હેડલાઇન્સ બનાવી હતી, અને હવે હાર્ડવેર સેક્ટરમાં પણ તેણે મોટી છલાંગ લગાવી છે.

વર્તમાન સમયમાં મેટા અને એપલ જેવી વૈશ્વિક કંપનીઓ સ્માર્ટ ગ્લાસીસ માર્કેટમાં પ્રભુત્વ જમાવી રહી છે, ત્યારે 'સર્વમ કાઝે' ભારતને આ સ્પર્ધામાં ગ્લોબલ પ્લેયર તરીકે સ્થાપિત કરી શકે છે.

સંભવિત કિંમત

જોકે સર્વમ AI દ્વારા હજુ સત્તાવાર કિંમત જાહેર કરવામાં આવી નથી, પરંતુ બજારના ટ્રેન્ડ મુજબ અંદાજ લગાવી શકાય છે: મેટા રેબન (Meta Ray-Ban) ની કિંમત આશરે ₹25,000થી ₹35,000 ની વચ્ચે હોય છે.

• ભારતીય બજાર: 'મેડ ઇન ઇન્ડિયા' હોવાને કારણે અને ભારતીય ગ્રાહકોને આકર્ષવા માટે, સર્વમ તેની કિંમત ₹15,000થી ₹22,000 ની વચ્ચે રાખી શકે છે જેથી તે વધુ સ્પર્ધાત્મક બની શકે.

આ જાહેરાતની સૌથી ખાસ વાત એ છે કે દેશના વડાપ્રધાન નરેન્દ્ર મોદી આ સ્માર્ટ ગ્લાસીસનો ઉપયોગ કરનાર પ્રથમ વ્યક્તિ બન્યા છે.