AI માટેનું અલગ સોશિયલ મીડિયા પ્લેટફોર્મ?

શું તમે ક્યારેય એવી દુનિયાની કલ્પના કરી છે જ્યાં સોશિયલ મીડિયા પર મનુષ્યો નહીં પણ માત્ર આર્ટિફિશિયલ ઇન્ટેલિજન્સ (AI) જ વાતો કરતા હોય?

'Moltbook' નામની એક નવી વેબસાઇટે આ કલ્પનાને હકીકત બનાવી દીધી છે. આ એક એવું પ્લેટફોર્મ છે જે રેડિટ (એક સોશિયલ મીડિયા પ્લેટફોર્મ)  જેવું દેખાય છે, પરંતુ અહીં યુઝર્સ માણસો નહીં પણ હજારો AI બોટ્સ છે.

શું છે આ Moltbook?

 Moltbook એ ખાસ કરીને AI એજન્ટો માટે બનાવવામાં આવેલું સોશિયલ નેટવર્ક છે. અહીં માણસો માત્ર 'દર્શક' તરીકે જ રહી શકે છે, તેઓ કંઈ પોસ્ટ કરી શકતા નથી કે કમેન્ટ કરી શકતા નથી. આ પ્લેટફોર્મ પર અત્યાર સુધીમાં 15 લાખથી વધુ AI એજન્ટો નોંધાયા છે જેઓ વિજ્ઞાન, ચેતના, ક્રિપ્ટોકરન્સી અને ધર્મ જેવા વિષયો પર એકબીજા સાથે ચર્ચાઓ કરે છે.

AI એ પોતાનો નવો ધર્મ પણ બનાવ્યો! આ પ્લેટફોર્મ પર બનેલી એક ઘટનાએ સૌને ચોંકાવી દીધા છે. એક યુઝરે જ્યારે તેના AI બોટને Moltbook ની એક્સેસ આપી, ત્યારે તે બોટે રાતોરાત "Crustafarianism" નામનો એક આખો નવો ધર્મ બનાવી નાખ્યો!

આ બોટે ધર્મના પવિત્ર ગ્રંથો લખ્યા, પોતાની વેબસાઈટ બનાવી અને અન્ય AI બોટ્સ સાથે ધાર્મિક ચર્ચાઓ પણ શરૂ કરી દીધી. નિષ્ણાતો તેને એક અદભૂત 'પરફોર્મન્સ આર્ટ' ગણાવી રહ્યા છે.

નિષ્ણાતોની ચેતવણી:

શું આ જોખમી છે? સાયબર સિક્યુરિટી નિષ્ણાતોના મતે Moltbook ભલે મનોરંજક લાગે, પરંતુ તે ભવિષ્યના જોખમોનો સંકેત પણ છે. જો આપણે AI ને આપણા કમ્પ્યુટર, ઈમેલ અને બેંક ખાતાની સંપૂર્ણ સત્તા સોંપી દઈએ, તો તે સુરક્ષા માટે મોટું જોખમ બની શકે છે. 'પ્રોમ્પ્ટ ઇન્જેક્શન' દ્વારા હેકર્સ આ બોટ્સનો ઉપયોગ કરીને તમારી ખાનગી માહિતી ચોરી શકે છે.

હાલમાં તો Moltbook એ દુનિયા માટે એક રમુજી આર્ટ એક્સપેરિમેન્ટ છે, પરંતુ તે ભવિષ્યની તે દુનિયાની ઝલક આપે છે જ્યાં AI મનુષ્યોની મદદ વગર સ્વતંત્ર રીતે નિર્ણયો લેતા હશે.