GUJARAT : છેલ્લા 30 વર્ષમાં આ આગેવાનોના માથે પ્રદેશ કોંગ્રેસ પ્રમુખનો કાંટાળો તાજ

કડી અને વિસાવદરની પેટાચૂંટણીનાં પરિણામો જાહેર થયાંના 4 કલાકમાં જ શક્તિસિંહ ગોહિલે કોંગ્રેસના પ્રદેશ પ્રમુખપદેથી રાજીનામું આપી દીધું છે. ગુજરાતમાં છેલ્લા 30 વર્ષથી કોંગ્રેસના શક્તિશાળી કહી શકાય તેવા નેતાઓ પ્રમુખપદે રહી ચુક્યા છે પણ એક પણ આગેવાન કોંગ્રેસને ચૂંટણીમાં જીત અપાવી શક્યા નથી. ગુજરાત પ્રદેશ કોંગ્રેસનો કાંટાળો તાજ હવે ધારાસભ્ય શૈલેશ પરમારના શીરે ચઢ્યો છે

ગુજરાતમાં સત્તાનો રસ્તો કોંગ્રેસ માટે કપરો ચઢાણ સાબિત થઇ રહ્યો છે. કોંગ્રેસ સાંસદ રાહુલ ગાંધીના સતત પ્રયાસો છતાં ગુજરાતના મતદારો હજું પણ કોંગ્રેસથી મોં ફેરવીને બેઠા છે. વિપક્ષના નેતા રાહુલ ગાંધીએ હવે કોંગ્રેસ નવસર્જન શરુ કર્યું છે અને કાર્યકરોના મનની વાત સાંભળી તેમના સુચનોનો અમલ કરવાની બાંહેધરી પણ આપી છે. ગુજરાતમાં યોજાયેલા એઆઇસીસી અધિવેશનમાં તેમણે લગ્નના ઘોડા અને રેસના ઘોડાની વાત પણ કરી હતી અને લગ્નના ઘોડાઓને વિદાય કરી દેવાશે તેમ પણ તેમણે જણાવ્યું હતું.

હજું બે દિવસ પહેલાં જ કોંગ્રેસે ગુજરાતના તમામ જિલ્લાના પ્રમુખોની નિમણુક કરી હતી. આ વિશે વિદાય લઇ ચુકેલા પ્રમુખ શક્તિસિંહ ગોહિલે પ્રેસ કોન્ફરન્સમાં કહ્યું હતું કે જિલ્લાકક્ષાએ તમામ કાર્યકરોની વાત નિરીક્ષકોએ સાંભળી હતી અને એઆઇસીસીએ તમામ સારા ઉમેદવારને સાંભળ્યા છે. એ બાદ જિલ્લા- પ્રમુખોનાં નામ પર મહોર મારવામાં આવી હતી. આ જિલ્લા પ્રમુખોની જાહેરાત બાદ ગુજરાતના કાર્યકરોને નવું બળ અને જોશ મળ્યાં છે. પક્ષ કે પરિવારમાં નિર્ણયો સમયે અમુક લોકોને સમસ્યા હોઈ શકે છે. હવે ત્રણ મહિના બાદ જિલ્લા-પ્રમુખોની કામગીરીની સમીક્ષા કરવામાં આવશે. એ બાદ કાર્યકરોને ફરી પૂછવામાં આવશે.

પણ પક્ષ દ્વારા જે રીતે કોંગ્રેસ નવસર્જનનો પ્રયાસ શરુ કરાયો છે તેને જલદી પરિણામ મળશે કે કેમ તે વિશે હાલ કંઇ કહી શકાય તેમ નથી. કોંગ્રેસને આ માટે ભારે મહેનત કરવી પડે તેમ લાગી રહ્યું છે. ગુજરાતમાં ગામે ગામ અને તાલુકે તાલુકે સંગઠનને વધુ મજબુત બનાવવું પડશે અને તેના માટે નેતાઓ કરતા કાર્યકરોની વધારે જરુર પડશે તે ચોક્કસ વાત છે. 

છેલ્લા 30 વર્ષમાં ગુજરાત કોંગ્રેસમાં આ નેતાઓએ પ્રમુખ પદ સંભાળેલું છે. તે પ્રમાણે જોઇએ તો 1997થી 2001 સુધી સી.ડી.પટેલ, 2001થી 2002 સુધી અમરસિંહ ચૌધરી, 2002થી 2004 સુધી શંકરસિંહ વાઘેલા, 2004થી 2005 સુધી બી.કે.ગઢવી, 2006થી 2008 સુધી ભરતસિંહ સોલંકી, 2008થી 2011 સુધી સિદ્ધાર્થ પટેલ, 2011થી 2015 સુધી અર્જુન મોઢવાડિયા, તથા 2015થી 2018 સુધી ભરતસિંહ સોલંકી, 2018થી 2021 સુધી અમિત ચાવડા તથા 2021થી 2023 સુધી જગદીશ ઠાકોર અને 2023થી 2025 સુધી શક્તિસિંહ ગોહિલ પ્રમુખ પદે રહ્યા હતા. આ રીતે છેલ્લા 30 વર્ષમાં 11 આગેવાનોએ કોંગ્રેસ પ્રમુખનો કાંટાળો તાજ પહેરેલો છે. 

આ પણ વાંચો--- પેટા ચૂંટણીઓમાં કારમી હારના 4 કલાકમાં GPCCના પ્રમુખ શક્તિસિંહનું રાજીનામુ