Azam Khan Money Laundering Case: સમાજવાદી પાર્ટીના વરિષ્ઠ નેતા આઝમ ખાનને અલ્હાબાદ હાઈકોર્ટમાંથી મળેલી વચગાળાની જામીનની રાહત સામે એન્ફોર્સમેન્ટ ડિરેક્ટોરેટ (ED) સુપ્રીમ કોર્ટ પહોંચ્યું છે. EDએ જામીનના આદેશને પડકારતાં તાત્કાલિક સુનાવણીની માગ કરી હતી. સુપ્રીમ કોર્ટે 19 નવેમ્બરે સુનાવણી કરવા સંમતિ આપી છે, પરંતુ આઝમ ખાનના જામીન પર તાત્કાલિક રોક લગાવવાની એજન્સીની મૌખિક વિનંતી સ્વીકારી નથી.
આઝમ ખાનના મની લોન્ડરિંગ કેસમાં કાનૂની લડાઈ હવે સુપ્રીમ કોર્ટ સુધી પહોંચી
સમાજવાદી પાર્ટીના નેતા અને ઉત્તર પ્રદેશના પૂર્વ કેબિનેટ મંત્રી આઝમ ખાનના મની લોન્ડરિંગ કેસમાં કાનૂની લડાઈ હવે સુપ્રીમ કોર્ટ સુધી પહોંચી છે. અલ્હાબાદ હાઈકોર્ટે 17 નવેમ્બરે આઝમ ખાનને વચગાળાના જામીન આપ્યા બાદ EDએ આ નિર્ણયને પડકાર્યો છે. એજન્સીએ સુપ્રીમ કોર્ટમાં અરજી કરીને હાઈકોર્ટના આદેશ સામે તાત્કાલિક સુનાવણીની માગ કરી હતી. મુખ્ય ન્યાયાધીશ સૂર્યકાંત, ન્યાયાધીશ જોયમલ્યા બાગચી અને ન્યાયાધીશ વી. મોહનાની બેન્ચે EDની તાત્કાલિક સુનાવણીની વિનંતી સ્વીકારીને 19 નવેમ્બરે કેસની સુનાવણી રાખવા સંમતિ આપી હતી. જોકે, આઝમ ખાનના વચગાળાના જામીન પર તાત્કાલિક રોક લગાવવા અને યથાસ્થિતિ જાળવવાની EDની મૌખિક માગને કોર્ટે ફગાવી દીધી હતી.
'આકાશ નહીં પડી જાય', સુપ્રીમ કોર્ટની ટિપ્પણી ચર્ચામાં
સુનાવણી દરમિયાન ED તરફથી હાજર એડિશનલ સોલિસિટર જનરલ એસ.વી. રાજુએ દલીલ કરી હતી કે જો જામીનના આદેશ પર તાત્કાલિક રોક નહીં લગાવવામાં આવે તો આઝમ ખાન જેલમાંથી મુક્ત થઈ જશે. તેના જવાબમાં જસ્ટિસ જોયમલ્યા બાગચીએ ટિપ્પણી કરી હતી કે, "આકાશ તો નહીં પડી જાય! તેમને વચગાળાના જામીન પર રહેવા દો." EDએ અલ્હાબાદ હાઈકોર્ટના આદેશ સામે વાંધો ઉઠાવતાં દલીલ કરી હતી કે એજન્સીને પોતાનો સંપૂર્ણ જવાબ દાખલ કરવા માટે પૂરતો સમય આપ્યા વિના ઉતાવળમાં નિર્ણય લેવામાં આવ્યો હતો. EDનો દાવો છે કે તેણે આઝમ ખાનની ધરપકડને સમર્થન આપતા દસ્તાવેજો રજૂ કરવાનો પ્રયાસ કર્યો હતો, પરંતુ આઝમ ખાને તે સ્વીકારવાનો ઇનકાર કર્યો હતો. હવે 19 નવેમ્બરની સુનાવણીમાં સુપ્રીમ કોર્ટ EDની દલીલો અને અલ્હાબાદ હાઈકોર્ટના વચગાળાના જામીનના આદેશ પર શું વલણ અપનાવે છે તેના પર રાજકીય અને કાનૂની વર્તુળોની નજર છે.
અલ્હાબાદ હાઈકોર્ટે કેમ આપ્યા હતા આઝમ ખાનને જામીન?
17 નવેમ્બર, 2026ના રોજ અલ્હાબાદ હાઈકોર્ટની જસ્ટિસ રાજીવ ગુપ્તા અને જસ્ટિસ દેવેન્દ્ર સિંહની બેન્ચે મની લોન્ડરિંગ કેસમાં આઝમ ખાનને વચગાળાના જામીન આપ્યા હતા. હાઈકોર્ટે પ્રાથમિક દૃષ્ટિએ નોંધ્યું હતું કે EDએ ધરપકડ દરમિયાન પ્રિવેન્શન ઓફ મની લોન્ડરિંગ એક્ટ (PMLA)ની કલમ 19 અને ભારતીય બંધારણની કલમ 22(1) હેઠળની ફરજિયાત પ્રક્રિયાનું યોગ્ય રીતે પાલન કર્યું નહોતું. કોર્ટે નોંધ્યું હતું કે ધરપકડનાં કારણો અને સંબંધિત દસ્તાવેજો આઝમ ખાનને રિમાન્ડ પહેલાં લેખિતમાં આપવામાં આવ્યા હોવાના પૂરતા પુરાવા રેકોર્ડ પર દેખાતા નથી. આ સંજોગોને ધ્યાનમાં રાખીને કોર્ટે ધરપકડની કાર્યવાહી પ્રથમ દૃષ્ટિએ પ્રેરિત અને દ્વેષપૂર્ણ હોવાની ટિપ્પણી કરી હતી.
જેલમાંથી બહાર આવતાં જ EDએ કરી હતી ધરપકડ
આઝમ ખાનની 31 ઓક્ટોબર, 2026ના રોજ રામપુર જેલના દરવાજા બહાર ED દ્વારા ધરપકડ કરવામાં આવી હતી. તેઓ અગાઉના એક કેસમાં જામીન મળ્યા બાદ જેલમાંથી બહાર આવ્યા હતા. ત્યારબાદ જૌહર યુનિવર્સિટી અને મૌલાના મોહમ્મદ અલી જૌહર ટ્રસ્ટ સાથે જોડાયેલા કથિત નાણાકીય વ્યવહારો અને મની લોન્ડરિંગની તપાસના સંદર્ભમાં EDએ તેમની સામે કાર્યવાહી કરી હતી. EDની તપાસમાં સરકારી ભંડોળના કથિત દુરુપયોગ, કોન્ટ્રાક્ટરો પાસેથી મળેલા દાન અને યુનિવર્સિટીના બાંધકામ સાથે જોડાયેલા નાણાકીય વ્યવહારોની તપાસ કરવામાં આવી રહી છે. આઝમ ખાન સામેના આક્ષેપો હજુ કોર્ટમાં સાબિત થયા નથી. હાઈકોર્ટે EDને એક અઠવાડિયામાં વિગતવાર જવાબ દાખલ કરવા અને આઝમ ખાનના પક્ષને ત્યારબાદ જવાબ રજૂ કરવાની તક આપી હતી. આ કેસની આગામી સુનાવણી અલ્હાબાદ હાઈકોર્ટમાં 10 ડિસેમ્બરે નિર્ધારિત છે. હવે સુપ્રીમ કોર્ટમાં 19 નવેમ્બરે થનારી સુનાવણી આઝમ ખાનના વચગાળાના જામીન અને EDની કાનૂની દલીલો માટે મહત્વપૂર્ણ બની શકે છે. આઝમ ખાનને મળેલી રાહત યથાવત્ રહેશે કે નહીં, તેના પર સૌની નજર છે.