IPO નિયમોમાં ફેરફાર; હવે લિસ્ટિંગ થશે સરળ

ભારત સરકારના નાણા મંત્રાલયે દેશના શેરબજારમાં લિસ્ટ થવા માંગતી કંપનીઓ માટે આઈપીઓ (IPO) ના નિયમોમાં મહત્વના સુધારા જાહેર કર્યા છે. ડિપાર્ટમેન્ટ ઓફ ઈકોનોમિક અફેર્સ (DEA)એ શુક્રવારે જાહેર કરેલા નોટિફિકેશન મુજબ, હવે લિસ્ટેડ શેરના લઘુત્તમ જાહેર હિસ્સાને 5% થી ઘટાડીને 2.5% કરવામાં આવ્યો છે. આ ફેરફારથી ખાસ કરીને મોટી નેટવર્થ ધરાવતી કંપનીઓને લિસ્ટિંગમાં મોટી રાહત મળશે.

નવા નિયમોની મુખ્ય વિશેષતાઓ:

કંપનીના લિસ્ટિંગ પછીના મૂલ્યના આધારે પબ્લિક શેરહોલ્ડિંગ નક્કી કરવામાં આવ્યું છે:

₹1,600 કરોડ સુધીનું કેપિટલ: ઓછામાં ઓછું 25% પબ્લિક શેરહોલ્ડિંગ.

₹1,600 થી ₹4,000 કરોડ: ₹400 કરોડની કિંમતના શેર ઓફર કરવા પડશે.

₹4,000 થી ₹50,000 કરોડ: ઓછામાં ઓછો 10% હિસ્સો જાહેર જનતાને આપવો પડશે (3 વર્ષમાં 25% સુધી વધારવો જરૂરી).

₹1 લાખ થી ₹5 લાખ કરોડ: લિસ્ટિંગ સમયે ઓછામાં ઓછો 2.75% હિસ્સો જાહેર કરવો પડશે.

₹5 લાખ કરોડથી વધુ: લિસ્ટિંગ સમયે ઓછામાં ઓછો 1% હિસ્સો ઓફર કરી શકાશે (આ હિસ્સો 5 વર્ષમાં 15% અને 10 વર્ષમાં 25% સુધી લઈ જવાનો રહેશે).

કોને થશે સૌથી મોટો ફાયદો?

માર્કેટ એક્સપર્ટ્સના મતે, આ સુધારાથી રિલાયન્સની માલિકીની Jio Platforms અને નેશનલ સ્ટોક એક્સચેન્જ (NSE) ના લાંબા સમયથી રાહ જોવાતા IPO માટે રસ્તો સાફ થઈ ગયો છે. ખાસ કરીને જિઓ પ્લેટફોર્મ્સનું લિસ્ટિંગ ભારતનો અત્યાર સુધીનો સૌથી મોટો IPO સાબિત થઈ શકે છે. રિલાયન્સ જૂથ આ વર્ષે એપ્રિલ સુધીમાં ડ્રાફ્ટ પેપર્સ ફાઈલ કરે તેવી શક્યતા છે.

વર્ષ 2025 ના શાનદાર ગાળા બાદ હાલમાં IPO માર્કેટ થોડું શાંત જણાતું હતું. સરકારના આ નવા નિયમોથી મોટી કોર્પોરેટ કંપનીઓ બજારમાં પ્રવેશવા પ્રોત્સાહિત થશે, જેનાથી રોકાણકારો માટે નવી તકો ઊભી થશે અને બજારમાં લિક્વિડિટી વધશે.