પાકિસ્તાની આર્મી ચીફે ઝેર ઓકવું, 1971 ની હારનો બદલો લેવાની ધમકી, ભારતને તોડવાના હવાતીયાં!

એક તરફ પાકિસ્તાન આર્થિક કટોકટી અને આંતરિક અશાંતિથી ઘેરાયેલું છે, ત્યારે બીજી તરફ તેના આર્મી ચીફ આસિમ મુનીરે અમેરિકાના પ્રવાસે જઈને ભારત વિરુદ્ધ ઝેર ઓકવાનું શરૂ કર્યું છે. વોશિંગ્ટનમાં પાકિસ્તાની સમુદાયને સંબોધન કરતી વખતે મુનીરે 1971 ના યુદ્ધમાં મળેલી શરમજનક હારનો બદલો લેવા અને ભારતને "તોડી નાંખવા" જેવા બેફામ નિવેદનો આપ્યા હતા, જે તેમની હતાશા અને વાસ્તવિકતાથી દૂર ભાગવાની માનસિકતા દર્શાવે છે.

કાશ્મીર અને ચીન સાથે મળીને લડતના પોકળ દાવા...

મુનીરે પોતાના ભાષણમાં કાશ્મીર મુદ્દાને ઉછાળીને ભારત વિરુદ્ધ ચીન સાથે મળીને લડતના પોકળ દાવા કર્યા હતા. તેમણે તો ત્યાં સુધી કહ્યું કે, પાકિસ્તાને ભારત વિરુદ્ધ "સાઇબર યુદ્ધ" લડ્યું છે અને ભારતીય ટ્રેન અને ગ્રીડ સિસ્ટમ હેક કરી છે. મુનીરના આ દાવા મુજબ, પાકિસ્તાને દિલ્હી નજીક ડ્રોન મોકલ્યા હતા અને ભારતના 70% ગ્રીડ સ્ટેશન બંધ કરી દીધા હતા, જે તદ્દન પાયાવિહોણા અને હાસ્યાસ્પદ છે. આવા અવાસ્તવિક દાવા કરીને તેઓ કદાચ પોતાના દેશની જનતાને ભ્રમિત કરવાનો પ્રયાસ કરી રહ્યા છે.

ચીન પાસેથી હથિયારોની કબૂલાત અને "સારા સમાચાર"ની ધમકી...

આસિમ મુનીરે ખુલ્લેઆમ કબૂલ્યું હતું કે, પાકિસ્તાને ચીન પાસેથી મોટા પાયે હથિયારો ખરીદ્યા છે. આ કબૂલાત વૈશ્વિક સ્તરે ચીન-પાકિસ્તાન ધરીના ખતરનાક ઇરાદાઓને વધુ સ્પષ્ટ કરે છે. આ ઉપરાંત, તેમણે કાશ્મીર મુદ્દે "સારા સમાચાર" આપવાની ધમકી પણ આપી હતી, જે ભારતની આંતરિક બાબતોમાં દખલગીરીનો સ્પષ્ટ સંકેત છે અને ભવિષ્યમાં પાકિસ્તાનના નાપાક ઇરાદાઓ તરફ ઈશારો કરે છે.

આ પણ વાંચો : ભારતીય નૌકાદળમાં અત્યાધુનિક જહાજ INS ‘અર્ણાલા’નો સમાવેશઃ સમુદ્રી શક્તિમાં વધારો

જેહાદી કલ્ચર માટે અમેરિકાને જવાબદાર ઠેરવ્યું...

આસિમ મુનીરે પોતાના ભાષણમાં જેહાદી કલ્ચરના વિકાસ માટે સીધો અમેરિકાને જવાબદાર ઠેરવ્યું હતું. આ આરોપ તદ્દન બેબુનિયાદ છે અને પાકિસ્તાન પોતાની આંતરિક સમસ્યાઓ તથા આતંકવાદને પોષવાની નીતિનો દોષ બીજા પર ઢોળી રહ્યું છે. પાકિસ્તાન વિશ્વમાં આતંકવાદના ગઢ તરીકે ઓળખાય છે, અને તેના આર્મી ચીફ દ્વારા આવા નિવેદનો આપવા એ તેમની માનસિક દિવાળિયાપણું દર્શાવે છે.

આ પણ વાંચો : ભારત-કેનેડા સાથે દ્વિપક્ષીય સંબંધોમાં સુધારાની શરૂઆત, હાઈ કમિશનરોને પાછા મોકલવાનો નિર્ણય

પાકિસ્તાની આર્મી ચીફ આસિમ મુનીરના આ નિવેદનો દર્શાવે છે કે, પાકિસ્તાન હજુ પણ ભારત પ્રત્યે દ્વેષભાવ રાખે છે અને પ્રાદેશિક શાંતિ માટે ખતરો બની રહ્યું છે. ભારતે આવા ઉશ્કેરણીજનક નિવેદનોને ગંભીરતાથી લેવા જોઈએ અને પોતાની સુરક્ષા વ્યવસ્થાને વધુ મજબૂત બનાવવી જોઈએ. વિશ્વ સમુદાયે પણ પાકિસ્તાનના આતંકવાદી માનસિકતાને વખોડવી જોઈએ અને તેને જવાબદાર ઠેરવવું જોઈએ.

આ પણ વાંચો : ઈન્ડોનેશિયામાં ફાટ્યો જ્વાળામુખી, એર ઇન્ડિયાની વધુ એક ફ્લાઇટ પરત