મારી જિંદગી શા માટે બરબાદ કરી? લાલૂ પરિવાર પર ભડકી એશ્વર્યારાય

બિહારના ભૂતપૂર્વ મુખ્યમંત્રી અને રાષ્ટ્રીય જનતા દળ (RJD)ના વડા લાલુ પ્રસાદ યાદવના મોટા પુત્ર તેજ પ્રતાપ યાદવને પાર્ટી અને ઘરમાંથી હાંકી કાઢવામાં આવ્યા બાદ તેમની પત્ની ઐશ્વર્યા રાય પહેલી વાર મીડિયા સમક્ષ હાજર થઈ. સોમવારે એક પ્રેસ કોન્ફરન્સને સંબોધતી વખતે, ઐશ્વર્યાએ લાલુ યાદવના પરિવાર પર નિશાન સાધ્યું અને અનેક પ્રશ્નો પૂછ્યા.

સોમવારે એક પ્રેસ કોન્ફરન્સમાં ઐશ્વર્યા રાયે કહ્યું કે, "હું પૂછવા માંગુ છું કે જ્યારે આ લોકો (લાલુ યાદવનો પરિવાર) જાણતા હતા કે તેજ પ્રતાપ સાથે આવી ઘટનાઓ બની રહી છે, તો પછી તેઓએ મારા લગ્ન કેમ કરાવ્યા, મારું જીવન કેમ બરબાદ કર્યું? તેમને પૂછો કે, તેમણે મને કેમ મારી? હવે તેમનો સામાજિક ન્યાય ક્યાં ગયો છે? તેઓ બધા એક થઈ ગયા છે, કોઈ અલગ થયું નથી. ગઈકાલે પણ રાબડી દેવી તેજ પ્રતાપ પાસે તેમના આંસુ જોવા ગયા હશે, તેમને કહ્યું હશે કે, હાલ શાંત રહો, હું બધું બરાબર કરીશ. ચૂંટણી નજીક છે, તેથી જ તેમણે આવું પગલું ભર્યું અને આ નાટક રચ્યું."

ઐશ્વર્યા રાયે વધુમાં જણાવ્યું કે, મને મારા છૂટાછેડાના કેસ વિશે મીડિયા દ્વારા ખબર પડી. મને જે પણ માહિતી મળે છે, તે બધી મીડિયા દ્વારા મળે છે. મને ખબર ન હતી કે શું ચાલી રહ્યું છે? તેને પૂછો, મારું જીવન બરબાદ કરવાની શું જરૂર હતી? જ્યારે મને માર મારવામાં આવ્યો ત્યારે તેમનો સામાજિક ન્યાય ક્યાં હતો? તેમને પૂછો, મારું શું થશે?

તેમણે કહ્યું કે, તેઓ દરેક વસ્તુ માટે મને દોષ આપે છે. હવે જ્યારે એ વાત સામે આવી છે કે, તેમનું 12 વર્ષથી અફેર છે, તો શું લાલુ યાદવ, રાબડી અને તેજસ્વી યાદવને આ ખબર નહીં હોય? પોતાના દીકરાની ભૂલનો દોષ છુપાવવા માટે તેઓ છોકરી પર દોષારોપણ કરે છે. બધા જ સામેલ છે, મને ન્યાય ક્યારે મળશે? હું મારી લડાઈ ચાલુ રાખીશ.

બીજી તરફ, RJDના વડા લાલુ પ્રસાદ યાદવે તેજ પ્રતાપ યાદવને પાર્ટીમાંથી હાંકી કાઢવા અંગે મીસા ભારતીએ જણાવ્યું કે, "અમારી પાર્ટીના રાષ્ટ્રીય અધ્યક્ષ અને અમારા પરિવારના વડા, અમારા પિતા લાલુ પ્રસાદ યાદવે પોતાનું વલણ સ્પષ્ટ કરી દીધું છે. આ સિવાય, અમારી પાસે કહેવા માટે વધુ કંઈ નથી."

આ પહેલા તેજ પ્રતાપ યાદવના અન્ય એક મહિલા સાથેના ફોટા અને વીડિયો સોશિયલ મીડિયા પર વાયરલ થયા હતા. આ અંગે તેજ પ્રતાપે સ્પષ્ટતા કરી હતી કે, તેમનું સોશિયલ મીડિયા એકાઉન્ટ હેક થઈ ગયું છે.

વિવાદ વધતાં લાલુ પ્રસાદ યાદવે રવિવારે સોશિયલ મીડિયા પ્લેટફોર્મ X પર પોસ્ટ કરીને તેજ પ્રતાપ યાદવને પાર્ટી અને પરિવારમાંથી બહારનો રસ્તો બતાવ્યો હતો. આ બધા વચ્ચે, ઐશ્વર્યા રાય સોમવારે મીડિયા સમક્ષ હાજર થઈ અને તેજ પ્રતાપના કેસ અંગે લાલુ યાદવના પરિવારને કઠેડામાં મૂક્યો.