વૃંદાવનમાં પૂંછડીવાળા ચોરનો આતંક, 20 લાખના ઘરેણાં લઈને ફરાર

વૃંદાવનમાં વાંદરાઓના ત્રાસના અનેક કિસ્સાઓ સામે આવતા રહે છે. ગુરુવારે વધુ એક ચોંકાવનારી ઘટના બની જ્યારે એક વાંદરાએ અલીગઢથી આવેલા શ્રદ્ધાળુ પરિવારની મહિલાની પાસે કિશોપુરા તિરાહા પાસે થી 20 લાખના હીરાના ઘરેણાંથી ભરેલું પર્સ છીનવી લીધો.

આ પરિવાર ઠાકુર બાંકેબિહારી મંદિરમાં ફુલ બંગ્લાની સેવા આપવા આવ્યા હતા. સાંજની સેવા બાદ તેઓ મંદિરમાંથી પરત ફરી રહ્યા હતા ત્યારે રાત્રે સાડા દસ વાગ્યે આ ઘટનાએ લોકોમાં ખળભળાટ મચાવી દીધો. પરિવાર અને આસપાસના લોકોએ વાંદરાનો લાંબે સુધી પીછો કર્યો, પરંતુ વાંદરો મકાનની છત પર ચડી ગયો અને પર્સમાંથી ઘરેણાં ફેંકવા લાગ્યો.

ફ્રૂટી આપી પર્સ પાછું મેળવવાનો પણ પ્રયાસ કરાયો હતો, પણ સફળતા મળી નહોતી. પરિવાર દ્વારા તાત્કાલિક બાંકેબિહારી પોલીસ ચોકીમાં ફરિયાદ નોંધાવાઈ હતી.

પોલીસ સ્ટેશન ઇન્ચાર્જ પ્રશાંત કપિલ અને ચોકી પ્રભારી સહિત પોલીસ ટીમે આખી રાત છાપરાઓ પર કૂદાકૂદ કરી. વાંદરાએ પર્સ ફાડી નાખ્યું હતું અને ઘરેણાં અલગ અલગ સ્થળે વેરાઈ ગયા હતા. આખરે સવારે 6 વાગ્યે હીરાનો હાર, બે વીટીં અને બે ટાપ્સ સહિત ઘરેણાં એકત્રિત કરવામાં આવ્યા.

પરિવારના જણાવ્યા અનુસાર, પર્સમાં કુલ 20 લાખના ઘરેણાં હતાં. પોલીસના જણાવ્યા મુજબ, વાંદરો હજુ પણ પકડાયો નથી અને ઘટનાની વધુ તપાસ ચાલી રહી છે.