બિહારમાં વંદે ભારત ટ્રેન અકસ્માત: 3નાં મોત

બિહારના પૂર્ણિયા જિલ્લામાં આજે વહેલી સવારે એક દર્દનાક રેલવે અકસ્માત સર્જાયો હતો. દશેરાનો મેળો જોઈને પરત ફરી રહેલા લોકો જોગબની-દાનાપુર વંદે ભારત એક્સપ્રેસ ટ્રેનની અડફેટમાં આવી ગયા હતા. આ દુર્ઘટનામાં 3 લોકોના ઘટનાસ્થળે જ મોત નીપજ્યા છે, જ્યારે બે વ્યક્તિ ગંભીર રીતે ઘાયલ થયા છે.

ક્યાં અને કેવી રીતે બની ઘટના?

આ દુર્ઘટના કટિહાર-જોગબની રેલખંડ પર કસબા જબનપુર પાસે બની હતી. પ્રારંભિક માહિતી મુજબ, મૃત્યુ પામેલા તમામ લોકો દશેરાનો મેળો જોઈને પરત ફરી રહ્યા હતા. અરરિયાના જોગબનીથી પટનાના દાનાપુર જઈ રહેલી વંદે ભારત એક્સપ્રેસ ટ્રેન સામે અચાનક આવી જવાથી આ અકસ્માત થયો હતો.  આ અકસ્માતમાં 3ના કરુણ મોત નીપજ્યા છે જ્યારે 2 વ્યક્તિઓ ગંભીર રીતે ઘયાલ થયા છે. ઘાયલ વ્યક્તિઓને પૂર્ણિયાની સરકારી મેડિકલ કોલેજમાં દાખલ કરવામાં આવ્યા છે.

ઘટનાની જાણ થતા જ સ્થાનિક પોલીસ અને રેલવે સુરક્ષા દળ (RPF)ની ટીમ તાત્કાલિક સ્થળ પર પહોંચી ગઈ હતી. પોલીસે મૃતદેહોને પોસ્ટમોર્ટમ માટે મોકલી આપ્યા છે.

સુરક્ષા પર ગંભીર સવાલો

આ ઘટના રેલવે ટ્રેક પર સુરક્ષા નિયમોની ગંભીર ઉપેક્ષા તરફ ઈશારો કરે છે. સીમાંચલને રાજધાની પટના સાથે જોડતી આ વંદે ભારત એક્સપ્રેસનું નિયમિત સંચાલન 17 સપ્ટેમ્બરથી જ શરૂ થયું છે અને ટૂંકા ગાળામાં વંદે ભારત ટ્રેનની અડફેટમાં આવીને થયેલું આ બીજું મૃત્યુ છે. આ પહેલા 30 સપ્ટેમ્બરે પણ સહારસા પાસે એક વૃદ્ધનું મોત થયું હતું. રેલવે અધિકારીઓએ લોકોને ટ્રેક પાર કરતી વખતે અત્યંત સાવધાની રાખવા અપીલ કરી છે.