ઉત્તરકાશી હેલિકોપ્ટર દુર્ઘટના | મૃતક પાઇલટ વડોદરાનો, પરિવાર પાર્થિવ દેહ લેવા રવાના

ચારધામ યાત્રા દરમિયાન ગુરુવારે ઉત્તરાખંડના ઉત્તરકાશી જિલ્લામાં એક હેલિકોપ્ટર દુર્ઘટનાગ્રસ્ત થયું હતું. આ હેલિકોપ્ટર મુસાફરોને બરસાલીથી ગંગોત્રી તરફ લઈ જઈ રહ્યું હતું. ખાનગી એરોટ્રાન્સ કંપનીનું આ સાત સીટર હેલિકોપ્ટર ગંગોત્રી નજીક તૂટી પડ્યું હતું. આ દુર્ઘટનામાં વડોદરાના પ્રતાપગંજ વિસ્તારમાં રહેતા 59 વર્ષીય પાઇલટ રોબિન સિંહનું પણ કરૂણ મોત થયું હતું.

રોબિન સિંહ છેલ્લા ત્રણ-ચાર વર્ષથી એરોટ્રાન્સ કંપનીમાં પાઇલટ તરીકે સેવા આપી રહ્યા હતા અને તેમનો પરિવાર વડોદરામાં રહે છે. દુર્ઘટનાની જાણ થતાં જ તેમનો પરિવાર ઉત્તરકાશી જવા રવાના થયો હતો. રોબિન સિંહને બે ભાઈઓ અને બે બહેનો છે. તેમની પત્ની ગૃહિણી છે અને એક પુત્રી અભ્યાસ કરે છે, જ્યારે તેમનો નાનો ભાઈ બેંગ્લોરમાં એક ખાનગી કંપનીમાં કામ કરે છે. આ દુઃખદ ઘટનાથી પરિવાર અને સગાંસંબંધીઓમાં ભારે શોકની લાગણી છવાઈ ગઈ છે. તેમના મોટા ભાઈ રિકા સિંહ તેમના પાર્થિવ દેહને વડોદરા લાવવા માટે ઉત્તરકાશી જવા નીકળ્યા છે.

મહત્વની વાત એ છે કે કેપ્ટન રોબિન સિંહ અગાઉ એરફોર્સમાં ગ્રુપ કેપ્ટન તરીકે સેવા આપી ચૂક્યા હતા અને બે વર્ષ સુધી તેમણે ગુજરાતના મુખ્યમંત્રી ભૂપેન્દ્ર પટેલના હેલિકોપ્ટરના પાઇલટ તરીકે પણ ફરજ બજાવી હતી. નિવૃત્ત થયા બાદ તેઓ ખાનગી કંપનીમાં પોતાની સેવાઓ આપી રહ્યા હતા. તેઓ એક સપ્તાહ પહેલાં જ બે મહિના માટે દહેરાદૂન ગયા હતા.

નોંધનીય છે કે ઉત્તરકાશીમાં છેલ્લા કેટલાક સમયથી હવામાન ખરાબ ચાલી રહ્યું છે અને હવામાન વિભાગ દ્વારા આ અંગે એલર્ટ પણ જાહેર કરવામાં આવ્યું હતું. ચારધામ યાત્રાના માર્ગમાં ઘણી જગ્યાએ ભારે વરસાદના સમાચાર પણ મળ્યા હતા.