India Pakistan War: ઉરી સરહદી ગામો ખાલી કરાવવામાં આવ્યા, લોકોને શ્રીનગર મોકલાયા

પાકિસ્તાન અને ભારત વચ્ચે વધી રહેલા તણાવને ધ્યાનમાં રાખીને, ઉરી જિલ્લાના તમામ સરહદી ગામોને ખાલી કરાવવામાં આવ્યા છે. બધા નાગરિકોને બસ દ્વારા શ્રીનગર મોકલવામાં આવી રહ્યા છે.

ભારત દ્વારા આ પગલું એવા સમયે લેવામાં આવ્યું છે  જ્યારે પાકિસ્તાન સતત ભારતીય સરહદ પર હુમલો કરવાનો પ્રયાસ કરી રહ્યું છે, ભારત દ્વારા પાકિસ્તાન અને પીઓકેમાં આતંકવાદી ઠેકાણાઓ પર હવાઈ હુમલો કર્યા પછી ૮ અને ૯ મેની રાત્રે, પાકિસ્તાને ભારતને નિશાન બનાવીને અનેક ડ્રોન અને મિસાઇલો છોડ્યા, જેને ભારતીય સેનાએ હવામાં જ તોડી પાડ્યા.

દરમિયાન, પાકિસ્તાન તરફથી LoC પર કોઈ ઉશ્કેરણી વિના ગોળીબાર ચાલુ છે. પાકિસ્તાને ઉરી સેક્ટરના લઘમા ગામને પણ નિશાન બનાવ્યું છે. લઘમા ગામમાં સરહદ પારથી પડેલા બોમ્બથી એક દુકાનનો નાશ થયો.

આ બોમ્બ એક દુકાન પાસે પડ્યો હતો, જેના કારણે દુકાન સંપૂર્ણપણે બળીને રાખ થઈ ગઈ હતી. છેલ્લા કેટલાક દિવસોથી, પાકિસ્તાને નિયંત્રણ રેખા નજીક મોટા પાયે ગોળીબાર કર્યો છે, જેના કારણે જાનમાલનું મોટું નુકસાન થયું છે.

બીજી તરફ, શુક્રવારે, બોર્ડર સિક્યુરિટી ફોર્સ (BSF) ના જવાનોએ જમ્મુ અને કાશ્મીરના સાંબા જિલ્લામાં આંતરરાષ્ટ્રીય સરહદ પર ઘૂસણખોરીના પ્રયાસને નિષ્ફળ બનાવ્યો અને સાત આતંકવાદીઓને ઠાર માર્યા.

બીએસએફના સૂત્રોએ જણાવ્યું હતું કે ભારે હથિયારોથી સજ્જ આતંકવાદીઓના એક જૂથે પાકિસ્તાની રેન્જર્સની મદદથી સાંબા જિલ્લામાં આંતરરાષ્ટ્રીય સરહદની ભારતીય બાજુમાં ઘૂસણખોરી કરવાનો પ્રયાસ કર્યો હતો.

સૂત્રોએ જણાવ્યું હતું કે, "ઘૂસણખોરીના આ નિષ્ફળ પ્રયાસ દરમિયાન સાત આતંકવાદીઓ માર્યા ગયા હતા. વિસ્તારમાં હજુ પણ કાર્યવાહી ચાલુ છે."

આ પહેલા ગુરુવારે મોડી સાંજે બારામુલા જિલ્લાના ઉરી સેક્ટરમાં પાકિસ્તાન દ્વારા નાગરિક વિસ્તારો પર ભારે મોર્ટારમારાથી એક મહિલાનું મોત થયું હતું અને બીજી એક મહિલા ઘાયલ થઈ હતી.

--આઈએએનએસ