J&K : લેફ્ટનન્ટ ગવર્નરનો આદેશ, 28 એપ્રિલે જમ્મુમાં વિધાનસભાનું વિશેષ સત્ર

જમ્મુ અને કાશ્મીરના લેફ્ટનન્ટ ગવર્નર મનોજ સિંહાએ જમ્મુ અને કાશ્મીર પુનર્ગઠન અધિનિયમ, 2019 ની કલમ 18 (1) હેઠળ મળેલી સત્તાનો ઉપયોગ કરીને જમ્મુ અને કાશ્મીર વિધાનસભાનું સત્ર બોલાવ્યું છે. જમ્મુ અને કાશ્મીરના લેફ્ટનન્ટ ગવર્નર દ્વારા શુક્રવારે અહીં બહાર પાડવામાં આવેલા આદેશ અનુસાર, વિધાનસભાનું સત્ર સોમવાર, 28 એપ્રિલ, 2025 ના રોજ સવારે 10:30 વાગ્યે જમ્મુ ખાતે મળશે.

સમન્સમાં લેફ્ટનન્ટ ગવર્નર મનોજ સિંહાએ જણાવ્યું હતું કે, "જમ્મુ અને કાશ્મીરના કેન્દ્રશાસિત પ્રદેશના લેફ્ટનન્ટ ગવર્નર તરીકે, મને જમ્મુ અને કાશ્મીર પુનર્ગઠન અધિનિયમ, 2019 ની કલમ 18 (1) હેઠળ મળેલી સત્તાનો ઉપયોગ કરીને, હું જમ્મુ અને કાશ્મીર વિધાનસભાને સોમવાર, 28 એપ્રિલ, 2025 ના રોજ સવારે 10.30 વાગ્યે જમ્મુ ખાતે મળવા માટે આદેશ કરું છું."

જમ્મુ અને કાશ્મીર વિધાનસભાના સચિવ દ્વારા પાડવામાં આવેલા એક આદેશમાં જણાવવામાં આવ્યું છે કે, "તે મુજબ, જમ્મુ અને કાશ્મીર વિધાનસભામાં કાર્યવાહી અને કાર્યસંચાલનના નિયમોના નિયમ 3 અનુસાર , તમામ સભ્યોને નિયત તારીખ, સમય અને સ્થળે વિધાનસભાના સત્રમાં હાજર રહેવા વિનંતી કરવામાં આવે છે"

ઉલ્લેખનીય છે કે, લગભગ એક મહિના સુધી ચાલેલું વિધાનસભાનું સત્ર 9 એપ્રિલ, 2025 ના રોજ સમાપ્ત થયું હતું. આ તાત્કાલિક ફરીથી સત્ર બોલાવવાનો નિર્ણય રાજકીય વર્તુળોમાં અનેક અટકળોને જન્મ આપી રહ્યો છે.