ઝાંસીમાં 524 ગેસ સિલિન્ડર ભરેલા ટ્રકની ચોરી

પશ્ચિમ એશિયામાં ઈઝરાયલ અને અમેરિકાના હુમલા બાદ સર્જાયેલી અસ્થિરતાની સીધી અસર હવે ભારતના સ્થાનિક બજારો પર જોવા મળી રહી છે. ઈરાન દ્વારા હોર્મુઝ સ્ટ્રેટમાં સપ્લાય અવરોધિત કરાતા દેશમાં રાંધણ ગેસની અછત વર્તાઈ રહી છે. આ પરિસ્થિતિનો લાભ ઉઠાવતા ઉત્તર પ્રદેશના ઝાંસીમાં તસ્કરોએ ગેસ સિલિન્ડર ભરેલા આખા ટ્રકને નિશાન બનાવ્યો હોવાની ચોંકાવનારી ઘટના બની છે.

₹18 લાખના 524 ગેસ સિલિન્ડર ગાયબ : 

પ્રાપ્ત વિગતો અનુસાર, ઝાંસીના સિપરી બજાર પોલીસ સ્ટેશન વિસ્તારમાંથી 524 ભરેલા LPG સિલિન્ડર સાથેના ટ્રકની ચોરી થઈ છે. આ જથ્થાની બજાર કિંમત અંદાજે 18 લાખ રૂપિયા હોવાનું મનાય છે. ટ્રક માલિકે પોલીસમાં નોંધાવેલી ફરિયાદ મુજબ, આ ટ્રક ભારત પેટ્રોલિયમ કોર્પોરેશનના પ્લાન્ટ સાથે જોડાયેલો હતો અને ગેસનો જથ્થો કાનપુર દેહાત પહોંચાડવાનો હતો.

GPS સિસ્ટમ તોડીને તસ્કરોએ આચર્યું કારસ્તાન : 

ટ્રક ડ્રાઈવરે હોળીના તહેવારને કારણે વાહનને પ્લાન્ટની બહાર સુરક્ષિત પાર્ક કર્યું હતું. જોકે, તસ્કરોએ તકનો લાભ ઉઠાવી ટ્રક હંકારી મૂક્યો હતો. બાદમાં આ ટ્રક બારાગાંવ પોલીસ સ્ટેશન વિસ્તારમાં હાઈવે પર બિનવારસી હાલતમાં મળી આવ્યો હતો. ચોંકાવનારી વાત એ છે કે, તસ્કરોએ પોલીસથી બચવા માટે વાહનની GPS સિસ્ટમ તોડી નાખી હતી અને ટ્રકમાંથી તમામ 524 સિલિન્ડર અન્ય વાહનમાં ખાલી કરીને ફરાર થઈ ગયા હતા.

યુદ્ધની અસર અને LPG પર નિયંત્રણ : 

વૈશ્વિક સ્તરે ઈરાન-ઇઝરાયલ તણાવને કારણે LPGનો પુરવઠો ખોરવાયો છે. ભારત પોતાની જરૂરિયાતનો મોટો હિસ્સો આ માર્ગેથી આયાત કરે છે. પુરવઠો ઘટતા કેન્દ્ર સરકારે હાલમાં કમર્શિયલ ઉપયોગ પર નિયંત્રણો પણ લાદ્યા છે. બજારમાં વધી રહેલી માંગ અને અછતને કારણે જ આ પ્રકારની મોટી ચોરીને અંજામ આપવામાં આવ્યો હોય તેવી પૂરેપૂરી શક્યતા છે.

પોલીસ તપાસનો ધમધમાટ : 

ઝાંસી પોલીસ હાલમાં હાઈવે પરના તમામ સીસીટીવી ફૂટેજ ચકાસી રહી છે. સ્ટેશન ઈન્ચાર્જ દ્વારા જણાવવામાં આવ્યું છે કે, અજાણ્યા શખ્સો સામે ગુનો નોંધીને સિલિન્ડર રિકવર કરવા માટે અલગ-અલગ ટીમો બનાવવામાં આવી છે. આમાં કોઈ મોટી ગેંગ અથવા પ્લાન્ટના આંતરિક વ્યક્તિની સંડોવણી છે કે કેમ તે દિશામાં પણ તપાસ કેન્દ્રિત કરવામાં આવી છે.