આજે ઐતિહાસિક દિવસ, લોકસભામાં રજૂ થશે વન નેશન, વન ઈલેક્શન બિલ

વન નેશન, વન ઈલેક્શન બિલને લઈને દેશમાં ચાલી રહેલી રાજનીતિ વચ્ચે ભાજપે તેના લોકસભા સાંસદો માટે વ્હીપ જાહેર કર્યો છે. એવું માનવામાં આવે છે કે મંગળવારે 'એક રાષ્ટ્ર, એક ચૂંટણી' બિલ લોકસભામાં રજૂ કરવામાં આવી શકે છે. લોકસભામાં ભાજપના ચીફ વ્હીપ ડૉ. સંજય જયસ્વાલે એક પત્ર જારી કરીને તમામ સાંસદોને મંગળવારે લોકસભામાં હાજર રહેવા જણાવ્યું છે. આ પત્રમાં કહેવામાં આવ્યું છે કે ભારતીય જનતા પાર્ટીના તમામ લોકસભા સાંસદોને જાણ કરવામાં આવે છે કે 17 ડિસેમ્બર, 2024 મંગળવારના રોજ લોકસભામાં ચર્ચા અને પસાર કરવા માટે કેટલાક ખૂબ જ મહત્વપૂર્ણ કાયદાકીય કામકાજ લાવવામાં આવશે. ભાજપના તમામ લોકસભા સભ્યોને મંગળવારે આખો સમય ગૃહમાં ફરજીયાત હાજર રહીને સરકારના સ્ટેન્ડને સમર્થન આપવા વિનંતી કરવામાં આવે છે.

તમને જણાવી દઈએ કે 20 ડિસેમ્બર સુધી સંસદનું શિયાળુ સત્ર છે. આ પહેલા ચર્ચા હતી કે 'વન નેશન, વન ઈલેક્શન' બિલ સોમવારે લોકસભામાં રજૂ કરવામાં આવી શકે છે. જોકે, સોમવારે ‘એક રાષ્ટ્ર, એક ચૂંટણી’ બિલ રજૂ કરવામાં આવ્યું ન હતું. ઉલ્લેખનીય છે કે 12 ડિસેમ્બરે વડાપ્રધાન નરેન્દ્ર મોદીની અધ્યક્ષતામાં મળેલી કેબિનેટની બેઠકમાં આ બિલને મંજૂરી આપવામાં આવી હતી. કેબિનેટે બે કાયદાના મુસદ્દાને મંજૂરી આપી હતી, જેમાંથી એક લોકસભા અને રાજ્ય વિધાનસભાઓની ચૂંટણી એકસાથે યોજવા સંબંધિત બંધારણ સુધારણા બિલ છે, જ્યારે અન્ય બિલ વિધાનસભા ધરાવતા ત્રણ કેન્દ્રશાસિત પ્રદેશો માટે એકસાથે ચૂંટણી યોજવા સંબંધિત છે.

સૂત્રોના જણાવ્યા અનુસાર આ બિલ પર સામાન્ય લોકોનો અભિપ્રાય લેવાની યોજના છે. ચર્ચા દરમિયાન, બિલના મુખ્ય પાસાઓ, તેના ફાયદા અને દેશભરમાં એક સાથે ચૂંટણીઓ માટે જરૂરી પદ્ધતિ અને ચૂંટણી વ્યવસ્થાપન પર ચર્ચા કરવામાં આવશે. કેન્દ્રીય સંરક્ષણ પ્રધાનો રાજનાથ સિંહ, અર્જુન રામ મેઘવાલ અને કિરેન રિજિજુને આ મુદ્દે વિરોધ પક્ષો સાથે વાતચીતની જવાબદારી માટે નિયુક્ત કરવામાં આવ્યા છે.