થાણે: વિદ્યાર્થિનીની છેડતી કરી ₹50 હજાર પડાવ્યા!

મહારાષ્ટ્રના થાણે શહેરમાંથી એક અત્યંત ચોંકાવનારી ઘટના સામે આવી છે, જેમાં 23 વર્ષના એક યુવકે 15 વર્ષની સગીર વિદ્યાર્થિનીને પ્રેમજાળમાં ફસાવી, તેની છેડતી કરી અને તેની પાસેથી હજારો રૂપિયા પડાવ્યા હોવાનો ઘટસ્ફોટ થયો છે. થાણે પોલીસે આ મામલે કડક કાર્યવાહી કરીને આરોપી પ્રથમેશ દેસાઈની ધરપકડ કરી છે.

પોલીસ તપાસમાં બહાર આવ્યું છે કે આરોપી પ્રથમેશ દેસાઈ સપ્ટેમ્બર 2025થી ફેબ્રુઆરી 2026 દરમિયાન સગીરાને નિશાન બનાવી રહ્યો હતો. વરતક નગર પોલીસ સ્ટેશનના અધિકારીએ જણાવ્યું કે, આરોપી સગીરાને અવારનવાર એકાંત સ્થળોએ લઈ જઈ તેની છેડતી કરતો હતો.

એટલું જ નહીં, તેણે સગીરાને ધમકી આપી હતી કે જો તે તેની માંગણીઓ પૂરી નહીં કરે, તો તે તેમના કથિત 'સંબંધ' વિશે તેના માતા-પિતાને જણાવી દેશે.

ડર બતાવીને ₹50,000 પડાવ્યા

બ્લેકમેલિંગના સહારે આરોપીએ છેલ્લા છ મહિનામાં ટુકડે-ટુકડે સગીરા પાસેથી કુલ ₹50,000 પડાવ્યા હતા. સતત વધતી જતી નાણાકીય માંગણીઓ અને ધમકીઓથી કંટાળીને અને માનસિક રીતે ભાંગી પડેલી વિદ્યાર્થિનીએ અંતે હિંમત ભેગી કરી તેના માતા-પિતાને આખી આપવીતી જણાવી હતી.

POCSO હેઠળ કડક કાર્યવાહી

1 માર્ચના રોજ સગીરાના માતા-પિતાએ પોલીસમાં ફરિયાદ નોંધાવી હતી, ત્યારબાદ પોલીસે તુરંત કાર્યવાહી કરી આરોપી પ્રથમેશને કસ્ટડીમાં લીધો છે.

પોલીસે તેની સામે ભારતીય ન્યાય સંહિતા (BNS) અને 'પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સ' (POCSO) એક્ટની વિવિધ કલમો હેઠળ ગુનો દાખલ કર્યો છે.

હાલમાં પોલીસ આ મામલે વધુ તપાસ કરી રહી છે કે શું આરોપીએ અન્ય કોઈ છોકરીઓને પણ આવી રીતે નિશાન બનાવી હતી કે કેમ.