UPનાં બારાબંકીના ઔસાનેશ્વર મંદિરમાં નાસભાગ

બારાબંકીના ઔસનેશ્વર મંદિરમાં શ્રાવણના સોમવારે કરંટ લાગવાથી નાસભાગ: 2નાં મોત, 29 ઘાયલ

બારાબંકી, ઉત્તર પ્રદેશ: શ્રાવણ મહિનાના ત્રીજા સોમવારે ઉત્તર પ્રદેશના બારાબંકી જિલ્લામાં આવેલા ઔસનેશ્વર મહાદેવ મંદિરમાં વહેલી સવારે એક મોટી દુર્ઘટના બની હતી. જળાભિષેક દરમિયાન મંદિર પરિસરમાં વીજ કરંટ લાગવાને કારણે નાસભાગ મચી ગઈ, જેમાં બે શ્રદ્ધાળુઓના ઘટનાસ્થળે જ મોત થયા હતા અને મહિલાઓ તથા બાળકો સહિત 29 લોકો ઘાયલ થયા હતા.

કરંટ લાગવાનું કારણ

આ દુર્ઘટના સોમવારે વહેલી સવારે લગભગ 2 વાગ્યે બની હતી. જિલ્લા મેજિસ્ટ્રેટ (DM) શશાંક ત્રિપાઠીએ જણાવ્યું હતું કે, કેટલાક વાનરો વીજળીના વાયર પર કૂદી પડ્યા હતા, જેના કારણે વાયર તૂટીને મંદિર પરિસરના ટીન શેડ પર પડ્યો. આના પરિણામે ટીન શેડમાં કરંટ ફેલાયો અને ત્યાં હાજર શ્રદ્ધાળુઓમાં ગભરાટ ફેલાઈ ગયો, જેનાથી નાસભાગ જેવી સ્થિતિ સર્જાઈ. મૃતકોની ઓળખ રમેશ કુમાર (35) અને પ્રશાંત કુમાર (16) તરીકે થઈ છે.

રાહત અને બચાવ કાર્ય

ઘટનાની જાણ થતાં જ તાત્કાલિક ધોરણે પોલીસ દળ ઘટનાસ્થળે પહોંચી ગયું હતું અને રાહત કાર્ય શરૂ કરવામાં આવ્યું હતું. તમામ ઘાયલોને એમ્બ્યુલન્સ દ્વારા હૈદરગઢ અને ત્રિવેદીગંજ સામુદાયિક આરોગ્ય કેન્દ્રો (CHC) ખાતે મોકલવામાં આવ્યા હતા. ગંભીર રીતે ઘાયલ થયેલા લોકોને વધુ સારવાર માટે જિલ્લા હોસ્પિટલમાં રીફર કરવામાં આવ્યા છે, જ્યાં તેમની સારવાર ચાલી રહી છે. ઔસનેશ્વર મંદિર જિલ્લા મુખ્યાલયથી લગભગ 40 કિલોમીટર દૂર આવેલું છે.

મુખ્યમંત્રી યોગી દ્વારા સહાયની જાહેરાત

ઉત્તર પ્રદેશના મુખ્યમંત્રી યોગી આદિત્યનાથે આ દુર્ઘટના પર ગહન દુઃખ વ્યક્ત કર્યું છે. તેમણે મૃતકોના પરિવારજનો પ્રત્યે સંવેદના વ્યક્ત કરતાં, તેમના પરિવારજનોને ₹5 લાખની આર્થિક સહાય આપવાની જાહેરાત કરી છે.

ઉલ્લેખનીય છે કે, આ પહેલા રવિવારે સવારે હરિદ્વારના મનસા દેવી મંદિરમાં પણ આવી જ નાસભાગની ઘટના બની હતી, જેમાં 8 લોકોના મોત થયા હતા અને 30થી વધુ લોકો ઘાયલ થયા હતા. ધાર્મિક સ્થળો પર આવી સતત ઘટનાઓ સલામતી વ્યવસ્થા અને ભીડ નિયંત્રણ પર ગંભીર સવાલો ઉભા કરે છે.