દેશના 18 રાજ્યોમાં ભયંકર ઠંડીનું એલર્ટ, કચ્છનું નલિયા 5.6 ડિગ્રી સાથે સૌથી ઠંડુ

વર્ષ 2025ની શરૂઆત થવા જઈ રહી છે અને આખા દેશમાં તીવ્ર ઠંડી પડી રહી છે. સમગ્ર દેશ હાલ હાડ થીજાવનારી ઠંડીની ઝપેટમાં છે. પર્વતોમાં હિમવર્ષા અને બર્ફીલા પવનો ફૂંકાઈ રહ્યા છે. તેની અસરને કારણે તાજેતરમાં મેદાની રાજ્યોમાં વરસાદ પડ્યો અને હવે તીવ્ર શીત લહેર ચાલી રહી છે, જેના કારણે લોકો થીજી ગયા. હિમાચલ પ્રદેશ, જમ્મુ કાશ્મીર અને ઉત્તરાખંડમાં ભારે હિમવર્ષા થઈ રહી છે. કોલ્ડવેવના કારણે ઉત્તર ભારતના તમામ રાજ્યોમાં તાપમાનમાં ઘટાડો નોંધાયો છે. ગુજરાતમાં 5.6 ડિગ્રી સાથે કચ્છનું નલિયા સૌથી ઠંડુગાર શહેર બન્યું છે. આજે રાજકોટમાં 9.3 અને ભુજમાં 10.4 ડિગ્રી તાપમાન, પોરબંદરમાં 11.4 અને અમરેલીમાં 12 ડિગ્રી તાપમાન , ડીસામાં 13 અને ગાંધીનગરમાં 14 ડિગ્રી તથા દ્વારકામાં 14.4 અને અમદાવાદમાં 15 ડિગ્રી તાપમાન નોંધાયું છે. બીજી તરફ આગામી દિવસોમાં ઠંડીમાં ઉત્તરોતર વધારો થવાની આગાહી છે. આગામી 10 જાન્યુઆરી સુધી રાજ્યમાં ઠંડીનું જોર રહેશે તેવી કડક ચેતવણી છે. 

જમ્મુ-કાશ્મીર અને લદ્દાખના ઘણા શહેરોમાં લઘુત્તમ તાપમાન 0 ડિગ્રીથી નીચે છે. ઉત્તર-પશ્ચિમ ભારતના ઘણા રાજ્યોમાં તાપમાન 6-12 ° સે વચ્ચે છે. મધ્ય, પશ્ચિમ અને પૂર્વીય ભારતના ઘણા ભાગો 12-18 ° સે વચ્ચે છે. ગઈ કાલે સૌથી ઓછું લઘુત્તમ તાપમાન સીકર (રાજસ્થાન)માં 5.7 ડિગ્રી સેલ્સિયસ નોંધાયું હતું. દિલ્હી-એનસીઆર પણ તીવ્ર ઠંડીની લપેટમાં છે. ભારતીય હવામાન વિભાગ (IMD) એ સક્રિય વેસ્ટર્ન ડિસ્ટર્બન્સને કારણે આગામી 5 જાન્યુઆરી સુધી સમગ્ર દેશમાં તીવ્ર ઠંડીનું એલર્ટ જાહેર કર્યું છે.

હવામાન વિભાગના અહેવાલ મુજબ, પશ્ચિમી વિક્ષેપ વ્યાપકપણે મધ્ય ઉષ્ણકટિબંધીય પશ્ચિમી પવનોના રૂપમાં જોવા મળ્યો છે. આના કારણે 1 થી 4 જાન્યુઆરી દરમિયાન પશ્ચિમ હિમાલય વિસ્તારમાં હળવાથી છૂટાછવાયા વરસાદ અને હિમવર્ષાની પ્રબળ સંભાવના છે. 6 જાન્યુઆરી, 2025 થી ઉત્તર પશ્ચિમ ભારતમાં એક નવું પશ્ચિમી વિક્ષેપ ઝડપથી સક્રિય થવાની સંભાવના છે.

આ હવામાન પરિસ્થિતિઓને કારણે પંજાબ, હરિયાણા અને ચંદીગઢના વિવિધ વિસ્તારોમાં 31 ડિસેમ્બરથી 2 જાન્યુઆરી વચ્ચે ઠંડીનું મોજું આવવાની શક્યતા છે. રાજસ્થાનમાં 30 ડિસેમ્બરથી 2 જાન્યુઆરી સુધી ઠંડા દિવસની ચેતવણી આપવામાં આવી છે. મધ્યપ્રદેશના 10 જિલ્લા અને રાજસ્થાનના 30 જિલ્લાઓમાં ગાઢ ધુમ્મસનું યલો એલર્ટ છે. પહાડોના બર્ફીલા પવનોને કારણે મધ્ય ભારત અને ઉત્તર ભારત શીત લહેર અને ગાઢ ધુમ્મસથી ધ્રૂજી જશે.

40 કિલોમીટર પ્રતિ કલાકની ઝડપે પવન ફૂંકાઈ શકે છે. ઉત્તર પ્રદેશ, બિહાર, છત્તીસગઢ, મધ્યપ્રદેશ, રાજસ્થાન, પંજાબ, હરિયાણા, દિલ્હી, પશ્ચિમ બંગાળ, સિક્કિમ, આસામ, મેઘાલય, નાગાલેન્ડ, મણિપુર, મિઝોરમ, ત્રિપુરામાં ગાઢ ધુમ્મસ રહેશે. હિમાચલ પ્રદેશમાં તીવ્ર શીત લહેર અને ગ્રાઉન્ડ ફ્રોસ્ટની સ્થિતિ રહેશે. તમિલનાડુ અને પુડુચેરીમાં પણ તોફાની પવન ફૂંકાશે.