ભારતની સૌથી મોંઘી મીઠાઈ! એક કિલોની કિંમત 1.11 લાખ

શું તમે ક્યારેય સોના અને ચાંદીમાંથી બનેલી મીઠાઈઓ વિશે સાંભળ્યું છે? જો ના, તો આ લેખ તમારા માટે ખૂબ જ રસપ્રદ સાબિત થશે. જયપુરમાં ‘ત્યોહાર’ નામની એક મીઠાઈની દુકાને આગામી ‘દિવાળી 2025’ના તહેવાર માટે ખાસ કરીને 24 કેરેટ સોના અને ચાંદીમાંથી બનેલી મીઠાઈઓ બનાવીને સૌનું ધ્યાન પોતાની તરફ ખેંચ્યું છે. ચાર્ટર્ડ એકાઉન્ટન્ટમાંથી આંત્રપ્રિન્યોર બનેલા અંજલિ જૈન આ અનોખી મીઠાઈ પાછળના મુખ્ય સૂત્રધાર છે. તેમણે ભારતમાં સૌથી મોંઘી મીઠાઈ તરીકે ચર્ચામાં રહેલી આ વિશેષ મિષ્ટાન્નની રચના કરી છે.

‘ત્યોહાર’ સૌથી વધુ ચર્ચામાં રહેલી મીઠાઈ

જયપુરના વૈશાલી નગર વિસ્તારમાં આવેલી આ ‘ત્યોહાર’ દુકાનમાં સૌથી વધુ ચર્ચામાં રહેલી મીઠાઈ છે ‘સ્વર્ણ પ્રસાદમ’, જેની કિંમત 1.11 લાખ પ્રતિ કિલોગ્રામ છે. આ કિંમતના કારણે જ તેને દેશની સૌથી મોંઘી મીઠાઈ તરીકે ઓળખવામાં આવે છે. અંજલિ જૈને મીડિયાને જણાવ્યું હતું કે, આ મીઠાઈની વિશેષતા તેની સામગ્રીમાં રહેલી છે, જેમાં પાઈન નટ્સ, શુદ્ધ ઘી, ખાંડ અને સૌથી અગત્યનું 24-કેરેટ ખાદ્ય સોનું પણ ઉમેરવામાં આવ્યું છે. આ મીઠાઈને લક્ઝરી જ્વેલરી બોક્સ જેવા પેકેજિંગમાં રજૂ કરવામાં આવે છે.

આ પણ વાંચો: તહેવારોના દિવસોમાં સ્વસ્થ રહેવા માટે 8 ટિપ્સ

વિશેષ મીઠાઈઓની કિંમતો 45,000થી શરૂ

‘ત્યોહાર’ની આ ખાસ દિવાળી 2025ની ઓફરમાં ‘સ્વર્ણ ભસ્મ પાક’ અને ‘ચાંદી ભસ્મ પાક’ જેવી અન્ય મોંઘી મીઠાઈઓ પણ છે. આ વિશેષ મીઠાઈઓની કિંમતો 45,000થી શરૂ થઈને 1 લાખ પ્રતિ કિલોગ્રામ સુધીની છે. અંજલિ જૈનના જણાવ્યા મુજબ, તેમની આ દિવાળી 2025ની ખાસ ઓફર 'દિલ સે દિવાળી થીમ પર આધારિત છે, જેમાં બુલેટ બોમ્બ, સ્ટ્રિંગ બોમ્બ અને ચકરી જેવા પરંપરાગત ફટાકડા જેવા આકારની કાજુ મીઠાઈઓ પણ શામેલ છે.

મીઠાઈની શેલ્ફ લાઈફ 15થી 20 દિવસ

આ મીઠાઈઓ 15થી 20 દિવસની શેલ્ફ લાઈફ ધરાવે છે, જે તેને તહેવાર દરમિયાન પ્રિયજનોને ભેટ આપવા માટે એક ઉત્તમ અને અનોખો વિકલ્પ બનાવે છે. જો તમે આ દિવાળી પર તમારા પ્રિયજનોને કંઈક ખાસ, યાદગાર અને અત્યંત વૈભવી ભેટ આપવા માંગતા હોવ, તો 24-કેરેટ ખાદ્ય સોનું ધરાવતી આ ‘સ્વર્ણ પ્રસાદમ’ મીઠાઈ એક અનોખી પસંદગી બની શકે છે. આ રીતે, જયપુરની આ દુકાને સોના અને ચાંદીનો ઉપયોગ કરીને મીઠાઈની દુનિયામાં એક નવો બેન્ચમાર્ક સ્થાપિત કર્યો છે.