પ્રયાગરાજમાં લકઝ્‌યુરિયસ ટેન્ટનું ભાડું 8 હજારથી એક લાખ સુધી

આસ્થાના મહાસાગર સમાન મહાકુંભનો આરંભ થયો છે. દેશવિદેશમાંથી હજારો-લાખોની સંખ્યામાં શ્રદ્ધાળુઓ પ્રયાગરાજ પહોંચી રહ્યાં છે, ત્યારે મહાકુંભના ટુર પેકેજની ભારે ડિમાન્ડ બોલાઈ રહી છે. મહાકુંભ માટે ટુર ઓપરેટરોને ત્યાં ઇન્કવાયરીની સાથે-સાથે બુકિંગ પણ થઈ રહ્યું છે. શાહી સ્નાન કરવા ગુજરાતીઓ મોટી સંખ્યામાં પ્રયાગરાજ પહોંચી રહ્યાં છે. આ જોતાં અમદાવાદથી પ્રયાગરાજ થતી ફ્લાઇટ્સ પણ ફુલ થઈ છે. 

મહાકુંભ માટે અમદાવાદથી ટ્રેન ઉપરાંત પ્રયાગરાજ સુધીની સીધી ફલાઈટ શરૂ કરવામાં આવી છે. શ્રદ્ધાળુઓ માટે તમામ સુવિધા ઉપલબ્ધ હોવાથી ટુર ઓપરેટરોએ પણ ત્રણ દિવસ-બે નાઇટના ખાસ પેકેજ તૈયાર કર્યાં છે. 20 હજાર રૂપિયાથી માંડીને 45 હજાર રૂપિયા સુધીના ટુર પેકેજની ઘણી ડિમાન્ડ બોલાઈ રહી છે. મહાકુંભ જ નહીં,અયોધ્યા સહિત અન્ય ધાર્મિક સ્થળોએ દર્શન કરવા માટે પ્રવાસનું આયોજન કરાયુ છે. 

ટુર ઓપરેટરોનું કહેવું છે કે, શ્રદ્ધાળુઓના ભારે ઘસારાના કારણે હોટેલના ભાડા પણ બમણાં થઈ ગયાં છે. જેમકે, 1500 રૂપિયાના રૂમનું ભાડુ 2500 બોલાઈ રહ્યું છે. આ જ પ્રમાણે, ગંગા કિનારે લકઝુરિયસ ટેન્ટનું ભાડું 8 હજાર રૂપિયાથી માંડીને એક લાખ સુધી પહોચ્યું છે. મહાકુંભમાં ગુજરાતીઓ જઈ શકે તે માટે અમદાવાદથી પ્રયાગરાજ સુધીની સીધી ફ્લાઇટ શરૂ કરવામાં આવી છે. જ્યાં આ ફ્લાઇટનું ભાડું 4-5 હજાર હતું તે હાલ 12 હજાર સુધી પહોંચી ગયું છે. મોટાભાગની ફ્લાઇટ ફૂલ થઈ ગઈ છે. આમ, ટુર ઓપરેટરોને મહાકુંભ ફળે તેમ છે. કારણ કે, જે પ્રકારે ઇન્કવાયરી થઈ રહી છે અને બુકિંગ શહરૂ છે, તે પ્રમાણે મોટી સંખ્યામાં ગુજરાતીઓ મહાકુંભમાં પહોંચે તેવી સંભાવના છે.