પીએમ મોદી, ગૃહમંત્રી અમિત શાહે પૂર્વ પીએમ મનમોહનસિંહના નિવાસસ્થાને પહોંચી શ્રદ્ધાંજલિ આપી

વડાપ્રધાન નરેન્દ્ર મોદી અને ગૃહમંત્રી અમિત શાહ પૂર્વ પીએમ મનમોહન સિંહના નિવાસસ્થાને તેમના પાર્થિવ દેહના અંતિમ દર્શન કરવા પહોંચ્યા હતા. તેમની સાથે બીજેપી અધ્યક્ષ જેપી નડ્ડા પણ હાજર હતા. મનમોહન સિંહનું ગુરુવારે રાત્રે નિધન થયું હતું.

વડા પ્રધાન મોદી, ગૃહ પ્રધાન શાહ અને કેન્દ્રીય પ્રધાન નડ્ડાએ ભૂતપૂર્વ વડા પ્રધાનના પરિવાર સાથે મુલાકાત કરી અને સંવેદના વ્યક્ત કરી. ડૉ. મનમોહન સિંહના પાર્થિવ દેહને શનિવારે કોંગ્રેસના મુખ્યાલયમાં રાખવામાં આવશે, જ્યાં સામાન્ય લોકો તેમને શ્રદ્ધાંજલિ આપશે. આ પછી રાજઘાટ પાસે તેમના અંતિમ સંસ્કારનું આયોજન કરવામાં આવશે.

મનમોહન સિંહ 2004 થી 2014 સુધી બે વખત વડાપ્રધાન રહ્યા હતા. તેમની ગણના દેશના મહાન અર્થશાસ્ત્રીઓમાં થતી હતી. કેન્દ્ર સરકારે 7 દિવસનો રાષ્ટ્રીય શોક જાહેર કર્યો છે. તેમજ શુક્રવારના રોજ યોજાનાર તમામ સરકારી કાર્યક્રમો રદ કરવામાં આવ્યા છે.

રાહુલ ગાંધી અને કોંગ્રેસ અધ્યક્ષ ખડગે મોડી રાત્રે બેલાગવીથી દિલ્હી પહોંચ્યા બાદ સીધા મનમોહન સિંહના નિવાસસ્થાને ગયા હતા. રાહુલે X પર લખ્યું- મેં મારા માર્ગદર્શક અને ગુરુ ગુમાવ્યા છે. તમને જણાવી દઈએ કે, મનમોહન સિંહ 1998 થી 2004 સુધી વિપક્ષના નેતા પણ હતા. જો કે, 2004ની લોકસભા ચૂંટણીમાં કોંગ્રેસ પાર્ટીની જીત બાદ તેમણે દેશના 14મા વડાપ્રધાન તરીકે શપથ લીધા હતા. તેમણે યુપીએ-1 અને 2માં વડાપ્રધાન પદ સંભાળ્યું હતું.

તેમણે 22 મે 2004ના રોજ પ્રથમ વખત અને બીજી વખત 22 મે 2009ના રોજ વડાપ્રધાન તરીકે શપથ લીધા હતા. ડૉ. મનમોહન સિંહનો જન્મ 26 સપ્ટેમ્બર 1932ના રોજ પશ્ચિમ પંજાબના ગાહમાં થયો હતો, જે હવે પાકિસ્તાનનો ભાગ છે. તેમના પિતાનું નામ ગુરમુખ સિંહ અને માતાનું નામ અમૃત કૌર હતું. તેમણે વર્ષ 1958માં ગુરશરણ કૌર સાથે લગ્ન કર્યા હતા. તેમને ઉપિન્દર સિંહ, દમન સિંહ અને અમૃત સિંહ નામની ત્રણ દીકરીઓ પણ છે.

—IANS