ભાજપના ઝંડાવાળી કાર દ્વારા 3 પોલીસકર્મી કચડાયા, મહિલા કોન્સ્ટેબલનું થયું મૃત્યુ

બિહારના પટણામાં એક ગંભીર અકસ્માતની ઘટના સામે આવી છે. મોડી રાત્રે અટલ પથ પર વાહન ચેકિંગ દરમિયાન એક કાર ત્રણ પોલીસકર્મીઓને અડફેટે લેતી જોવા મળી. આ કાર પર ભાજપનો ઝંડો લાગેલો હતો. કારની ટક્કરથી મહિલા કોન્સ્ટેબલ કોમલનું ઘટનાસ્થળે જ દુઃખદ અવસાન થયું છે, જ્યારે 2 અન્ય પોલીસકર્મી, SI દીપક મણિ અને ASI અવધેશ કુમાર ગંભીર રીતે ઇજાગ્રસ્ત થયા છે.

આ ત્રણેયને તાત્કાલિક સારવાર માટે ખાનગી હોસ્પિટલમાં ખસેડવામાં આવ્યા હતા, જ્યાં કોમલને મૃત જાહેર કરવામાં આવી. અકસ્માત બાદ કાર ચલાવતો શખ્સ ઘટનાસ્થળેથી ફરાર થઈ ગયો છે, જોકે કારમાં સવાર 2 શખ્સોને પોલીસે ઝડપી લીધા છે અને તેમની પૂછપરછ શરૂ કરી છે.

ઘટનાની જાણ થતાં પટનાના ASP અવકાશ કુમાર હોસ્પિટલ પહોંચ્યા હતા અને ઈજાગ્રસ્ત પોલીસકર્મીઓની તબિયત વિશે માહિતી મેળવી હતી. કાર પર ભાજપનો ઝંડો જોવા મળતા આ મામલાને લઈને રાજકીય ચર્ચાઓ પણ ગરમાઈ છે. ઘટનાની વધુ તપાસ શરૂ કરવામાં આવી છે અને ફરાર આરોપીની શોધખોળ ચાલુ છે.